Visit:
Donald Trump : ఇరాన్ (Iran) తో యుద్ధం తీవ్రమైన వేళ రష్యా (Russia) నుంచి చమురు కొనుగోలు చేసేందుకు ఇటీవల భారత శుద్ధి కర్మాగారాలకు అమెరికా (USA) తాత్కాలిక మినహాయింపు ఇచ్చింది. అమెరికా అధ్యక్షుడు (US President) డొనాల్డ్ ట్రంప్ (US President Trump) మాట్లాడుతూ.. కీలక వ్యాఖ్యలు చేశారు. యుద్ధంవల్ల పశ్చిమాసియా, గల్ఫ్లో చమురు సరఫరా మార్గాల్లో తీవ్ర అంతరాయం ఏర్పడిందని అన్నారు.
అందుకే ప్రపంచ దేశాల్లోని ఇంధన మార్కెట్లపై ఒత్తిడి తగ్గించడానికి భారత్కు రష్యా నుంచి చమురు కొనుగోలు చేసేందుకు అనుమతి ఇచ్చినట్లు ట్రంప్ పేర్కొన్నారు. అందులో భాగంగానే సముద్రంలో ఇప్పటికే ఉన్న రష్యా ముడి చమురును కొనుగోలు చేయడానికి భారత్కు 30 రోజుల మినహాయింపు ఇచ్చామని ట్రంప్ వివరించారు. దీనివల్ల రష్యాకు ఆర్థికంగా ఎలాంటి ప్రయోజనం చేకూరదన్నారు. భారత్ తమకు ముఖ్యమైన భాగస్వామి అని పేర్కొన్నారు.
ఇంధన మార్కెట్లను స్థిరీకరించడానికి అదనపు చర్యల గురించి మాట్లాడుతూ.. ప్రస్తుత పరిస్థితుల్లో కొంత మేరకు ఒత్తిడి తగ్గించే విషయం గురించి మాత్రమే తాను ఆలోచిస్తున్నానని అన్నారు. ఉద్రిక్తతలు కొనసాగుతున్నప్పటికీ ప్రపంచ సరఫరా బలంగా ఉందని పేర్కొన్నారు. అమెరికా వద్ద అపారమైన చమురు నిల్వలు ఉన్నాయని చెప్పారు.
