మారని జూబ్లీహిల్స్‌ ఓటరు..!!

జూబ్లీహిల్స్‌ అసెంబ్లీ నియోజకవర్గ ఉప ఎన్నికలో భాగంగా మంగళవారం ఉదయం 7 గంటలకు ప్రశాంత వాతావరణంలో మొదలైన పోలింగ్‌ ప్రక్రియ సాయంత్రానికి ఉద్రిక్తతల నడుమ ముగిసింది. అధికార పార్టీ అడుగడుగునా ఎన్నికల నిబంధనలను ఉల్లంఘించారు. ఎర్రగడ్డ, షేక్‌పేట, యూసుఫ్‌గూడ డివిజన్లలో పలు చోట్ల ఎంఐఎం,కాంగ్రెస్‌ నేతల అరాచకాలను బీఆర్‌ఎస్‌ నేతలు అడ్డుకున్నారు.

• 50 శాతం మించని పోలింగ్‌ శాతం
• 48.47 శాతం పోలింగ్‌ నమోదైనట్లు అధికారుల వెల్లడి
• ఆరు గంటల లోపు క్యూలో ఉన్న వారికి అవకాశం
• నిర్వహణలో ఎప్పటిలాగే విఫలమైన ఎన్నికల సంఘం
• మారిన పోలింగ్‌ కేంద్రాలతో ఓటర్లలో తీవ్ర నిరాశ
• మొరాయించిన ఈవీఎంతో కొన్ని చోట్ల ఆలస్యంగా ఓటింగ్‌
• ఫలించని డ్రోన్ల పర్యవేక్షణ , అధికార పార్టీ నేతల
• ఉల్లంఘనలపై చేతులెత్తేసిన పోలీసులు
• ఉద్రిక్తతల నడుమ ముగిసిన పోలింగ్‌ ప్రక్రియ

సిటీబ్యూరో, నవంబర్‌ 11 (నమస్తే తెలంగాణ ) : జూబ్లీహిల్స్‌ అసెంబ్లీ నియోజకవర్గ ఉప ఎన్నికలో భాగంగా మంగళవారం ఉదయం 7 గంటలకు ప్రశాంత వాతావరణంలో మొదలైన పోలింగ్‌ ప్రక్రియ సాయంత్రానికి ఉద్రిక్తతల నడుమ ముగిసింది. అధికార పార్టీ అడుగడుగునా ఎన్నికల నిబంధనలను ఉల్లంఘించారు. ఎర్రగడ్డ, షేక్‌పేట, యూసుఫ్‌గూడ డివిజన్లలో పలు చోట్ల ఎంఐఎం,కాంగ్రెస్‌ నేతల అరాచకాలను బీఆర్‌ఎస్‌ నేతలు అడ్డుకున్నారు. ఈ సందర్భంగా ఇరువురి మధ్య స్వల్ప వివాదాలు చోటు చేసుకున్నాయి. షేక్‌పేట డివిజన్‌లోని అజీజ్‌ బాగ్‌, పారామౌంట్‌ కాలనీలోని పోలింగ్‌ స్టేషన్ల వద్ద కార్వాన్‌ ఎమ్మెల్యే కౌసర్‌ మొహినొద్దీన్‌ హల్‌ చల్‌ చేశారు.

కాంగ్రెస్‌కు ఓట్లు వేయాలని ఓటర్లను ప్రలోభాలకు గురి చేస్తున్నారంటూ బీఆర్‌ఎస్‌ ఆరోపించింది పోలింగ్‌ సరళి విషయానికొస్తే ఉదయం 7 గంటలకు ప్రారంభమైన ఓటింగ్‌ తొలి రెండు గంటల్లో చాలా కేంద్రాల్లో ఓటర్లు పెద్దగా కనిపించలేదు. మందకొడిగా సాగిన ఓటింగ్‌ మధ్యాహ్నం మూడు గంటల తర్వాత పోలింగ్‌ పుంజుకున్నది. ముఖ్యంగా ఈ సారి ఓటింగ్‌ శాతాన్ని పెంచేందుకు ఎన్నికల సంఘం పోలింగ్‌ సమయాన్ని సాయంత్రం 5 గంటల నుంచి ఆరు గంటల వరకు పెంచినా ఆశించిన స్థాయిలో పోలింగ్‌ శాతం పెరగలేదు. గత అసెంబ్లీ ఎన్నికల్లో 47.49శాతం ఉంటే స్వల్పంగా 48.47 శాతం నమోదు చేసుకోవడం గమనార్హం. జూబ్లీహిల్స్‌ ఓటరులో ఎలాంటి మార్పు లేదన్నట్లుగా మొత్తంగా పోలింగ్‌ శాతం 50 శాతం మించకపోవడం గమనార్హం. .

50 శాతం మించని పోలింగ్‌..
గ్రేటర్‌లో ఏ ఎన్నిక జరిగిన ఓటింగ్‌ శాతం 50 శాతం మించడం లేదు. గత అసెంబ్లీ ఎన్నికలు, తాజా ఉప ఎన్నికలో కూడా 50 శాతం లోపు మాత్రమే ఓట్లు నమోదయ్యాయి. మొత్తంగా 4 లక్షలకు పైగా ఓటర్లు ఉంటే వీరిలో 46 శాతం 18 నుంచి 39 సంవత్సరాల లోపు వారే..ఇందులో 18 నుంచి 29 వయస్సు ఉన్న వారు 21 శాతం ఉంటే 30 నుంచి 39 వరకు వయస్సు ఉన్న వారు 25 శాతం. ఈ 46 శాతం నుంచి ఈ సారి భారీగానే ఓటింగ్‌ నమోదు అయిందని అధికారులు స్పష్టం చేస్తున్నారు.

వెబ్‌ కాస్టింగ్‌ ద్వారా పర్యవేక్షణ..
పోలింగ్‌ సరళిని వెబ్‌ కాస్టింగ్‌ ద్వారా ఉన్నతాధికారులు పరిశీలించారు. జీహెచ్‌ఎంసీ ప్రధాన కార్యాలయంలోని ఏడో అంతస్తులో ఏర్పాటు చేసిన వెబ్‌ క్యాస్టింగ్‌ పర్యవేక్షణ, పీఆర్వో యాప్‌ ఇన్‌, ఈసీఐ నెట్‌ కంట్రోల్‌ కేంద్రాన్ని సాధారణ పరిశీలకులు రంజిత్‌కుమార్‌ సింగ్‌ జిల్లా ఎన్నికల అధికారి ఆర్‌వి కర్ణన్‌తో కలిసి పరిశీలించారు. కంట్రోల్‌ రూం పనితీరును జిల్లా ఎన్నికల అధికారి సాధారణ పరిశీలకులకు వివరించారు..

పోలింగ్‌ ప్రక్రియలో కీలక అంశాలు..

• దేశంలో తొలిసారిగా పోలింగ్‌ కేంద్రాలపై డ్రోన్ల ద్వారా నిఘా పెట్టిన విధానంపై ఎంతో గొప్పగా చెప్పిన అధికారులు..ఆచరణలో మాత్రం ఘోరంగా విఫలమయ్యారు. డబ్బుల పంపిణీ నుంచి పోలింగ్‌ కేంద్రాల వద్ద అధికార పార్టీ ఆగడాలకు చెక్‌ పెట్టలేకపోయారు. భూమి నుంచి 50 మీటర్ల ఎత్తున తిరుగుతూ అనుమానాస్పద ఘటనలను గుర్తించి, వాటిని అడ్డుకట్టవేయడంలో విఫలం చేశారు.
• ఈవీఎంలు దాదాపు 11 చోట్ల మొరాయించాయి..దీంతో ఓటింగ్‌ ప్రక్రియ కాస్తా ఆలస్యంగా ప్రారంభమైనది.
• ప్రతి ఎన్నికల్లో ఇది సర్వసాధారణంగా మారింది. ఎన్నికల అధికారులు నిర్వహణలో మరోసారి విఫలం చెందారు. ఓటు వేసేందుకు ఉత్సాహంగా వచ్చిన ఓటర్లకు కేంద్రాలు మారడంతో నిరాశ తప్పలేదు.
• శ్రీనగర్‌ కాలనీ డివిజన్‌, వెంగళ్‌రావు నగర్‌ డివిజన్‌ పరిధిలోని ప్రముఖులు నివసించే మధురానగర్‌, శ్రీనగర్‌ కాలనీ, గేటెడ్‌ కమ్యూనిటీ హాళ్ల నుంచి ఓటర్ల యథావిధిగానే బయటకు రాలేదు..కాలనీల్లో ఉన్న పోలింగ్‌ కేంద్రాలు ఉదయం నుంచి సాయంత్రం వరకు వెలవెలబోయాయి.
• వృద్ధులు, దివ్యాంగులు ఓటింగ్‌కు భారీగా కదిలి ప్రజాస్వామ్య స్ఫూర్తిని చాటారు.
• పోలింగ్‌ సమయాన్ని గంట పాటు పెంచారు. ఈ అవకాశాన్ని ప్రైవేట్‌ ఉద్యోగులు సద్వినియోగం చేసుకున్నారు.
• పోలింగ్‌ బూత్‌లలో యువ ఓటర్లు ఎక్కువగా కనిపించారు. ఏ సమయంలో చూసినా అన్ని పోలింగ్‌ బూత్‌లలో వారి హవానే కనిపించింది. జూబ్లీహిల్స్‌లో ఈ సారి ఓటింగ్‌ శాతం స్వల్పంగా పెరగడంలో ఎన్నికల అధికారుల కృషికి వీరి చైతన్యం తోడైంది. రాత్రి 9 గంటలకు 48.47శాతం మేర నమోదైంది. ఆరు గంటల లోపు పోలింగ్‌ కేంద్రాల్లో ఉన్న వారికి కూడా ఓటు వేసేందుకు అవకాశం కల్పించడంతో మరో ఒకటి నుంచి రెండు శాతం మేర పెరిగే అవకాశాలున్నాయని అధికారులు అంచనా వేశారు.

ప్రతి రెండు గంటలకు పోలింగ్‌ శాతం
సమయం : పోలింగ్‌ శాతం
ఉదయం 9 గంటలకు : 10.02
11 గంటలకు : 20.76
మధ్యాహ్నం ఒంటి గంటకు : 31.94
మూడు గంటలకు : 40.20
ఐదు గంటలకు : 47.16
ఆరు గంటలకు : 48.47