వీధి కుక్కల నియంత్రణకు కొత్త మార్గదర్శకాలు

జంతు ప్రేమికులు జర జాగ్రత్త.. వీధి కుక్కలకు ఎక్కడంటే అక్కడ ఆహారాన్ని అందిస్తామంటే కుదరదు. శునకాల సంక్షేమానికి ఏర్పాటు చేసిన ఆయా స్థానిక కమిటీల అనుమతితోనే ఆహారం, నీరు అందించాలి. ప్రస్తుతం శునకాలకు ఫుడ్‌, వాటర్‌ అందించే కార్యక్రమాలను జంతు ప్రేమికులు స్వేచ్ఛగా నిర్వహిస్తున్నారు. దీని వల్ల కొన్ని చోట్ల అపశృతులు చోటు చేసుకుంటున్నాయి. వీధి కుక్కల నియంత్రణపై యానిమల్‌ వెల్ఫేర్‌ బోర్డు ఆఫ్‌ ఇండియా (ఏడబ్ల్యూబీఐ) కొత్త మార్గదర్శకాలను అందుబాటులోకి తీసుకువచ్చింది.

• జంతు ప్రేమికులకు పలు సూచనలు
• సంతాన నిరోధక శస్త్ర చికిత్సపై రోజు వారీ నివేదిక
• శునకాల విషయంలో చేపట్టే
• కార్యక్రమాల పర్యవేక్షణకు ప్రత్యేక కమిటీలు

సిటీబ్యూరో, ఏప్రిల్‌ 20 (నమస్తే తెలంగాణ): జంతు ప్రేమికులు జర జాగ్రత్త.. వీధి కుక్కలకు ఎక్కడంటే అక్కడ ఆహారాన్ని అందిస్తామంటే కుదరదు. శునకాల సంక్షేమానికి ఏర్పాటు చేసిన ఆయా స్థానిక కమిటీల అనుమతితోనే ఆహారం, నీరు అందించాలి. ప్రస్తుతం శునకాలకు ఫుడ్‌, వాటర్‌ అందించే కార్యక్రమాలను జంతు ప్రేమికులు స్వేచ్ఛగా నిర్వహిస్తున్నారు. దీని వల్ల కొన్ని చోట్ల అపశృతులు చోటు చేసుకుంటున్నాయి. వీధి కుక్కల నియంత్రణపై యానిమల్‌ వెల్ఫేర్‌ బోర్డు ఆఫ్‌ ఇండియా (ఏడబ్ల్యూబీఐ) కొత్త మార్గదర్శకాలను అందుబాటులోకి తీసుకువచ్చింది. దేశంలోని అనేక ప్రాంతాల్లో వీధి కుక్కలకు సంబంధించిన ఘటనలు అదుపు తప్పుతున్న తరుణంలో జంతువులపై క్రూర త్వ నిరోధక చట్టం 1960 ప్రకారం జంతు జనన నియంత్రణ నియమాలు 2023ను కేంద్ర ప్రభుత్వం నోటిఫై చేసింది. గ్రేటర్‌లో ప్రస్తుతం నాలుగు జంతు సంరక్షణ కేంద్రాలుండగా..రోజూ 400 నుంచి 500 శునకాలకు సంతాన నిరోధక శస్త్ర చికిత్సలు చేస్తున్నారు. కొత్త నిబంధనల ప్రకారం ఆయా కేంద్రాల్లో జరిగే చికిత్సలు, చికిత్స పొందే శునకాల వివరాలను జీహెచ్‌ఎంసీ నివేదిక రూపంలో స్థానిక పర్యవేక్షణ కమిటీకి అందించనుంది.

నూతన మార్గదర్శకాలు ఇవే..

• శునకాల సంక్షేమానికి, స్థానిక సంస్థలు, వాటి విషయంలో చేపట్టే కార్యక్రమాల పర్యవేక్షణకు కేంద్ర పర్యవేక్షణ, రాష్ట్ర, స్థానిక పర్యవేక్షణ, అనే మూడు రకాల కమిటీలుండాలి. ఆయా కమిటీలు స్థానిక సంస్థలు నిర్వహించే జంతు సంరక్షణ కేంద్రాలు, వాటిలో చేపట్టే చికిత్సలు, టీకా కార్యక్రమాలను ఎప్పుడైనా తనిఖీ చేయవచ్చు.
• శునకాలు, స్థానికుల మధ్య సంఘర్షణ తలెత్తకుండా స్థానిక సంస్థలు చర్యలు తీసుకోవాలి. గేటెడ్‌ కమ్యూనిటీలు, అపార్ట్‌మెంట్లలో శునకాల సంక్షేమ బాధ్యత అక్కడున్న సంఘాలదే.
• మనుషుల పట్ల విశ్వాసంగా ఉండే శునకాలను వీధి కుక్కలని పిలవడం సరిగా లేదంటూ వాటిని కమ్యూనిటీ డాగ్స్‌గా పిలవాలని ఏడబ్ల్యూబీఐ పేర్కొంది.
• ఏడబ్ల్యూబీఐ గుర్తింపు ఉన్న ఎన్జీవోలన్నీ ఏబీసీ చికిత్సలు చేయవద్దు. ఏబీసీ చేయాలంటే ప్రత్యేకంగా ఏడబ్ల్యూబీఐ అనుమతి తీసుకోవాలి. తద్వారా కుక్కల సంతానాన్ని పక్కాగా నియంత్రించవచ్చు. ప్రస్తుతం జీహెచ్‌ఎంసీ ఆధ్వర్యంలో ఏబీసీ చికిత్సలు చేస్తున్న సంస్థల్లో కొన్నింటికే అలాంటి అనుమతి ఉంది. గుర్తింపు లేని ఎన్జీవోలపై జీహెచ్‌ఎంసీ త్వరలో నిర్ణయం తీసుకోనుంది.
• కుక్కలు ప్రాణాపాయంలో ఉన్నట్లు పేర్కొని, వాటికి విషవాయువు ఇచ్చి చంపేసే ప్రక్రియను కూడా స్థానిక పర్యవేక్షణ కమిటీ అనుమతితోనే చేపట్టాలి.
• ఏదేనీ ప్రాంతంలో కుక్కలు భయాందోళనలకు గురి చేస్తుంటే , అవి కరుస్తాయని అనిపించినప్పుడు పౌరులు ఫిర్యాదు చేసేందుకు జీహెచ్‌ఎంసీ ప్రత్యేక సెల్‌ను ఏర్పాటు చేయాలని కొత్త మార్గదర్శకాలు చెబుతున్నాయి. ప్రస్తుతం జీహెచ్‌ఎంసీ హెల్ప్‌లైన్‌ నంబర్‌ 040-21111111 , మై జీహెచ్‌ఎంసీ అప్లికేషన్‌ ద్వారా, సిటిజన్‌ బడ్డీ ద్వారా కానీ స్టెరిలైజ్డ్‌ కుకలపై, ప్రమాదకర కుకలపై రిపోర్ట్‌ చేసేందుకు విపరీతమైన ప్రచారం కల్పిస్తున్నది.