రోజుకో హత్య పూటకో దోపిడీ!

నగరంలో కొన్నిరోజులుగా వరుసగా జరుగుతున్న హత్యలు, నేరాలు కలకలం రేపుతున్నాయి. గడిచిన నెలరోజుల్లో నాలుగు కమిషనరేట్ల పరిధిలో సుమారు 20కిపైగా హత్యలు జరగడం పరిస్థితులకు అద్దంపడుతోంది.

• మాజీ ఐపీఎస్‌ భార్య హత్యతో సిటీలో కలకలం
• చిలకలగూడలో దారుణ హత్యకు గురైన యువకుడు
• వరుస సంఘటనలతో ఉలిక్కిపడుతున్న భాగ్యనగరం
• కాంగ్రెస్‌ పాలనలో శాంతిభద్రతలు ప్రశ్నార్థకం

నగరంలో కొన్నిరోజులుగా వరుసగా జరుగుతున్న హత్యలు, నేరాలు కలకలం రేపుతున్నాయి. గడిచిన నెలరోజుల్లో నాలుగు కమిషనరేట్ల పరిధిలో సుమారు 20కిపైగా హత్యలు జరగడం పరిస్థితులకు అద్దంపడుతోంది. గత సంవత్సరంలో హైదరాబాద్‌లోని ట్రై కమిషనరేట్ల పరిధిలో నెలకు 13 నుంచి 15 వరకు హత్యలు జరగగా ఈసారి ఆ శాతం 20కి చేరడం గమనార్హం. ఇలా మహానగరంలో నిత్యం ఏదో ఒకచోట హత్యలు, దోపిడీలతో పంజా విసురుతున్న అంతర్‌ ర్రాష్ట్ర ముఠాలు, రౌడీషీటర్ల గ్యాంగ్‌వార్‌లు, రెచ్చిపోతున్న సెల్‌ఫోన్‌, చైన్‌ స్నాచర్లు, అంతకంతకూ పెరిగిపోతున్న గంజాయి మూకల అరాచకాలు నగరంలో శాంతిభద్రతలను ప్రశ్నార్థకంగా మారుస్తున్నాయి.

– సిటీబ్యూరో, మే 8 (నమస్తే తెలంగాణ)

హైదరాబాద్‌లో వ్యవస్థీకృత నేరాలు పెరుగుతున్నాయి. ఉమ్మడి ఆంధ్రప్రదేశ్‌లోని పరిస్థితి నేడు తిరిగి పునారవృతమవుతు న్నాయి. వ్యవస్థీకృత నేరాలను ఉక్కుపాదంతో నాటి బీఆర్‌ఎస్‌ ప్రభుత్వం అణిచివేసింది. దీంతో హైదరాబాద్‌లో దొంగతనాలు, దోపిడీలు, స్నాచింగ్‌లు, దృష్టి మళ్లించి దొంగతనాల వంటి నేరాలను పూర్తిస్థాయిలో కట్టడి చేశారు. తిరిగి కాంగ్రెస్‌ ప్రభుత్వం అధికారంలోకి వచ్చిన తరువాత అంతర్‌ర్రాష్ట్ర ముఠాలు బెంబేలెత్తిస్తున్నాయి. బీఆర్‌ఎస్‌ పాలనలో హైదరాబాద్‌ పోలీసుల దెబ్బకు ఈవైపే కన్నెత్తి చూడని అంతర్‌ర్రాష్ట్ర ముఠాలు ఇప్పుడు వరుసగా ఏదోఒక ఘటనకు పాల్పడుతూనే ఉన్నాయి.

మహిళలకు భద్రతేదీ?

ఒక సర్వే ప్రకారం హైదరాబాద్‌లో మహిళలపై లైంగిక వేధింపులు, లైంగికదాడులు ఇతర నేరాలకు సంబంధించి దేశంలోని ప్రధాన నగరాల్లో సర్వే చేస్తే 30 శాతం నేరాలు జరుగుతున్నట్లు వెల్లడైంది. ఇదిలా ఉంటే మహిళలు ఇంటి ముందు కూడా కనీసం ఒంటరిగా కొద్దిసేపు కూర్చోలేని దుస్థితి నెలకొంది. పగలు తేడా లేకుండా స్నాచింగ్‌ ముఠాలు హైదరాబాద్‌లో పెట్రేగిపోతున్నాయి. గంజాయి బ్యాచ్‌లు ఒంటరిగా కన్పించే మహిళలను ఏడ్పించడం, అఘాయిత్యాలకు పాల్పడుతున్న ఘటనలు చోటుచేసుకుంటున్నాయి. కాగా, నాలుగురోజుల కిందట మల్కాజిగిరి సీపీ సుమతి ఆపరేషన్‌ నగరంలో మహిళల భద్రత డొల్లతనాన్ని చాటిచెప్పింది. దిల్‌షుఖ్‌నగర్‌లో సుమతి ఒక సాధారణ మహిళగా అర్ధరాత్రివేళ నిలుచుంటే ఆమెను 40 మంది ఆకతాయిలు వేధించిన వైనం భాగ్యనగరంలో పరిస్థితికి అద్దం పడుతున్నది.

వరుస ఘటనలవి..

• జూబ్లీహిల్స్‌ ప్రశాసన్‌నగర్‌లో దారుణం జరిగింది. విశ్రాంత ఐపీఎస్‌ అధికారి వినయ్‌ రంజన్‌రే భార్య తనూజ దారుణ హత్యకు గురయ్యారు. ఈ హత్యలో పనిమనిషి కల్పన కీలకపాత్ర పోషించినట్లు పోలీసులు అనుమానిస్తున్నారు. కల్పనతో పాటు మరో ముగ్గురు ఈ ఘటనకు పాల్పడినట్లు పోలీసులు ప్రాథమికంగా నిర్ధారించారు. తనూజ హత్య అనంతరం ఇంట్లో ఉన్న బంగారం, నగదు తీసుకుని నిందితులు
  పరారయ్యారు.
• సికింద్రాబాద్‌ చిలకలగూడ పోలీస్‌ స్టేషన్‌ పరిధిలో ఓ యువకుడిని కొందరు వ్యక్తులు దారుణంగా పొడిచి చంపారు. అల్వాల్‌లోని యాప్రాల్‌ ప్రాంతానికి చెందిన యువన్‌ అలియాస్‌ అఖిల్‌ను గురువారం రాత్రి ఇందిరానగర్‌లో వెంటాడి మరీ చంపేశారు. తల, మెడ, చేతులపై సుమారు 15 చోట్ల కత్తులతో పొడవడంతో యువన్‌ అక్కడికక్కడే ప్రాణాలు విడిచారు.
• మేడ్చల్‌ జిల్లా మేడిపల్లి ప్రాంతంలోని ప్రతాపసింగారంలో గత నెల ఫ్యూచర్‌సిటీ పోలీసులు వరుస దొంగతనాలకు పాల్పడుతున్న ముఠాను అరెస్ట్‌ చేశారు. వారు స్థానిక కాలనీలలో నివాసముంటూ ఫోన్‌దోపిడీలు, చైన్‌స్నాచింగ్‌లు, ఇతర దొంగతనాలకు పాల్పడుతున్నట్లు తెలుస్తోంది. ఈ గ్యాంగ్‌కు చెందినవారంతా ఆంధ్రప్రదేశ్‌కు చెందిన వారుగా పోలీసులు చెప్పారు. జనవరి మధ్యలో సంక్రాంతి పండుగ సమయంలో మేడిపల్లి, చెంగిచెర్ల పరిధిలో దొంగల ముఠా ఒకేరాత్రి దాదాపు 12 నుంచి 13 ఇళ్లల్లో చోరీలకు పాల్పడడం తీవ్ర కలకలం రేపింది.
• అంతకుముందే ఓ యువతి చేసిన వీడియో సోషల్‌ మీడియాలో వైరల్‌ అయింది. ఆమె ఉదయాన్నే రన్నింగ్‌కు వెళ్లిన సమయంలో ఎదురైన భయానక అనుభవాన్ని సాక్ష్యాలతో సహా వీడియోలో పంచుకుంది. ఓ వ్యక్తి ఆమెను వెంబడిస్తూ జుగుప్సాకరంగా ప్రవర్తించబోతుంటే ఆమె వీడియో తీయబోగా అతను అక్కడి నుంచి జారుకున్నాడు.