Visit:
సిటీబ్యూరో, ఆగస్టు 22 (నమస్తే తెలంగాణ) : స్వచ్ఛ ఆటోల పని తీరును మెరుగు పరిచేందుకు జీహెచ్‌ఎంసీ పటిష్టమైన చర్యలు చేపట్టింది. స్వచ్ఛ ఆటోల పనితీరు ఆశాజనకంగా లేకపోవడం, లక్ష్యాన్ని మరిచి ఇష్టారాజ్యంగా వ్యవహరిస్తున్నట్లు పెద్ద ఎత్తున ఫిర్యాదులు వచ్చాయి. ఇంటింటి వ్యర్థాల సేకరణపై ప్రజలు, స్థానిక ప్రజాప్రతినిధుల నుంచే కాకుండా రెసిడెన్షియల్‌ కాలనీల నుంచి కూడా ఫిర్యాదులు రావడంతో ఇలాంటివి పునరావృతం కాకుండా ఉండేందుకు దిద్దుబాటు చర్యలు చేపడుతున్నారు.
స్వచ్ఛ ఆటోలకు కేటాయించిన లక్ష్యం మేరకు చెత్త సేకరణ చేయని పక్షంలో సంబంధిత ఆటోను ఇతరులకు ఇచ్చేందుకు తాజాగా నిర్ణయించారు. వాహన డిజైన్‌ మార్చినా, ఇతర ప్రదేశాల్లోకి వెళ్లినా కఠిన చర్యలు తీసుకోవడమే కాకుండా సంబంధిత వాహనాన్ని ఇతర నిరుద్యోగ యువతకు అందించేందుకు క్షేత్ర స్థాయిలో చర్యలు తీసుకుంటామని అధికారులు పేర్కొన్నారు.
వార్డులో కేటాయించిన స్వచ్ఛ ఆటోలు, కాలనీల కేటాయింపు, ఒకొక ఆటోకు ఇండ్ల కేటాయింపు, ఇంటింటికీ రుసుం వసూళ్లు చేసే వివరాలను సంబంధిత కార్పొరేటర్‌కు ముందుగా వివరించి అవగాహన కల్పిస్తారు. ఆ తర్వాత కార్పొరేటర్‌ అధ్యక్షతన సమీక్షా సమావేశం నిర్వహిస్తారు. ఈ ప్రక్రియను వేగవంతంగా పూర్తి చేయనున్నారు. స్వచ్ఛ ఆటోల పని తీరు, కేటాయించిన ఇండ్ల నుంచి చెత్త సేకరణ ప్రక్రియను మెరుగుపరిచే విధంగా సంబంధిత కార్పొరేటర్‌, అధికారులు, స్వచ్ఛ ఆటోల యజమానులతో సమావేశం ఏర్పాటు చేసి సమీక్షిస్తారు .
ఈ సందర్భంగా స్వచ్ఛ అటో దారులు పడుతున్న ఇబ్బందులను కూడా పరిగణలోకి తీసుకొని కార్పొరేటర్‌ స్థాయిలో జరిగే సమీక్షా సమావేశంలో పరిషార దిశగా చర్యలు తీసుకుంటారు. ఈ నేపథ్యంలో కేటాయించిన కాలనీల్లో ఉదయం 6 నుంచి 11 గంటల వరకు తప్పనిసరిగా ఇండ్ల నుంచి వందకు వంద శాతం చెత్త సేకరణ పూర్తి చేయాల్సి ఉంది.
ఒక వేళ లక్ష్యాన్ని పూర్తిచేయని పక్షంలో, నిర్దేశించిన సమయం వరకు ఉండని పక్షంలో కేటాయింపును రద్దు చేసి, ఆ వాహనాన్ని ఇతరులకు ఇచ్చే విధంగా చర్యలు తీసుకోనున్నారు. స్వచ్ఛ ఆటోల యజమానులు తనకు కేటాయించిన కాలనీలో మాత్రమే సేకరణ చేయాలని, ఇతర కాలనీల్లో వ్యర్థాల సేకరణ చేస్తే చర్యలు తీసుకుంటామని ఈ సందర్భంగా అధికారులు తెలిపారు.
చెత్త సేకరణ కోసం జీహెచ్‌ఎంసీ ఇప్పటి వరకు 4500 డ్రైవర్‌ కమ్‌ ఓనర్‌ పథకం కింద వాహనాలు కొనుగోలు చేసింది. ప్రైవేటు ద్వారా మరో 150 వాహనాలు కలిపి 4650 స్వచ్ఛ ఆటోల ద్వారా నగరంలో 4886 కాలనీల్లో 23 లక్షల గృహాల నుంచి రోజుకు 6500 మెట్రిక్‌ టన్నులకు పైగా చెత్త సేకరణ జరుగుతున్నది.
