స్వచ్ఛత.. గాలికి! చెత్త.. రోడ్లపైకి!

ప్రజా పాలన ప్రభుత్వమని చెబుతున్న కాంగ్రెస్‌ సర్కారులో ప్రజల కష్టాలు పెరిగాయి.. శాఖల మధ్య సమన్వయ లోపంతో రోడ్డెక్కితే చాలు సమస్యలు స్వాగతం పలకడమే కాదు...

• ఏటా రూ.300 కోట్లు ఖర్చు..
• అయినా అధ్వానంగా పారిశుధ్య నిర్వహణ
• రోగాల బారిన పడుతున్న ప్రజలు
• రహదారులు, కాలనీలను ముంచెత్తుతున్న వ్యర్థాలు
• కాగితాలకే పరిమితమవుతున్న స్పెషల్‌ డ్రైవ్‌

సిటీబ్యూరో, ఆగస్టు 21 (నమస్తే తెలంగాణ ) : ప్రజా పాలన ప్రభుత్వమని చెబుతున్న కాంగ్రెస్‌ సర్కారులో ప్రజల కష్టాలు పెరిగాయి.. శాఖల మధ్య సమన్వయ లోపంతో రోడ్డెక్కితే చాలు సమస్యలు స్వాగతం పలకడమే కాదు…ప్రజల ఆరోగ్యంపై తీవ్ర ప్రభావం చూపుతున్నాయి. ముఖ్యంగా డెంగీ, మలేరియా వ్యాధులు, వైరల్‌ జ్వరాలు విజృంభిస్తున్నా.. పారిశుధ్య నిర్వహణలో అధికారులు నిద్ర మత్తు వీడడం లేదు. ఎక్కడ చూసినా.. చెత్త కుప్పలే దర్శనమిస్తున్నాయి.

ఈ క్రమంలోనే చెత్తా చెదారంలో దోమలు నివాసాలుగా ఏర్పర్చుకొని జనంపై దాడి చేస్తున్నాయి. వాటి బారిన పడిన జనం జ్వరాలతో దవాఖానల్లో చేరుతున్నారు. ఉస్మానియా, ఫీవర్‌, గాంధీ దవాఖానల్లో సాధారణ రోజుల కంటే దాదాపు 300 మంది ఒక్కో ఆసుపత్రుల్లో ఓపీల సంఖ్య పెరుగుతుండడం ఆందోళన కలిగించే అంశం. ప్రైవేట్‌ క్లినిక్‌లలోనూ ఓపీల తాకిడి పెరగడం గమనార్హం. పారిశుధ్యంపై స్పెషల్‌ డ్రైవ్‌ చేపడుతున్నామని జీహెచ్‌ఎంసీ ఒకవైపు ప్రకటనలు జారీ చేస్తున్నా.. క్షేత్రస్థాయిలో మాత్రం కాలనీలు, రహదారుల్లో గుట్టలు గుట్టలుగా పేరుకుపోయిన చెత్త కుప్పలే దర్శనమిస్తున్నాయి.

ఎక్కడ చూసినా.. చెత్త కుప్పలే

ఇటీవల పారిశుధ్య కార్మికులు రెండు రోజుల పాటు సమ్మెలోకి వెళ్లడం ఈ ప్రభావం మరింత పడింది. వాస్తవంగా వర్షాకాలంలో వ్యర్థాలు త్వరగా కుళ్లి దుర్గంధం వెదజల్లే పరిస్థితులు ఎక్కువ. దీని చక్కదిద్దేందుకు , చెత్తను ఎప్పటికప్పుడు తరలించేందుకు వర్షాకాలంలో ప్రత్యేక ఏర్పాట్లు చేయడం లేదు. వర్షాలొస్తే దోమలు, ఈగలు, క్రిమికీటకాలు వృద్ధి చెంది రోగాలు వ్యాపించే ప్రమాదం పొంచి ఉంది. ఇప్పటికే మలేరియా, డెంగీ కేసులు విజృంభిస్తున్నాయి. ఈ నేపథ్యంలోనే రాబోయే రోజుల్లో పారిశుధ్య నిర్వహణకు మరింత మెరుగైన చర్యలు తీసుకోవాలని ప్రజలు వేడుకుంటున్నారు.

ప్రజల ప్రాణాలు కాపాడండి..సీపీఐ(ఎంఎల్‌)

వరుసగా కురుస్తున్న వర్షాలతో డ్రైనేజీలు, కాలువలు నిండిపోవడం, అపరిశుభ్ర వాతావరణం ఏర్పడడం, దోమ లార్వా దశలో చంపకపోతే అవి ప్రజలను డెంగీతో ప్రాణాల మీదకు తెస్తుందని నాయకులు హన్మేశ్‌, ప్రదీప్‌, రవికుమార్‌ ఆరోపించారు. గాంధీ, ఉస్మానియా, కోఠి తదితర బస్తీ దవాఖానలు రోగులతో నిండిపోయాయని పేర్కొన్నారు. అనంతరం పారిశుధ్య విభాగం అడిషనల్‌ కమిషనర్‌ రఘు ప్రసాద్‌ను కలిసి నాయకులు వినతిపత్రం సమర్పించారు.

కాగితాల్లోనే స్పెషల్‌ డ్రైవ్‌

అయితే కార్యక్రమం చివరి మూడు రోజుల్లో స్పెషల్‌ డ్రైవ్‌ను చాలా చోట్ల చేపట్టలేదు. వర్షాల కారణంతో చేతులెత్తేశారు. ప్రస్తుతం గురువారం నుంచి ఈ నెల 25వ తేదీ వరకు ఐదు రోజుల పాటు స్పెషల్‌ డ్రైవ్‌ అంటూ ప్రకటించారు. కానీ ఎక్కడ శుభ్రత పాటించలేదని క్షేత్రస్థాయి పరిస్థితులు అద్దం పడుతున్నాయి. కాగా 11 రోజుల పాటు పారిశుధ్య జరిపిన స్పెషల్‌ డ్రైవ్‌లో 82 చోట్ల డెంగీ కేసులను గుర్తించడం గమనార్హం.

2640 చోట్ల చెత్త కుప్పలు

వ్యర్థాలతో నిండిపోయినా బస్తీలు, కాలనీలు వెరసి దోమలతో దవాఖానల్లో పెరుగుతున్న వ్యాధి పీడితులతో ప్రజల్లో ఆందోళన నెలకొంది. దీనికి కారణం అడుగడుగునా కొందరి అధికారుల అవినీతి లెక్కలు, రికార్డుల్లో తప్ప క్షేత్రస్థాయిలో కనిపించని సిబ్బంది..కాగితాల్లో మాత్రమే కనిపించే చెత్త తరలింపు..మేయర్‌, డిప్యూటీ మేయర్‌, కమిషనర్‌ మొదలుకొని డిప్యూటీ కమిషన్ల వరకు ఆకస్మిక పర్యటనల లేమి వరకు లోపాలు కొట్టొచ్చినట్లు కనిపిస్తున్నాయి. ఒక్క వీఐపీలు ఉండే ప్రాంతాలు, ప్రధాన రహదారుల్లో మాత్రమే పారిశుధ్య నిర్వహణ మెరుగ్గా కనిపిస్తుందే తప్ప.. కాలనీలు, బస్తీలలో చెత్త సేకరణ సక్రమంగా జరగడం లేదన్న విమర్శలు ఉన్నాయి.