మార్చి ఒకటో తేదీన సనత్ నగర్‌లో ఉచిత కంటి వైద్య శిబిరం.. అవసరమైన వారికి ఉచిత శస్త్ర చికిత్స..!

సనత్‌నగర్‌ లయన్స్ క్లబ్, సంకేత్ ఆర్గనైజేషన్ సంయుక్త ఆధ్వర్యంలో మార్చి ఒకటో తేదీన సనత్ నగర్‌లోని వెజిటబుల్ మార్కెట్ గ్రౌండ్స్‌లో ఉచిత కంటి వైద్య శిబిరం నిర్వహించనున్నాయి.

అమీర్‌పేట్, ఫిబ్రవరి 27: సనత్‌నగర్‌ లయన్స్ క్లబ్, సంకేత్ ఆర్గనైజేషన్ సంయుక్త ఆధ్వర్యంలో మార్చి ఒకటో తేదీన సనత్ నగర్‌లోని వెజిటబుల్ మార్కెట్ గ్రౌండ్స్‌లో ఉచిత కంటి వైద్య శిబిరం నిర్వహించనున్నాయి. ప్రముఖ నేత్ర వైద్య నిపుణులు, సరోజినీ దేవి కంటి ఆసుపత్రి మాజీ సూపరింటెండెంట్- బల్కంపేట శంకర్ నేత్రాలయ ట్రస్ట్ అధ్యక్షులు డాక్టర్ ఎస్ రవీందర్ గౌడ్ నేతృత్వంలో ఈ ఉచిత కంటి వైద్య శిబిరం నిర్వహిస్తారు. ఈ ఉచిత వైద్య శిబిరం మార్చి ఒకటో తేదీ ఉదయం 9 గంటల నుండి మధ్యాహ్నం ఒంటిగంట వరకు జరుగుతుందని నిర్వాహకులు తెలిపారు.

ఈ శిబిరంలో భాగంగా కంటి పరీక్షలు చేయించుకునే వారికి అవసరమైతే కంటి అద్దాలు, అత్యవసరమైతే ఉచితంగా కంటి శస్త్ర చికిత్సలు కూడా నిర్వహిస్తామని డాక్టర్ ఎస్ రవీందర్ గౌడ్ తెలిపారు. ఈ ఉచిత కంటి వైద్య శిబిరాన్ని ఎస్సార్ నగర్ ఏసీపీ పీ వెంకట్ రమణ, సనత్ నగర్ ఇన్‌స్పెక్టర్ శ్రీనివాసులు ప్రారంభిస్తారు. ఈ కార్యక్రమానికి లయన్స్ క్లబ్ ప్రతినిధులు అతిథులుగా విచ్చేస్తున్నారని నిర్వాహకులు తెలిపారు. ఈ సదవకాశాన్ని సద్వినియోగం చేసుకోవాలని స్థానికులకు సంకేత్ ఆర్గనైజేషన్ అధ్యక్షులు మురళి ఫణి విజ్ఞప్తి చేశారు.