IT Jobs | ఐటీ ఉద్యోగాల పేరుతో నిరుద్యోగులను ముంచేస్తున్న నకిలీ సాఫ్ట్‌వేర్‌ కంపెనీలు

హైదరాబాద్‌లో ఐటీ ఉద్యోగాల పేరిట నిరుద్యోగులను నకిలీ సాఫ్ట్‌వేర్‌ కంపెనీలు నిలువునా మోసం చేస్తున్నాయి. ప్రముఖ సాఫ్ట్‌వేర్‌ కంపెనీల్లో ఉద్యోగాలు ఉన్నాయని, తమ వద్ద మూడు నుంచి ఆరునెలల పాటు శిక్షణ పొందితే ఆయా సంస్థల్లో జాబ్‌ గ్యారెంటీ అంటూ పలు కన్సెల్టెన్సీలు నిరుద్యోగులను ఆకర్షిస్తున్నాయి. శిక్షణ పేరుతో ఒక్కో అభ్యర్థి నుంచి రూ.2 నుంచి 3లక్షల ఫీజు వసూలు చేసి కోట్లు దండుకున్నాక పత్తా లేకుండా పోతున్నాయి.

• నమ్మిస్తారు.. ముంచేస్తారు!
• నిరుద్యోగుల ఆశలు.. కంపెనీల మోసాలు

IT Jobs | సిటీబ్యూరో: హైదరాబాద్‌లో ఐటీ ఉద్యోగాల పేరిట నిరుద్యోగులను నకిలీ సాఫ్ట్‌వేర్‌ కంపెనీలు నిలువునా మోసం చేస్తున్నాయి. ప్రముఖ సాఫ్ట్‌వేర్‌ కంపెనీల్లో ఉద్యోగాలు ఉన్నాయని, తమ వద్ద మూడు నుంచి ఆరునెలల పాటు శిక్షణ పొందితే ఆయా సంస్థల్లో జాబ్‌ గ్యారెంటీ అంటూ పలు కన్సెల్టెన్సీలు నిరుద్యోగులను ఆకర్షిస్తున్నాయి. శిక్షణ పేరుతో ఒక్కో అభ్యర్థి నుంచి రూ.2 నుంచి 3లక్షల ఫీజు వసూలు చేసి కోట్లు దండుకున్నాక పత్తా లేకుండా పోతున్నాయి. నిరుద్యోగులు ఈ కంపెనీల మాటలు నమ్మి సెక్యూరిటీ డిపాజిట్‌ కింద డబ్బులు కట్టి నెలల తరబడి ఉద్యోగాల కోసం ఎదురు చూసి తీరా వారు మోసం చేశాక పోలీసులకు ఫిర్యాదు చేస్తున్నారు.

ఏడాదిలో 20కి పైగా కేసులు..
నగరంలో బోగస్‌ కంపెనీల పేరుతో నిరుద్యోగులను మోసం చేస్తున్నాయి. వీటి విషయంలో తీరా మోసపోయిన తర్వాత బాధితులు పోలీసులకు చెప్పడంతో ఒక్క ఏడాదిలో సుమారు 20కిపైగా కేసులు నమోదైనట్లు తెలుస్తోంది. ఈ నేపథ్యంలో పోలీసులు నిరుద్యోగులను మోసం చేసిన కంపెనీలపై కఠినమైన కేసులు పెట్టడంతో పాటు వారు భవిష్యత్‌ లో వ్యాపారం చేయకుండా నిషేధించేందుకు అవసరమైన ప్రణాళిక సిద్ధం చేస్తున్నారు. నగరంలో ఉన్న సాఫ్ట్‌ వేర్‌ కంపెనీల వివరాలు సేకరిస్తున్నారు. గతంలో నకిలీ కన్సల్టెన్సీ కేసుల్లో జైలు పాలైన కొందరు నిందితులు తిరిగి కంపెనీలు పెట్టి మోసం చేస్తున్నట్లు దర్యాప్తులో తేలింది.

ఇటీవల జరిగిన సంఘటనలివే..!

• నియొజెన్‌ సాఫ్ట్‌టెక్‌ సొల్యూషన్స్‌ పేరిట కంపెనీ ప్రారంభించి జూనియర్‌ డెవలపర్‌, సాఫ్ట్‌వేర్‌ ఇంజినీర్‌ జాబ్స్‌ ఇస్తామంటూ నిరుద్యోగుల నుంచి ఒక్కొక్కరి దగ్గర రూ.1 నుంచి రూ.2 లక్షల రూపాయలు వసూలు చేసి బోర్డు తిప్పేసింది.
• రెయిల్‌ వరల్డ్‌ ఇండియా ప్రైవేటు లిమిటెడ్‌ కంపెనీ ఒక్కో ఉద్యోగి దగ్గర రూ.40 నుంచి రూ.50వేలు వసూలు చేసి చేతులెత్తేసింది. ఇదే కంపెనీ గతంలో గచ్చిబౌలిలో మరో బ్రాంచ్‌ ఓపెన్‌ చేసి ఒక్కో ఉద్యోగి దగ్గర రూ.40వేలు వసూలు చేసింది. దేశవ్యాప్తంగా ఐదు బ్రాంచ్‌లు ఓపెన్‌ చేసి ఉద్యోగాలు ఇస్తామంటూ 800 మంది దగ్గర డబ్బలు వసూలు చేసి బోర్డు తిప్పేసింది.
• సినర్జీ యూనివర్సల్‌ కంపెనీ అనే సాఫ్ట్‌వేర్‌ సంస్థ వర్క్‌ ఫ్రం హోమ్‌ పేరిట వసూళ్లకు పాల్పడి రాత్రికి రాత్రే బోర్డు తిప్పేసింది.
• ఇన్నోహబ్‌ టెక్నాలజీస్‌ సంస్థ నిరుద్యోగుల నుంచి రూ.2 లక్షల చొప్పున రూ.16 కోట్లకు పైగా వసూలు చేసింది. సుమారు 800 మంది తాము మోసపోయామని గ్రహించి సంస్థపై పోలీసులకు ఫిర్యాదు చేశారు.
• ధన్యన్‌ ఐటీ టెక్నాలజీస్‌ ఒక్కొక్కరి వద్ద రూ.2 లక్షల చొప్పున సుమారు 200 మంది నుంచి రూ.4 కోట్లు వసూలు చేసి కంపెనీ మూసేశారు.
• గ్లోబల్‌ ఐటీ సొల్యూషన్స్‌ ఎమర్జింగ్‌ టెక్నాలజీలో ఉద్యోగాలు కల్పిస్తామంటూ 80 మంది దగ్గర రూ.కోటిన్నర వసూలు చేసి ఆరు నెలల శిక్షణ తర్వాత ఉద్యోగాలు ఇస్తామంటూ చెప్పి రాత్రికి రాత్రే బిచానా ఎత్తేసింది.
• సాఫ్ట్‌ సొల్యూషన్‌ ఐటీ కంపెనీ శిక్షణ, ల్యాప్‌టాప్‌, సెక్యూరిటీ డిపాజిట్‌ కింద ఒక్కొక్కరి దగ్గర రూ.2లక్షల చొప్పున 150 మంది దగ్గర రూ.3కోట్లు వసూలు చేసి ఉడాయించింది.