డిజిటల్‌ అరెస్ట్‌లతో.. నయా మోసం

డిజిటల్‌ అరెస్ట్‌ ఘటనలలో సైబర్‌నేరగాళ్లు నయా పంథాలో సుప్రీంకోర్టు పేరును వాడుతూ వృద్ధులు, రిటైర్డు ఉద్యోగులను బెంబేలెత్తిస్తూ అందినకాడికి దోచేస్తున్నారు. గత కొంత కాలంగా ఢిల్లీ, ముంబై పోలీసులు, సైబర్‌ పోలీసులు, సీబీఐ పేర్లతో బెదిరిస్తూ దోచేస్తూ వస్తున్న సైబర్‌నేరగాళ్లు ఇటీవల సుప్రీంకోర్టు పేరును విరివిగా వాడేస్తున్నారు.

• కోర్టు ఆదేశాలంటూ నకిలీ వారెంట్లు పంపిస్తూ..
• సుప్రీంకోర్టు, పోలీసు అధికారుల పేరును వాడేస్తున్న సైబర్‌చీటర్స్‌
• ఫోన్‌ కాల్స్‌తో బెంబేలెత్తుతున్న వృద్ధులు
• భయపడి రూ.కోట్లు పోగొట్టుకుంటున్న వైనం
• ఫోన్లలో కేసుల దర్యాప్తులుండవు… డబ్బుల ప్రస్తావన ఉండదు
• సైబర్‌నేరగాళ్ల ఎత్తులను ధైర్యంగా చిత్తుచేయండి
• అవగాహనతో డిజిటల్‌ మోసాలు తిప్పికొట్టండి
• రాచకొండ పోలీస్‌ కమిషనర్‌ సుధీర్‌బాబు

సిటీబ్యూరో, జూలై 6(నమస్తే తెలంగాణ): డిజిటల్‌ అరెస్ట్‌ ఘటనలలో సైబర్‌నేరగాళ్లు నయా పంథాలో సుప్రీంకోర్టు పేరును వాడుతూ వృద్ధులు, రిటైర్డు ఉద్యోగులను బెంబేలెత్తిస్తూ అందినకాడికి దోచేస్తున్నారు. గత కొంత కాలంగా ఢిల్లీ, ముంబై పోలీసులు, సైబర్‌ పోలీసులు, సీబీఐ పేర్లతో బెదిరిస్తూ దోచేస్తూ వస్తున్న సైబర్‌నేరగాళ్లు ఇటీవల సుప్రీంకోర్టు పేరును విరివిగా వాడేస్తున్నారు. ఓ పక్క సుప్రీంకోర్టు, మరో పక్క ఆర్‌బీఐ పేర్లను వాడడంతో ఆ రెండు అత్యున్నత సంస్థలు కావడంతో సీనియర్‌ సిటిజన్లు సైతం కొందరు సైబర్‌నేరగాళ్లు వేస్తున్న వలలో చిక్కుతున్నారు.

సుప్రీంకోర్టు పర్యవేక్షణలో తమపై వచ్చిన ఆరోపణలపై దర్యాప్తు జరుపుతారంటే తప్పకుండా తమకు న్యాయం జరుగుతుందనే అభిప్రాయంలోకి బాధితులు ఉంటున్నారు. సుప్రీంకోర్టు పేరు వాడటం, నకిలీ చీఫ్‌ జస్టిస్‌లను సృష్టించడంతోపాటు సుప్రీంకోర్టు నుంచి నోటీసులు జారీ అయ్యాయంటూ నకిలీ స్టాంప్‌లను వాడుతూ బాధితులను ఆ నకిలీ నోటీసులను పంపిస్తున్నారు. సుప్రీంకోర్టు పర్యవేక్షణలో కేసు విచారణ సాగడంతోపాటు అరెస్ట్‌ చేయడానికి వారెంట్‌ జారీ అవుతుందని, అరెస్ట్‌ కాకుండా ఉండాలంటే భారీ మొత్తంలో సెక్యూరిటీ డిపాజిట్‌ చేయాలంటూ అందులో ఆయా మొత్తాలను సైతం సైబర్‌నేరగాళ్లు పేర్కొంటున్నారు. తయారు చేసిన నకిలీ నోటీసులను వాట్సాప్‌లలో పంపిస్తూ ఇతరులెవరికైనా చూపిస్తే మీకే సమస్య వస్తుందంటూ భయభ్రాంతులకు గురిచేస్తున్నారు.

ఒక మనీలాండరింగ్‌, హ్యూమన్‌ ట్రాఫికింగ్‌, డ్రగ్స్‌ కేసులతో సంబంధాలున్నాయంటూ బెదిరింపులకు దిగుతున్నారు. ఈ కేసుల్లో నేరుగా సంబంధం లేకున్నా, మీ ఆధార్‌ను ఇతరులు వాడి ఫోన్‌ నంబర్‌ తీసుకున్నారని, ఆ నంబర్‌తోనే ఇదంతా జరిగిందంటూ సైబర్‌నేరగాళ్లు చెప్పుకుంటూ మీపై అనుమానం మాత్రమే ఉందని, మీరు మా విచారణకు సహకరించకపోతే వెంటనే అరెస్ట్‌ చేయాల్సి ఉంటుందని, మీకు ఈ కేసుతో ఏం సంబంధం లేదంటూ తేలితే మీరు ఈ కేసు నుంచి ఫ్రీ అవుతారంటూ మాయమాటలు చెబుతుంటారు. అప్పటి వరకు మీరు కొంత డబ్బును సుప్రీంకోర్టు, ఆర్బీఐ పర్యవేక్షణలోని బ్యాంకు ఖాతాల్లో డిపాజిట్‌ చేయాలని, విచారణ తరువాత ఆ డబ్బు మీకు తిరిగి వస్తుందంటూ నమ్మిస్తూ అందిన కాడికి వృద్ధులను సైబర్‌నేరగాళ్లు దోచుకుంటున్నారు.

సైబర్‌నేరగాళ్లు రోజురోజుకు కొత్త ఎత్తులు వేస్తూ ఇలాంటి మోసాలకు పాల్పడుతున్నారు. సైబర్‌నేరాల కట్టడికి, ప్రజల్లో అవగాహన తెచ్చేందుకు పోలీసులు పలు విధాల ప్రయత్నిస్తున్నా, కొందరు అవగాహన లేకపోవడంతో ఈజీగా సైబర్‌నేరగాళ్ల చేతిలో మోసపోతున్నారు. పరువు పోతుందనే భయంతో హడలిపోతూ నేరస్థుల చేతిలో కీలుబొమ్మలా మారుతున్నారు. కేసుల దర్యాప్తుల విషయంలో పోలీసులు ఎక్కడ కూడా డబ్బుల ప్రస్తావన తీసుకురారు, కోర్టులు సైతం నేరుగా ఇలాంటి కేసుల్లో జోక్యం చేసుకోవు. సమాజంలో జరుగుతున్న సైబర్‌నేరాలపై ప్రజలు అవగాహనతో ఉండటంతోనే ఇలాంటి ఘటనలకు చెక్‌ పెట్టవచ్చు.

భయం వీడండి.. ధైర్యంగా చర్చించండి

ఫోన్లలో విచారణ చేయడం, నోటీసులు పంపించి అరెస్ట్‌ చేయడమనేది ఉండదు. పోలీసులు ఎవరు కూడా డబ్బుల ప్రస్తావన తీసుకురారు. ఢిల్లీ, ముంబై, బెంగళూర్‌ పోలీసులమంటూ ఫోన్లు చేసి బెదిరిస్తే బెదరొద్దు.. ఎవరు కూడా వీడియో కాల్స్‌ చేసి పోలీసులమని చెప్పుకోరు. నకిలీ పోలీసులే హడావుడి చేస్తుంటారు. పోలీసులమంటూ చెప్పుకొని ఫోన్లలో బెదిరిస్తే వెంటనే బాధితులు స్థానిక పోలీసులను సంప్రదించండి. పోలీసులు ఎవరు కూడా బ్యాంకు ఖాతాల వివరాలు అడుగరు, ఫోన్లలో కేసుల విచారణలు జరుగవు, ఈ విషయాన్ని ప్రతి ఒక్కరు గుర్తించుకోవాలి.

మోసం చేసేందుకు సైబర్‌నేరగాళ్లు రకరకాల ఎత్తులు వేస్తుంటారు. ఎవరైనా పోలీసులమని, కోర్టు నుంచి అని ఫోన్లు చేస్తే ఫోన్లు కట్‌ చేసి వెంటనే స్థానిక పోలీసులను సంప్రదించండి. భయపడి డబ్బులు ఇవ్వొద్దు, బ్యాంకు ఖాతాల వివరాలు ఇవ్వొద్దు, ఎవరైనా ఫోన్‌ చేస్తే దైర్యంగా మాట్లాడండి.. వాట్సాఫ్‌లో ఫోన్‌ కాల్స్‌ వస్తే కట్‌ చేయండి. డిజిటల్‌ అరెస్ట్‌లుండవు, సైబర్‌నేరగాళ్లు రోజుకోరకంగా మోసాలకు పాల్పడుతున్నారు, అవగాహనతో ఇలాంటి మోసాలకు దూరంగా ఉండండి. మీకు ఇలాంటి ఫోన్‌ కాల్‌ వచ్చిందంటే వెంటనే మీకు తెలిసిన వారితో కుటుంబ సభ్యులతో చర్చించండి.

– రాచకొండ పోలీస్‌ కమిషనర్‌, సుధీర్‌బాబు

ఇటీవల నమోదైన కొన్ని కేసులు

• అమీర్‌పేట్‌కు చెందిన 77 ఏండ్ల వృద్ధుడికి పోలీసు యూనిఫామ్‌లో ఢిల్లీ నుంచి డీసీపీ రాజీవ్‌కుమార్‌ను మాట్లాడుతున్నానంటూ సైబర్‌ నేరగాడు ఫోన్‌లో మాట్లాడాడు. మీపై అరెస్ట్‌ వారెంట్‌ జారీ అయ్యిందని, మనీలాండరింగ్‌ కేసులో మీపై ఆరోపణలు వచ్చాయి, మీ ఆధార్‌కార్డు వాడారు, మీ బ్యాంకు ఖాతాలన్ని ఫ్రీజ్‌ చేయాలని సుప్రీంకోర్టు ఆర్డర్‌ ఇచ్చిందంటూ భయపెట్టించాడు. వాట్సాప్‌ కాల్‌లో మాట్లాడుతూ.. మిమ్మల్ని అరెస్ట్‌ చేయకుండా ఉండాలంటే మీ బ్యాంకు ఖాతాలు తనిఖీ చేసి సుప్రీంకోర్టు, ఆర్బీఐ పర్యవేక్షణలో వాటిని చేయాలని సూచిస్తూ వాట్సాప్‌లో నకిలీ నోటీసులు పంపించారు. దీంతో బెదిరిపోయిన బాధితుడు సైబర్‌ నేరగాళ్లు చెప్పినట్లు అతని ఖాతాలలో ఉన్న రూ.53 లక్షలు సైబర్‌నేరగాళ్ల ఖాతాలోకి బదిలీ చేసి మోసానికి గురయ్యాడు.
• మనీలాండరింగ్‌ కేసుతో మీకు సంబంధాలున్నాయని అనుమానాలున్నాయి, మిమ్మిల్ని అరెస్ట్‌ చేయాలని సుప్రీంకోర్టు వారెంట్‌ జారీ చేసింది, అయితే అరెస్ట్‌ కాకుండా ఉండాలంటే సుప్రీంకోర్టు ఆదేశాల మేరకు మీరు రూ.58లక్షలు సెక్యూరిటీ డిపాజిట్‌ చేసి దర్యాప్తునకు సహకరించాలని బెంగళూర్‌ పోలీసులు మాట్లాడుతున్నట్లు సైబర్‌నేరగాళ్లు సరూర్‌నగర్‌కు చెందిన ఓ రిటైర్డు ఎస్‌ఈని డిజిటల్‌ అరెస్ట్‌ చేసి రూ.58లక్షలు దోచేశారు. సుప్రీంకోర్టు నిర్ణయించిన మేరకే సెక్యూరిటీ డిపాజిట్‌ ఉందని, మీరు డిపాజిట్‌ చేసే డబ్బంతా ఆర్‌బీఐ నేతృత్వంలోనే ఖాతాలోనే ఉంటాయని, మీకు ఈ కేసుతో ఎలాంటి సంబంధంలేదని తేలిన వెంటనే మీ ఖాతాలోకి తిరిగి డిపాజిట్‌ అవుతాయంటూ నమ్మించి బాధితుడిని డిజిటల్‌ అరెస్ట్‌తో బెంబెలేత్తించిన సైబర్‌నేరగాళ్లు భారీ మోసానికి పాల్పడ్డారు.
• ఢిల్లీలో మీపై కేసు నమోదైంది, నేరుగా సుప్రీంకోర్టు పర్యవేక్షణలో ఈ కేసు విచారణ జరుగుతున్నది, సుప్రీంకోర్టు చీఫ్‌ జస్టిస్‌ వీడియో కాల్‌లోమిమ్మల్ని విచారిస్తాడంటూ ఈసీఐఎల్‌ ప్రాంతానికి చెందిన ఓ ప్రైవేట్‌ రిటైర్డు ఉద్యోగిని డిజిటల్‌ అరెస్ట్‌తో బెదిరించి రూ.1.34 కోట్లు సైబర్‌ నేరగాళ్లు దోచేశారు. మనీలాండరింగ్‌ కేసులో మీపై ఆరోపణలున్నాయి, ఢిల్లీ సీఐడీ పోలీసులు దర్యాప్తు జరుపుతున్నారంటూ ఫోన్‌ చేసిన సైబర్‌ నేరగాళ్లు, ఈ కేసును ప్రత్యేకంగా సుప్రీంకోర్టు పర్యవేక్షిస్తుందంటూ నమ్మించారు. మీరు విచారణకు సహకరించకపోతే వచ్చి అరెస్ట్‌ చేయాల్సి ఉంటుందని, సుప్రీంకోర్టు ఆదేశాలతో ఆర్‌బీఐ ఖాతాలోకి మీ బ్యాంకు ఖాతాల్లో ఉన్న డిపాజిట్లు అన్ని బదిలీ చేసి, మీ నిజాయితీని చాటుకోవాలని సైబర్‌నేరగాళ్లు సూచించారు. నకిలీ చీఫ్‌ జస్టిస్‌ను సృష్టించి వీడియో కాల్‌లో బాధితుడితో మాట్లాడించి.. మీ విచారణ త్వరగా పూర్తవుతుందని, మీ సెక్యూరిటీ డిపాజిట్లు తిరిగి వచ్చేస్తాయంటూ ఒక పక్క బాధితుడికి భరోసా ఇస్తున్నట్లు నటిస్తూ.. మరో పక్క ఖాతాలలో ఉన్న నగదంతా ఉడ్చేశారు.
• మానవ అక్రమ రవాణాకు సంబంధించి బెంగళూర్‌లోని అశోక్‌నగర్‌ పోలీస్‌స్టేషన్‌లో కేసు నమోదైందని, ఈ కేసు దర్యాప్తు జరుపుతుండగా.. మానవ అక్రమ రవాణాలో కీలక నిందితుడిగా ఉంటూ మనీలాండరింగ్‌ కేసులకు పాల్పడిన సధాకత్‌ఖాన్‌ పేరు బయటకు వచ్చిందని, అతడు వాడిన ఫోన్‌ నంబర్లకు మీ ఆధార్‌ను ఉపయోగించారని చెప్పుకొచ్చారు. ఈనేపథ్యంలో సీబీఐ ఈ కేసు దర్యాప్తు జరుపుతుండగా..మీపేరు వచ్చిందని, మీపై కేసు నమోదు చేశామంటూ సైబర్‌నేరగాళ్లు పోలీసుల పేరుతో ఉప్పల్‌కు చెందిన రిటైర్డు చీఫ్‌ సైంటిస్ట్‌ ఉద్యోగికి ఫోను చేశారు. ఈ కేసు డాక్యుమెంట్లు సుప్రీంకోర్టుకు అందజేశామని, ఆ డాక్యుమెంట్లతో సీబీఐతోపాటు సుప్రీంకోర్టు చీఫ్‌ జస్టిస్‌ కూడా మిమ్మల్ని విచారిస్తారంటూ నమ్మించారు. అయితే అరెస్ట్‌ చేయకుండా ఉండేందుకు సుప్రీంకోర్టు ఆదేశాలతో, ఆర్బీఐ ఆధ్వర్యంలోని బ్యాంకు ఖాతాల్లో నగదు డిపాజిట్‌ చేయాలంటూ సూచించారు. మీ బ్యాంకు ఖాతాలన్ని ససెస్‌మెంట్‌ చేసిన తరువాత మీ డబ్బు వచ్చేస్తుందని నమ్మించారు. లేకపోతే వెంటనే అరెస్ట్‌ చేస్తామంటూ బెదిరిస్తూ సుప్రీంకోర్టు, నకిలీ చీఫ్‌ జస్టిస్‌లను సృష్టించి బాధితుడి బ్యాంకు ఖాతాల్లో నుంచి రూ. 1.34 కోట్లు కొట్టేశారు.