Power Cuts | నిర్వహణ లోపం.. పదే పదే అంతరాయం.. గ్రేటర్‌లో విద్యుత్‌ సరఫరాపై ఫిర్యాదుల వెల్లువ

సరిపడా కరెంట్‌ ఉన్నా.. అంతరాయాలు లేకుండా విద్యుత్‌ సరఫరాను చేయడంలో విద్యుత్‌ శాఖ విఫలమవుతోంది. నిర్వహణ లోపం వల్లే పదే పదే వస్తున్న అంతరాయాలు విద్యుత్‌ వినియోగదారులను తీవ్ర ఇబ్బందులకు గురి చేస్తున్నాయి.

Power Cuts | సిటీబ్యూరో, సెప్టెంబర్‌ 13 (నమస్తే తెలంగాణ): సరిపడా కరెంట్‌ ఉన్నా.. అంతరాయాలు లేకుండా విద్యుత్‌ సరఫరాను చేయడంలో విద్యుత్‌ శాఖ విఫలమవుతోంది. నిర్వహణ లోపం వల్లే పదే పదే వస్తున్న అంతరాయాలు విద్యుత్‌ వినియోగదారులను తీవ్ర ఇబ్బందులకు గురి చేస్తున్నాయి. నిరంతరం నాణ్యమైన విద్యుత్‌ సరఫరా అందించాలంటే విద్యుత్‌ నెట్‌ వర్క్‌లో నిర్వహణ, మరమత్తులే అత్యంత కీలకం.

ఇప్పటికే వినియోగంలో ఉన్న విద్యుత్‌ నెట్‌వర్క్‌ల పనులు చేసేందుకు కాంట్రాక్టర్లను ఎంపిక చేసిన ఉన్నతాధికారులు.. వారు చేస్తున్న పనులపై సరిగా దృష్టి సారించడం లేదనే ఆరోపణలు ఉన్నాయి. డిపార్టుమెంట్‌కు సంబంధించిన పనులను కాంట్రాక్టర్లు మొక్కుబడిగా చేయడం వల్లే తరచూ సరఫరాలో అంతరాయాలకు కారణమవుతున్నట్లు వినియోగదారులు పేర్కొం టున్నారు.

నిత్యం క్షేత్ర స్థాయిలో ఉండి విద్యుత్‌ లైన్లను పర్యవేక్షించాలని ఉన్నతాధికారులు ఆదేశించినా.. కింది స్థాయి అధికారులు మాత్రం కాంట్రాక్టర్లతో కుమ్మక్కై చూసీ చూడనట్లు వ్యవహరిస్తున్నారన్న ఆరోపణలు ఉన్నాయి. దక్షిణ తెలంగాణ విద్యుత్‌ పంపిణీ సంస్థ (టీజీఎస్‌పీడీసీఎల్‌) నిర్వహించే ప్రముఖ సోషల్‌ మీడియా మాధ్యమం ఎక్స్‌ (ట్విట్టర్‌) వేదికగా గ్రేటర్‌ హైదరాబాద్‌ పరిధిలోని 10 ఆపరేషన్స్‌ సర్కిళ్లలో నిత్యం ఎక్కడో ఒకచోట నుంచి విద్యుత్‌ సరఫరా నిలిచిపోయిందనే ఫిర్యాదుల పోస్టులు చేస్తూనే ఉన్నారు.

రెండు రోజులుగా ట్విట్టర్‌లో.. వినియోగదారుల ఫిర్యాదులు

• చందానగర్‌లోని హుడా కాలనీలో విద్యుత్‌ సరఫరా లేదు. అర గంటకు పైగా విద్యుత్‌ సరఫరా నిలిచిపోయింది.
• మణికొండ పోచమ్మ కాలనీలో కరెంటు లేదు.
• రెండు గంటలకు పైగా విద్యుత్‌ సరఫరా లేదని సైబర్‌ సిటీ సర్కిల్‌ పరిధిలోని వినియోగదారుడు సిద్ధార్థ ప్రహరాజ్‌ ప్రశ్నించారు.
• గచ్చిబౌలిలో పవర్‌ కట్‌ ఉంది. వెంటనే సరఫరాను పునరుద్ధరించండి. ఇలా కరెంటు పోవడం రొటీన్‌గా మారిందని మహ్మద్‌ అహ్మద్‌ అనే వినియోగదారు వాపోయారు.
• హఫీజ్‌పేటలో పవర్‌ పోయి రెండు గంటలయ్యింది. ఇంకా రాలేదని శివ గాదే అనే వినియోగదారుడు పోస్టు చేశారు.
• హఫీజ్‌పేట ఎస్‌సీబీ నగర్‌, నల్లగండ్లలోని అపర్ణ ఆస్పత్రి సమీప ప్రాంతంలో గంట నుంచి విద్యుత్‌ సరఫరా లేదు.
• హైదర్‌నగర్‌ ప్రాంతంలో ఒక గంట నుంచి లోవోల్టేజీ ఉంది. ఇలా ట్విట్టర్‌ వేదికగా విద్యుత్‌ వినియోగదారులు ఫిర్యాదులు చేస్తున్నారు. ఇలాంటి ఫిర్యాదులను పది సర్కిళ్ల పరిధిలో పరిశీలిస్తే పదుల సంఖ్యలోనే ఉంటాయి. ఒక వైపు ప్రభుత్వం అంతరాయం లేకుండా నగరంలో విద్యుత్‌ సరఫరా చేస్తున్నామని చెబుతున్నా, సోషల్‌ మీడియా వేదికగా మాత్రం ఫిర్యాదులు వెల్లువలా వస్తూనే ఉన్నాయి.