ఆక్యుపెన్సీ లక్ష్యం 80%

నగరంలో సిటీ బస్సుల్లో ఆక్యుపెన్సీని పెంచేందుకు కసరత్తు మొదలైంది. వంద రోజుల ప్రణాళికతో ఆర్టీసీ జీహెచ్‌ఎంసీ అధికారులు చర్యలు మొదలుపెట్టారు. ఈనెల 16 నుంచి ప్రారంభమైన వందరోజుల

ఆర్టీసీలో వందరోజుల ప్రణాళిక
సెలవులు తీసుకోని వారికి ప్రతినెలా రూ.500 పారితోషికం
35 ప్రాంతాల్లో ఆర్టీసీ సెక్యూరిటీ కానిస్టేబుళ్లు
రోజుకు రూ.4 కోట్ల రాబడి టార్గెట్‌
కొత్త కాలనీలకు కూడా బస్‌లు ఆర్టీసీ జీహెచ్‌ఎంసీ

సిటీబ్యూరో, ఏప్రిల్‌ 19 (నమస్తే తెలంగాణ) : నగరంలో సిటీ బస్సుల్లో ఆక్యుపెన్సీని పెంచేందుకు కసరత్తు మొదలైంది. వంద రోజుల ప్రణాళికతో ఆర్టీసీ జీహెచ్‌ఎంసీ అధికారులు చర్యలు మొదలుపెట్టారు. ఈనెల 16 నుంచి ప్రారంభమైన వందరోజుల అభివృద్ధి ప్రణాళికలో భాగంగా 65 శాతం ఉన్న ఆక్యుపెన్సీని 80 శాతానికి పెంచడంపై దృష్టి సారించారు.

ఈ క్రమంలో మూడు నెలలు ఆర్టీసీ డ్రైవర్లు, కండక్టర్లు సెలవులు లేకుండా పని చేయాలని అధికారులు ఆదేశించారు. అయితే, ఈ మూడు నెలలు పాటు సెలవులు లేకుండా విధులు నిర్వహించిన డ్రైవర్లు, కండక్టర్లకు ప్రతినెలా రూ.500 చొప్పున నగదు బహుమతి ఇవ్వనున్నట్లు ఆర్టీసీ జీహెచ్‌ఎంసీ జోన్‌ ఎగ్జిక్యూటివ్‌ డైరెక్టర్‌ ఈ.యాదగిరి తెలిపారు. నగరంలో సిటీ బస్సులతో రోజూ రూ.4 కోట్ల వరకు ఆదాయం వచ్చే విధంగా చర్యలు చేపడుతున్నారు. అందులో భాగంగా అనేక కార్యక్రమాలను రూపొందించారు.

 

ముఖ్యమైన నిర్ణయాలు ఇలా ఉన్నాయి..

1. ఎక్స్‌ప్రెస్‌ బస్సుల పెంపు. వేసవి సెలవుల కారణంగా నగరంలో ఆర్డినరీ బస్సులను తగ్గించి ఎక్స్‌ప్రెస్‌ బస్సులను నడిపిస్తున్నారు.
2. విద్యా సంస్థలకు సెలవులు ప్రకటిస్తున్న నేపథ్యంలో ఈ నిర్ణయం
   తీసుకున్నారు.
3. ప్రస్తుతం 65 శాతం నుంచి 70 శాతం వరకు నమోదవుతున్న ఆక్యుపెన్సీ నిష్పత్తిని 80 శాతానికి పెంచనున్నారు.
4. నగరంలో 35 ప్రధాన ప్రాంతా ల్లో ఆర్టీసీ బస్సులకు కలిగే ఆటంకాలను నిరోధించేందుకు ఆర్టీసీ విభాగానికి చెందిన కానిస్టేబుళ్లను నియమిస్తున్నారు. ప్రతి రోజూ రెండు షిఫ్టుల్లో పనిచేస్తారు.
5. 29 బస్‌ డిపోల పరిధిలో ఉన్న మేనేజర్లు, సూపర్‌వైజర్లు ఉదయం, మధ్యాహ్నం పర్యటించి బస్టాపుల్లో ఉన్న పరిస్థితులను పరిశీలించి తగిన చర్యలు తీసుకోవాలి. ప్రతి రోజూ ఆరు మార్గాల్లో బస్సులను తనిఖీ చేస్తారు. అదనంగా వాహనాలులేకుండా మరో నాలుగు స్క్వాడ్‌ బృందాలు బస్సుల్లో టిక్కెట్‌ చెకింగ్‌ చేస్తారు.
6. మహిళలు, ఉద్యోగుల కోసం ప్రత్యేకంగా మూడు రూట్లలో మూడు స్పెషల్‌ బస్సులు నియమించారు.
7. ప్రతి రోజూ ఉదయం డిపోల నుంచి బస్‌లు బయలుదేరుతాయి. ప్రయాణికుల సౌకర్యార్థం అర్ధరాత్రి దాటిన తర్వాత కూడా తిరుగుతాయి.
8. కొత్త కాలనీలు ఏర్పాటవుతున్న నేపథ్యంలో ఆయా మార్గాల్లో సర్వే చేసి బస్సులు నడుపుతున్నారు. రద్దీగా ఉండే మార్గాల్లో అదనపు బస్సులు ఏర్పాటు చేసే అంశాలను పరిశీలిస్తున్నారు.
9. వివాహాలు, విందులు, వినోదాల, టెంపుల్‌ పర్యటన వంటి వాటి కోసం బస్సులను ప్రత్యేకంగా బుక్‌ చేసుకునే సౌకర్యం కల్పించారు. స్పెషల్‌ బస్సుల బుకింగ్‌ వల్ల ప్రయాణికులకు చార్జీలలో 15 శాతం డిస్కౌంట్‌
   కల్పిస్తున్నారు.
10. ఈ విధంగా రోజుకూ రూ.4 నాలుగు కోట్ల వరకు ఆదాయం వచ్చే విధంగా ప్రణాళికలు రూపొందించారు.