Rice | బ‌రువు పెరుగుతామ‌నే భ‌యంతో అన్నాన్ని పూర్తిగా మానేయాల్సి ప‌నిలేదు.. ఏం చేయాలంటే..?

కొంతమంది బరువు తగ్గాలనే ఉద్దేశంతో అన్నాన్ని పూర్తిగా మానేస్తుంటారు. అయితే తరతరాలుగా భారతీయుల ఆహారంలో భాగంగా ఉన్న బియ్యానికి భయపడాల్సిన అవసరం లేదని, సరైన పరిమాణంలో తీసుకుంటే అది ఆరోగ్యకరమైన సమతుల్య ఆహారంలో భాగమవుతుందని పోషకాహార నిపుణులు చెబుతున్నారు.

Rice | కొంతమంది బరువు తగ్గాలనే ఉద్దేశంతో అన్నాన్ని పూర్తిగా మానేస్తుంటారు. అయితే తరతరాలుగా భారతీయుల ఆహారంలో భాగంగా ఉన్న బియ్యానికి భయపడాల్సిన అవసరం లేదని, సరైన పరిమాణంలో తీసుకుంటే అది ఆరోగ్యకరమైన సమతుల్య ఆహారంలో భాగమవుతుందని పోషకాహార నిపుణులు చెబుతున్నారు. ఆహారాన్ని పూర్తిగా మానేయడం కంటే సమతుల్యంగా తీసుకోవడమే ఆరోగ్యానికి మేలు చేస్తుందని సూచిస్తున్నారు. బియ్యం ప్రపంచవ్యాప్తంగా అత్యంత విస్తృతంగా వినియోగించే ప్రధాన ధాన్యాల్లో ఒకటి. ఇందులో శరీరానికి అవసరమైన 15కుపైగా ముఖ్యమైన పోషకాలు లభిస్తాయి. బి-విటమిన్లు (థయామిన్‌, నియాసిన్‌, విటమిన్ బి6), మెగ్నీషియం, ఫాస్ఫరస్‌, సెలీనియం వంటి ఖనిజాలతోపాటు కార్బోహైడ్రేట్లు కూడా సమృద్ధిగా ఉంటాయి. ఇవి శరీరానికి ప్రధాన శక్తి వనరులుగా పనిచేస్తాయి.

శ‌రీరానికి స్థిరంగా శ‌క్తి..

బియ్యంలో ఉండే సంక్లిష్ట కార్బోహైడ్రేట్లు (కాంప్లెక్స్‌ కార్బోహైడ్రేట్స్‌) నెమ్మదిగా జీర్ణమవుతాయి. దీంతో శరీరానికి శక్తి క్రమంగా విడుదల అవుతుంది. ఇది ఎక్కువసేపు ఉత్సాహంగా ఉండేందుకు, ఆకలి త్వరగా వేయకుండా ఉండేందుకు సహాయపడుతుంది. శుద్ధి చేసిన చక్కెరలు అధికంగా ఉండే ఆహారాల మాదిరిగా ఒక్కసారిగా శక్తి పెరిగి వెంటనే తగ్గిపోవడం (ఎనర్జీ క్రాష్‌) జరగకుండా రోజంతా స్థిరమైన శక్తిని అందించడంలో బియ్యం ఉపయోగపడుతుంది. అలాగే ఏకాగ్రతను మెరుగుపరచడంలో కూడా తోడ్పడుతుంది. గ్లూటెన్‌కు అలెర్జీ లేదా సున్నితత్వం ఉన్నవారికి బియ్యం మంచి ప్రత్యామ్నాయం. గోధుమ, బార్లీ, రై వంటి ధాన్యాల్లో ఉండే గ్లూటెన్‌ కొందరిలో జీర్ణ సంబంధ సమస్యలను కలిగిస్తుంది. అయితే బియ్యంలో సహజంగానే గ్లూటెన్‌ ఉండదు. అందువల్ల గ్లూటెన్‌-రహిత ఆహారం తీసుకోవాల్సిన వారు కూడా బియ్యంతో తయారయ్యే అనేక రకాల వంటకాలను ఎలాంటి ఇబ్బంది లేకుండా ఆస్వాదించవచ్చు.

ఇలా తీసుకోవాలి..

అంతేకాకుండా బియ్యం అందుబాటు ధరలో లభించే ఆహార పదార్థం. ప్రపంచంలోని చాలా దేశాల్లో సులభంగా ల‌భిస్తుంది. ఇతర కొన్ని ఆహారాలతో పోలిస్తే వండడం కూడా సులభం, తక్కువ ఖర్చుతో కూడుకున్నది. అయితే బియ్యం ఆరోగ్యకరమైన ఆహారంలో భాగమవ్వాలంటే పరిమిత మోతాదులో తీసుకోవడం, దానితో పాటు పప్పులు, కూరగాయలు, ప్రోటీన్‌ పదార్థాలు కలిపి సమతుల్యంగా భోజనం చేయడం అవసరం. కేవలం అన్నం మాత్రమే ఎక్కువగా తినడం కాకుండా సమతుల్య ఆహారంలో భాగంగా తీసుకుంటే ఆరోగ్యానికి మేలు జరుగుతుందని నిపుణులు సూచిస్తున్నారు.