మెట్లు ఎక్కితే.. షుగర్‌ దిగుతుంది!

రక్తంలో చక్కెర స్థాయులను నియంత్రించడంలో.. నడక కీలకపాత్ర పోషిస్తుంది. భోజనం తర్వాత 15-20 నిమిషాలు నడిస్తే.. షుగర్‌ లెవెల్స్‌ కంట్రోల్‌లో ఉంటాయి.

రక్తంలో చక్కెర స్థాయులను నియంత్రించడంలో.. నడక కీలకపాత్ర పోషిస్తుంది. భోజనం తర్వాత 15-20 నిమిషాలు నడిస్తే.. షుగర్‌ లెవెల్స్‌ కంట్రోల్‌లో ఉంటాయి. అయితే, నడక కోసం 15-20 నిమిషాలు కూడా కేటాయించలేని వారికి సరికొత్త పరిష్కారం చూపుతున్నారు నిపుణులు.

ఒక్క నిమిషం మెట్లు ఎక్కితే.. రక్తంలో చక్కెర స్థాయులను తగ్గించవచ్చని చెబుతున్నారు. 2024లో జరిగిన ఒక అధ్యయనంలో.. కొందరితో ఒక నిమిషం, మూడు, పది నిమిషాలపాటు మెట్లు ఎక్కడం, దిగడం లాంటి స్వల్పకాలిక ఎక్సర్‌సైజ్‌లు చేయించారు. ఇందులో భాగంగా, మిశ్రమ భోజనం తిన్న తర్వాత వారితో వ్యాయామం చేయాలని చెప్పారు. ఆ తర్వాత వారి రక్తంలో చక్కెర స్థాయులను పరిశీలించారు. కేవలం 60 సెకన్లపాటు మెట్లు ఎక్కడం వల్ల.. భోజనం తర్వాత రక్తంలో చక్కెర 14 ఎంజీ/డీఎల్‌ తగ్గినట్లు గుర్తించారు. అదే మూడు నిమిషాలపాటు మెట్లు ఎక్కితే.. చక్కెర స్థాయులు 18 ఎంజీ/డీఎల్‌ వద్ద ఉన్నట్లు కనుగొన్నారు.

• వారిలో ఇన్సులిన్‌ స్థాయులు కూడా తగ్గినట్లు వెల్లడించారు. నేషనల్‌ ఇనిస్టిట్యూట్‌ ఆఫ్‌ హెల్త్‌లో ప్రచురితమైన ఈ అధ్యయనంలో మెట్లు ఎక్కడం వల్ల కలిగే ఆరోగ్య ప్రయోజనాలను వివరించారు.
• మెట్లు ఎక్కినప్పుడు కాళ్ల కండరాలు గట్టిగా సంకోచిస్తాయి. అప్పుడు రక్తం నుంచి అధిక మొత్తంలో గ్లూకోజ్‌ బయటికి వస్తుంది.
• భోజనం తర్వాత పెరిగే చక్కెర స్థాయులు రక్త నాళాలను దెబ్బతీస్తాయి. దాంతో, కాలక్రమేణా అవి వాపునకు గురవుతాయి. దీర్ఘకాలంలో అలసటతోపాటు ఇతర ఆరోగ్య సమస్యలకూ దారితీస్తాయి. అదే.. భోజనం తర్వాత మెట్లు ఎక్కడంలాంటి వ్యాయామం చేస్తే.. ఆరోగ్యానికి భరోసా దక్కుతుంది.
• భోజనం ముగించిన వెంటనే.. మొదటి 10 నిమిషాల్లోపు వ్యాయామం ప్రారంభించాలి.
• కనీసం ఒకటి నుంచి మూడు నిమిషాలపాటు మెట్లు ఎక్కడం లేదా దిగడం అలవాటు
  చేసుకోవాలి.
• ఈ తరహా వ్యాయామానికి కొత్త అయితే.. నెమ్మదిగా మొదలుపెట్టాలి. వేగంగా మెట్లు ఎక్కితే.. కడుపులో ఇబ్బంది కలిగే అవకాశం ఉంటుంది. మెల్లిమెల్లిగా వేగాన్ని పెంచుకుంటూ వెళ్లాలి.
• ఇంట్లో ఉన్నప్పుడే కాదు.. ఆఫీస్‌ లంచ్‌ సమయంలోనూ ఈ వ్యాయామం చేసుకోవచ్చు.
• మంచి ఫలితాల కోసం.. మెట్లు ఎక్కడంతోపాటు దిగడంపైనా దృష్టి పెట్టాలి.