Mental Health | మానసిక ఆరోగ్యాన్ని ప్రభావితం చేసే 5 పోషక లోపాలు.. ఈ లక్షణాలను అస్సలు నిర్లక్ష్యం చేయొద్దు

మానసిక ఆరోగ్యంపై ఒత్తిడి, నిద్ర, హార్మోన్లు, పోషకాహారం వంటి అనేక అంశాలు ప్రభావం చూపుతాయి. తరచూ మూడ్‌లో మార్పులు, ఏకాగ్రత లోపించడం లేదా నిద్రకు సంబంధించిన సమస్యలు కనిపిస్తే, వాటి వెనుక ఏదైనా ఆరోగ్య సమస్య ఉండే అవకాశం ఉంటుంది. అందువల్ల ఎక్కువ కాలం కొనసాగే లక్షణాలను నిర్లక్ష్యం చేయకుండా అవసరమైనప్పుడు వైద్య సలహా తీసుకోవడం చాలా ముఖ్యం.

Mental Health | మానసిక ఆరోగ్యంపై ఒత్తిడి, నిద్ర, హార్మోన్లు, పోషకాహారం వంటి అనేక అంశాలు ప్రభావం చూపుతాయి. తరచూ మూడ్‌లో మార్పులు, ఏకాగ్రత లోపించడం లేదా నిద్రకు సంబంధించిన సమస్యలు కనిపిస్తే, వాటి వెనుక ఏదైనా ఆరోగ్య సమస్య ఉండే అవకాశం ఉంటుంది. అందువల్ల ఎక్కువ కాలం కొనసాగే లక్షణాలను నిర్లక్ష్యం చేయకుండా అవసరమైనప్పుడు వైద్య సలహా తీసుకోవడం చాలా ముఖ్యం. పోషకాహార నిపుణురాలు దీపశిఖా జైన్ పోషకాల లోపాలు, మానసిక ఆరోగ్యం మధ్య ఉండే సంబంధాన్ని వివరించారు. కొన్ని విటమిన్లు, ఖనిజాల స్థాయిలు తక్కువగా ఉండడం వల్ల ఆందోళన, తక్కువ మూడ్, బ్రెయిన్ ఫాగ్, నిద్రలేమి, చిరాకు వంటి లక్షణాలతో సంబంధం ఉంటుంద‌ని ఆమె పేర్కొన్నారు.

ఆందోళ‌న‌, డిప్రెష‌న్‌..

తరచూ ఇలాంటి లక్షణాలు కనిపిస్తే వాటిని నిర్లక్ష్యం చేయవద్దని దీపశిఖా జైన్ సూచించారు. అవసరమైన పోషకాల స్థాయిలను పరీక్షించుకుని, లోపాలు ఉన్నట్లు గుర్తిస్తే వాటిని సరిదిద్దే దిశగా చర్యలు తీసుకోవాలని ఆమె సూచించారు. ఆమె వివరించిన లక్షణాల్లో మొదటిది ఆందోళన. మెగ్నిషియం, విటమిన్ బి6 స్థాయిలు తక్కువగా ఉండడం ఆందోళన భావనలతో సంబంధం కలిగి ఉంటుంద‌ని దీపశిఖా జైన్ చెప్పారు. అయితే ఆందోళనకు అనేక కారణాలు ఉంటాయ‌ని, పోషకాల లోపం వాటిలో ఒక కారణం మాత్రమే అవుతుంద‌ని గుర్తుంచుకోవాలి. రెండోది డిప్రెషన్. డిప్రెషన్ గురించి మాట్లాడుతూ విటమిన్ డి3, విటమిన్ బి12 లోపాలతో పాటు పేగుల్లోని సమతుల్యతలో మార్పులను కూడా పరిగణనలోకి తీసుకోవచ్చని ఆమె పేర్కొన్నారు.

బ్రెయిన్ ఫాగ్‌, నిద్ర‌లేమి, చిరాకు..

మూడోది బ్రెయిన్ ఫాగ్. ఏకాగ్రత కుదరకపోవడం, స్పష్టంగా ఆలోచించడంలో ఇబ్బంది పడడం వంటి లక్షణాలను బ్రెయిన్ ఫాగ్‌గా పేర్కొంటారు. తక్కువ ఈస్ట్రోజెన్ స్థాయిలు, విటమిన్ బి12 లోపం, ఒమెగా 3 తక్కువగా తీసుకోవడం వంటి అంశాలు ఈ లక్షణాలతో సంబంధం కలిగి ఉంటాయ‌ని పోషకాహార నిపుణురాలు తెలిపారు. నాలుగోది నిద్రలేమి. నిద్రకు సంబంధించిన సమస్యల విషయంలో మెగ్నిషియం, మెలటోనిన్, విటమిన్ బి12 స్థాయిలతో సంబంధం ఉండే అవకాశం ఉందని ఆమె వివరించారు. ఐదోది తరచూ చిరాకు రావడం. తరచూ చిరాకు లేదా మూడ్‌లో మార్పులు కనిపించడానికి తక్కువ ఈస్ట్రోజెన్ స్థాయిలు, విటమిన్ బి12 లోపం, మెగ్నిషియం స్థాయిలు వంటి అంశాలు సంబంధం కలిగి ఉంటాయ‌ని దీపశిఖా జైన్ పేర్కొన్నారు.

అయితే ఈ లక్షణాలు కనిపించాయని మాత్రమే విటమిన్ లేదా ఇతర పోషకాల లోపం ఉన్నట్లు నిర్ధారించలేరు. ఆందోళన, డిప్రెషన్, నిద్ర సమస్యలు లేదా మానసిక ఆరోగ్యంలో ఇతర మార్పులు నిరంతరం కొనసాగుతున్నట్లయితే, సరైన పరీక్షలు, వైద్యపరమైన అంచనా కోసం ఆరోగ్య నిపుణులను సంప్రదించడం అవ‌స‌రం.