Sperm Cells | మీలో వీర్య క‌ణాలు వీక్‌గా ఉన్నాయా? అయితే ఈ ఆహారం తీసుకోండి..!

Sperm Cells | ఆరోగ్యం కోసం స్త్రీ పురుషులిద్దరూ ఒకే రకమైన ఆహారం తీసుకోవడం వల్ల ఒకే రకమైన ప్రయోజనం ఉండకపోవచ్చని నిపుణులు పేర్కొంటున్నారు. శరీరం తన విధులు సక్రమంగా నిర్వర్తించడానికి స్త్రీలకు, పురుషులకు వేర్వేరు

ఆరోగ్యం కోసం స్త్రీ పురుషులిద్దరూ ఒకే రకమైన ఆహారం తీసుకోవడం వల్ల ఒకే రకమైన ప్రయోజనం ఉండకపోవచ్చని నిపుణులు పేర్కొంటున్నారు. శరీరం తన విధులు సక్రమంగా నిర్వర్తించడానికి స్త్రీలకు, పురుషులకు వేర్వేరు పోషకాలున్న ఆహారాలు అవసరం. ఎందుకంటే ఆడ, మగ.. ఎవరి ఆరోగ్య సమస్యలు వారికి ఉంటాయి. శరీర నిర్మాణంలోనూ తేడా ఉంటుంది. పురుషుల కండరాల ద్రవ్యరాశి (మజిల్‌ మాస్‌) స్త్రీల కంటే ఎక్కువ. కాబట్టి పురుషులు మాంసకృత్తులు ఎక్కువగా ఉన్న ఆహారం తీసుకోవాలి. మహిళలతో పోలిస్తే ఎక్కువ క్యాలరీలు ఉన్న భోజనం అవసరమవుతుంది. మాంసకృత్తులు ఎక్కువ అవసరం కాబట్టి, అవి శరీరంలో కలిసిపోవడానికి కొన్ని అదనపు విటమిన్లు, ఖనిజ లవణాలు ఉన్న పదార్థాలను పళ్లెంలో భాగం చేసుకోవాలి.

1. పాలకూర
   ఫోలెట్‌తో సమృద్ధమైన పాలకూర రక్త ప్రవాహాన్ని మెరుగుపరుస్తుంది. పురుషుల లైంగిక విధుల్లో ఫోలిక్‌ ఆమ్లానిది కీలకపాత్ర. రక్తంలో ఫోలిక్‌ ఆమ్ల స్థాయులకు, అంగస్తంభనకు మధ్య సంబంధం ఉందని ఒక అధ్యయనంలో తేలింది. అయితే రోజువారీ ఫోలెట్‌ అవసరంలో దాదాపు 77 శాతం ఒక కప్పు పాలకూరతో తీరిపోతుంది. దీనివల్ల శరీరానికి తగినంత మెగ్నీషియం కూడా లభిస్తుంది. ఇది రక్త ప్రవాహాన్ని మెరుగుపరుస్తుంది. టెస్టోస్టిరాన్‌ను ప్రేరేపిస్తుంది.

1. అవకాడో
   విటమిన్‌-ఇతో సమృద్ధం. ఇది పురుషుల్లో వీర్యకణాల నాణ్యతను మెరుగుపరుస్తుంది. ఓ మోస్తరు అవకాడో రోజువారీ విటమిన్‌-ఇ అవసరాల్లో 21 శాతం మేర తీరుస్తుంది. రోజువారీ జింక్‌ అవసరాల్లో 9 శాతం వరకు అందిస్తుంది. పురుషుల్లో వీర్యకణాల నాణ్యత, టెస్టోస్టిరాన్‌ ఉత్పత్తి, లైంగిక సామర్థ్యం మెరుగుపడటంలో అత్యవసరమైన ఖనిజ లవణం జింక్‌. అవకాడోలో ఉన్న మోనోశాచురేటెడ్‌ ఫ్యాట్‌ శరీరంలో పేరుకు పోయిన చెడు కొలెస్ట్రాల్‌కు వ్యతిరేకంగా పోరాడుతుంది.

1. క్యారెట్‌
   వీర్యకణాల నాణ్యత మెరుగుపరుచుకోవాలంటే క్యారెట్లు ఎక్కువగా తినాల్సిందే. సంప్రదాయ వైద్యంలో కూడా పురుషుల వంధ్యత్వ సమస్యలకు క్యారెట్లను సిఫార్సు చేస్తారు. క్యారెట్లలో అధికంగా ఉండే కెరోటినాయిడ్‌ కారణంగా వీర్యకణాల సంఖ్య వృద్ధి చెందడమే కాదు, వాటి కదలిక కూడా చురుగ్గా ఉంటుంది. క్యారెట్లలో నారింజ రంగుకు కారణమయ్యే యాంటీ ఆక్సిడెంట్లే.. కెరోటినాయిడ్స్‌. వీటివల్ల ఇతర ఆరోగ్య ప్రయోజనాలు కూడా ఉన్నాయి. క్యారెట్లు ఎక్కువగా తినే పురుషుల్లో వీర్యకణాల పనితీరు ఎనిమిది శాతం వరకూ ఎక్కువగా ఉంటుంది. శరీరం విటమిన్‌-ఎ తయారు చేసుకోవడానికి కెరోటినాయిడ్లు దోహదపడతాయి.

మయూరి ఆవుల
న్యూట్రిషనిస్ట్‌ ,Mayuri@trudiet.in