Visit:
Ovarian Cancer | అండాశయ క్యాన్సర్ నిర్ధారణ అయిన మహిళలకు శస్త్రచికిత్స చేయాలా, కీమోథెరపీ అవసరమా, చికిత్స తర్వాత కోలుకునే అవకాశాలు ఎలా ఉన్నాయి అనే ప్రశ్నలు సాధారణంగా ఎదురవుతుంటాయి. అయితే ప్రస్తుతం మరో ముఖ్యమైన అంశం కూడా వైద్య రంగంలో ప్రాధాన్యం సంతరించుకుంటోంది. అదే.. కణితిలోని జన్యు లక్షణాలు ఆ క్యాన్సర్కు ఏ చికిత్స మెరుగ్గా పనిచేస్తుందో తెలుసుకోవడంలో ఎంతవరకు సహాయపడతాయన్నది. జన్యు పరీక్ష అంటే కేవలం వారసత్వంగా క్యాన్సర్ వచ్చే ప్రమాదం ఉందా లేదా తెలుసుకోవడం మాత్రమే కాదు. కణితి ఎలా ప్రవర్తించే అవకాశం ఉందో, అలాగే నిర్దిష్ట చికిత్స వల్ల రోగికి ప్రయోజనం కలిగే అవకాశాలు ఉన్నాయా అనే విషయాన్ని అంచనా వేయడంలోనూ ఈ పరీక్ష కీలక పాత్ర పోషిస్తుంది. అండాశయ క్యాన్సర్ ఒకే జన్యువులో వచ్చే మార్పు వల్ల ఏర్పడే వ్యాధి కాదు. వివిధ కణితుల్లో భిన్నమైన పరమాణు లక్షణాలు కనిపిస్తాయి. ఈ లక్షణాలు రోగికి ఎలాంటి చికిత్స అందించాలనే నిర్ణయంపై ప్రభావం చూపుతాయి.
అండాశయ క్యాన్సర్లో గుర్తించే ముఖ్యమైన జన్యు మార్పుల్లో బీఆర్సీఏ1, బీఆర్సీఏ2 జన్యువులు ఉన్నాయి. దెబ్బతిన్న డీఎన్ఏకు మరమ్మత్తు చేయడంలో ఈ జన్యువులు కీలక పాత్ర పోషిస్తాయి. వీటిలో హానికరమైన మార్పులు ఏర్పడితే క్యాన్సర్ కణాలు దెబ్బతిన్న డీఎన్ఏను సరిచేసుకునే సామర్థ్యాన్ని కోల్పోయే అవకాశం ఉంటుంది. జన్యు పరీక్ష ద్వారా శరీరంలోని అన్ని కణాల్లో ఉండే వారసత్వ జన్యు మార్పులను గుర్తించవచ్చు. మరోవైపు, కణితిపై చేసే పరీక్ష ద్వారా కణితి అభివృద్ధి చెందుతున్న సమయంలో ఏర్పడిన జన్యు మార్పులను గుర్తిస్తారు. ఏ పరీక్ష చేయాలన్నది అనేక అంశాలపై ఆధారపడి ఉంటుంది. ఈ పరీక్షల ఫలితాలు రోగిపైనే కాకుండా కుటుంబ సభ్యులపైనా ప్రభావం చూపే అవకాశం ఉంది. వారసత్వంగా వచ్చే జన్యు మార్పు గుర్తిస్తే, కుటుంబంలోని ఇతర సభ్యులు కూడా జన్యు పరీక్షలు, సంబంధిత సలహాలు తీసుకోవాల్సి వస్తుంది. జన్యు పరీక్ష ద్వారా లభించే సమాచారం చికిత్స ఎంపికలో కీలకంగా మారుతుంది. క్యాన్సర్ కణాల్లో డీఎన్ఏ మరమ్మత్తు వ్యవస్థలో లోపాలను లక్ష్యంగా చేసుకుని పనిచేసే మందుల్లో పీఏఆర్పీ నిరోధకాలు ముఖ్యమైనవి. కణితిలో బీఆర్సీఏ జన్యు మార్పు లేదా డీఎన్ఏ మరమ్మత్తుకు సంబంధించిన సమాన లోపం ఉంటే, క్యాన్సర్ కణాల్లో డీఎన్ఏను సరిచేసే వ్యవస్థ ఇప్పటికే బలహీనంగా ఉంటుంది. ఈ పరిస్థితిలో మరో మరమ్మత్తు మార్గాన్ని పీఏఆర్పీ నిరోధకాలతో అడ్డుకుంటే క్యాన్సర్ కణాలు జీవించలేని పరిస్థితి ఏర్పడుతుంది.
ముఖ్యంగా బీఆర్సీఏ జన్యు మార్పు ఉన్న కొన్ని రకాల అధునాతన అండాశయ క్యాన్సర్ల చికిత్సలో పీఏఆర్పీ నిరోధకాలు గణనీయమైన మార్పు తీసుకొచ్చాయి. అయితే బీఆర్సీఏ జన్యు మార్పు లేకపోయినా, డీఎన్ఏ మరమ్మత్తు వ్యవస్థలో ఇతర లోపాలు ఉన్న కొంతమంది రోగులు కూడా ఈ చికిత్సకు స్పందించే అవకాశం ఉన్నట్లు వైద్యపరంగా నిర్ధారించారు. అండాశయ క్యాన్సర్ జన్యు పరీక్షల్లో బీఆర్సీఏ1, బీఆర్సీఏ2 జన్యువులు ఇప్పటికీ ముఖ్యమైనవే అయినప్పటికీ, ప్రస్తుతం పరీక్షలు ఒక్క ఈ రెండు జన్యువులకే పరిమితం కావడం లేదు. అనేక జన్యువులను ఒకేసారి పరిశీలించే విస్తృత పరీక్షలను కూడా ఉపయోగిస్తున్నారు. డీఎన్ఏ దెబ్బతినడం, వారసత్వంగా వచ్చే క్యాన్సర్ల ప్రమాదంతో సంబంధం ఉన్న ఇతర జన్యువుల్లో కూడా వైద్యపరంగా ముఖ్యమైన మార్పులు ఉండే అవకాశం ఉంది. 2026లో వారసత్వ రొమ్ము, అండాశయ క్యాన్సర్లతో బాధపడుతున్న రోగులపై నిర్వహించిన ఒక అధ్యయనంలో బీఆర్సీఏ జన్యువులతోపాటు పీఏఎల్బీ2, సీహెచ్ఈకే2 వంటి ఇతర జన్యువుల్లోనూ మార్పులు ఉన్నట్లు గుర్తించారు. దీనివల్ల కేవలం బీఆర్సీఏ జన్యువులను మాత్రమే పరీక్షిస్తే, చికిత్సపరంగా ముఖ్యమైన మరికొన్ని జన్యు మార్పులను గుర్తించలేకపోయే అవకాశం ఉందని స్పష్టమవుతోంది.
అయితే విస్తృతంగా నిర్వహించే జన్యు పరీక్షల్లో గుర్తించే ప్రతి మార్పు చికిత్సలో మార్పు చేయాల్సిన అవసరం ఉందని అర్థం కాదు. కొన్ని జన్యు మార్పుల ప్రభావం వైద్యపరంగా స్పష్టంగా తెలియదు. మరికొన్ని జన్యు మార్పులు భవిష్యత్తులో క్యాన్సర్ వచ్చే ప్రమాదాన్ని మాత్రమే సూచిస్తాయి. ప్రస్తుతం ఉన్న క్యాన్సర్కు ఎలాంటి చికిత్స ఇవ్వాలనే విషయంపై అవి ప్రభావం చూపవు. జన్యు పరీక్షను భవిష్యత్తును కచ్చితంగా చెప్పే పరీక్షగా రోగులు భావించకూడదు. బదులుగా, రోగికి సరిపోయే చికిత్సను ఎంచుకోవడానికి అవసరమైన అదనపు సమాచారాన్ని అందించే సాధనంగా చూడాలి. పరీక్ష ఫలితాల ఆధారంగా వైద్య బృందం నిర్వహణ చికిత్స, లక్ష్యిత చికిత్స లేదా కుటుంబ సభ్యులకు జన్యు సలహాలు వంటి వివిధ మార్గాలను పరిశీలిస్తారు. రోగి కణితిలో ప్రత్యేకమైన లక్షణాలు ఉన్నాయా, వాటిని చికిత్సలో అనుకూలంగా ఉపయోగించుకునే అవకాశం ఉందా అనే విషయాన్ని అర్థం చేసుకోవడానికి ఈ పరీక్షలు సహాయపడతాయి.
ముఖ్యంగా చికిత్స ప్రారంభ దశలోనే జన్యు పరీక్షను పరిగణనలోకి తీసుకోవడం అవసరం. ఇతర చికిత్సా మార్గాలన్నీ ప్రయత్నించి, చివరికి అవకాశాలు తగ్గిపోయిన తర్వాత మాత్రమే ఈ పరీక్షను చేయించుకోవడం కంటే ముందుగానే కణితి లక్షణాలను తెలుసుకోవడం ప్రయోజనకరంగా ఉంటుంది.
అండాశయ క్యాన్సర్ చికిత్సలో వ్యక్తిగతీకరించిన విధానం క్రమంగా ప్రాధాన్యం పొందుతోంది. శస్త్రచికిత్స, కీమోథెరపీ ఇప్పటికీ చికిత్సలో కీలక భాగాలుగానే ఉన్నాయి. అయితే కణితిలో ఉన్న ప్రత్యేక లక్షణాలను ముందుగానే తెలుసుకోవడం ద్వారా తదుపరి దశలో ఏ చికిత్సను ఎంచుకోవాలో వైద్యులు మరింత స్పష్టంగా నిర్ణయించేందుకు అవకాశం ఉంటుంది. అందువల్ల కొంతమంది అండాశయ క్యాన్సర్ రోగులకు జన్యు పరీక్ష కేవలం క్యాన్సర్ నిర్ధారణకు మించిన సమాచారాన్ని అందించే సాధనంగా మారుతాయి. ముఖ్యంగా ఈ కణితికి ఏ రకమైన చికిత్స మెరుగ్గా పనిచేసే అవకాశం ఉందో తెలుసుకోవడంలో ఇది సహాయపడుతుందని నిపుణులు సూచిస్తున్నారు.
