నల్ల జీలకర్ర.. ఆరోగ్యానికి జీవగర్ర

తిరగమోతలో జీలకర్ర చిటపటలాడితేనే అందం. జీలకర్ర.. ఉప్పు.. నలిపి తింటే కడుపుబ్బరం పరార్‌! పోపులపెట్టెలో అగ్రతాంబూలం అందుకున్న జీలకర్రలో చాలారకాలు ఉన్నాయి.

తిరగమోతలో జీలకర్ర చిటపటలాడితేనే అందం. జీలకర్ర.. ఉప్పు.. నలిపి తింటే కడుపుబ్బరం పరార్‌! పోపులపెట్టెలో అగ్రతాంబూలం అందుకున్న జీలకర్రలో చాలారకాలు ఉన్నాయి. సాదాసీదా జీలకర్రలో పోషకాలెన్నో! దీన్ని మించిన ఔషధి నల్ల జీలకర్ర. ఆయుర్వేదంలో నల్ల జీలకర్రను ఎక్కువగా ఉపయోగిస్తారు. అనేక రుగ్మతలను నయం చేసే నల్ల జీలకర్ర ప్రయోజనాలు మరెన్నో ఉన్నాయి.

• నల్ల జీలకర్రను చేదు జీలకర్ర అని కూడా అంటారు. జీర్ణవ్యవస్థ, మూత్రపిండాలు, కాలేయం, గుండె, ఊపిరితిత్తులకు సంబంధించిన సమస్యల పరిష్కారంలో ఇది దివ్యౌషధంగా పనిచేస్తుంది.
• శరీరంలో పేరుకుపోయిన వ్యర్థమైన కొవ్వును కరిగించడంలో నల్ల జీలకర్ర బేషుగ్గా పనిచేస్తుంది. బీపీని నియంత్రించడంతోపాటు చర్మవ్యాధులనూ అరికట్టడంలో దోహదం చేస్తుంది.
• నల్ల జీలకర్ర యాంటీ బాక్టీరియల్‌, యాంటీ వైరస్‌, యాంటీ ఇన్‌ఫ్లమేటరీ లక్షణాలను కలిగి ఉంటుంది. శరీరంలో ఉండే వాపులను తగ్గించడంలో… దగ్గు, జలుబు వంటి ఇన్ఫెక్షన్లను తగ్గించడంలోనూ ఇది తోడ్పడుతుంది.
• నల్ల జీలకర్ర కషాయం తాగడం వల్ల సీజనల్‌ వ్యాధుల నుంచి ఉపశమనం లభిస్తుంది. దీన్ని తయారుచేయడం కూడా తేలిక. ఒక గ్లాస్‌ నీటిలో ఒక టీ స్పూన్‌ నల్ల జీలకర్రను వేసి అర గ్లాస్‌ అయ్యేవరకు మరిగించి వడకట్టుకోవాలి. గోరువెచ్చని కషాయం పరగడుపున తాగడం వల్ల దీర్ఘకాలిక రోగాల బారిన పడకుండా జాగ్రత్తపడవచ్చు. నల్ల జీలకర్ర పొడికి తేనెను కలిపి పరగడుపున తీసుకోవడం వల్ల రోగనిరోధక శక్తి పెరుగుతుంది.