బీపీతో తలనొప్పి

ఒత్తిడి, డీహైడ్రేషన్‌, నిద్రలేమి మొదలైన వాటి కారణంగా తలనొప్పులు వస్తుంటాయి. అధిక రక్తపోటు (హైపర్‌ టెన్షన్‌ లేదా బీపీ) కూడా తీవ్రమైన తలనొప్పికి కారణమవుతుంది. పైగా ఇది మామూలుగా వచ్చే తలనొప్పులకు భిన్నమైంది.

ఒత్తిడి, డీహైడ్రేషన్‌, నిద్రలేమి మొదలైన వాటి కారణంగా తలనొప్పులు వస్తుంటాయి. అధిక రక్తపోటు (హైపర్‌ టెన్షన్‌ లేదా బీపీ) కూడా తీవ్రమైన తలనొప్పికి కారణమవుతుంది. పైగా ఇది మామూలుగా వచ్చే తలనొప్పులకు భిన్నమైంది. హైపర్‌టెన్సివ్‌ క్రైసిస్‌గా పిలిచే విపత్కర పరిస్థితికి దీన్ని సంకేతంగా భావించాలి. సాధారణంగా అధిక రక్తపోటు ప్రత్యక్షంగా ఎలాంటి లక్షణాలనూ ప్రదర్శించదు. అయితే, రక్తపోటు అధికంగా ఉన్నప్పుడు దానివల్ల తలనొప్పులు, తలతిప్పడం, అలసట, దృష్టి సంబంధ సమస్యలు లాంటివి తలెత్తుతాయని వైద్యులు చెబుతున్నారు.

మెదడులోని రక్తనాళాల్లో ఒత్తిడి పెరగడం వల్ల అధిక రక్తపోటు సంబంధిత తలనొప్పులు వస్తాయి. రక్తపోటు గణనీయంగా పెరిగినప్పుడు, మెదడులో రక్తనాళాల వ్యాకోచానికి దారితీస్తుంది. దీంతో ఒత్తిడి, నొప్పి పెరుగుతాయి. రక్తసరఫరా మందగించడంతో మెదడు కణజాలానికి ఆక్సిజన్‌ లభ్యత తగ్గుతుంది. దీంతో తలనొప్పి వేధిస్తుంది.

లక్షణాలు

• అధిక రక్తపోటు కారణంగా వచ్చే తలనొప్పి మామూలు తలనొప్పి, పార్శపునొప్పి కంటే భిన్నమైంది. దీని లక్షణాలు ఎలా ఉంటాయంటే…
• పొడుస్తున్నట్టుగా ఉండే నొప్పి. తల వెనకభాగంలో, కపాలం కింది భాగానికి కొంచె పైభాగంలో ఈ విధమైన నొప్పి ఉంటుంది.
• పట్టేసినట్టుగా, ఒత్తిడిగా అనిపిస్తుంది. కొంతమంది దీన్నే తలలో ఏదో తిరుగుతున్నట్టుగా అనుభూతి చెందుతారు.
• అధిక రక్తపోటుతో వచ్చే తలనొప్పులు ఉదయం నిద్ర లేస్తూనే తట్టుకోలేనంతగా బాధిస్తాయి.
• తల తిరుగుతున్నట్టుగా, కళ్లు మసక బారినట్టుగా అనిపిస్తుంది. అధిక రక్తపోటు రక్త ప్రవాహాన్ని ఆటంకపరుస్తుంది. దీంతో కంటిచూపులో ఆటంకాలు ఏర్పడతాయి.
• పెయిన్‌ కిల్లర్లతో ఈ సమస్యకు ఉపశమనం దొరకదు. రక్తపోటు విపరీతంగా పెరిగినప్పుడు, అంటే 180/120 ఎంఎంహెచ్‌జీ కంటే ఎక్కువగా ఉన్నప్పుడు ఇలాంటి తలనొప్పులు వేధిస్తాయి. ఇలాంటప్పుడు సత్వరమే వైద్య చికిత్స అవసరమవుతుంది.

అడ్డుకట్ట ఎలా?

• నెమ్మదిగా శ్వాస తీసుకోవాలి. దీంతో రక్తనాళాలు ఉపశమనం పొందుతాయి. రక్తపోటు తగ్గుతుంది. ఐదు సెకండ్లు శ్వాస తీసుకోవాలి. ఐదు సెకండ్ల పాటు పట్టి ఉంచాలి. నెమ్మదిగా ఐదు సెకండ్లపాటు వదిలిపెట్టాలి. ఇలా రెండు నుంచి ఐదు నిమిషాల పాటు చేస్తే మంచిది.
• లేదంటే ఓ గ్లాసు నీళ్లు తాగాలి. దీంతో రక్త సరఫరా మెరుగుపడుతుంది. రక్తపోటు నియంత్రణలోకి వస్తుంది.
• మెడ భాగంలోకాని, నుదురు మీద కాని వేడి లేదంటే చల్లటి కంప్రెస్‌ను ఓ 15- 20 నిమిషాల పాటు ఉంచినా ఫలితం ఉంటుంది.
• కండరాలు బిగుసుకుపోవడం కూడా తలనొప్పిని తీవ్రం చేస్తుంది. కాబట్టి కణతలు, మెడ, భుజాల భాగంలో నెమ్మదిగా మసాజ్‌ చేసినా కూడా రక్త సరఫరా మెరుగుపడుతుంది. ఉపశమనం లభిస్తుంది.
• చమోమైల్‌, హైబిస్కస్‌, అల్లం మొదలైన వాటితో చేసే టీలు సహజంగానే రక్తపోటును తగ్గించే గుణాన్ని కలిగి ఉంటాయి. కాబట్టి, వీటిని నెమ్మదిగా సిప్‌ చేస్తుంటే శరీరం రిలాక్సయిపోతుంది. అయితే కెఫీన్‌ ఉన్నవి, సోడియం ఎక్కువగా ఉన్న పానీయాలు మాత్రం
  తీసుకోకూడదు.

దీర్ఘకాలంలో…

• అరటిపండ్లు, పాలకూర, చిలగడ దుంప, నారింజలు లాంటి పొటాషియం ఎక్కువగా ఉన్న ఆహారం తీసుకోవాలి. వ్యాయామం, శారీరక శ్రమ గుండెకు బలాన్నిస్తాయి. అలా ఒత్తిడి పెరగకుండానే రక్త సరఫరా క్రమం మెరుగుపడుతుంది. రోజుకు ఓ 30 నిమిషాల పాటు బ్రిస్క్‌ వాక్‌, యోగా, స్ట్రెచింగ్‌, స్విమింగ్‌, సైక్లింగ్‌ వంటివి ప్రయత్నించాలి.
• తగినంత నిద్ర లేకపోయినా ఒత్తిడి హార్మోన్లు ఎక్కువగా విడుదలవుతాయి. ఇవి రక్తపోటును పెంచుతాయి. కాబట్టి రోజూ రాత్రి వేళల్లో 7 నుంచి 8 గంటలపాటు నిద్ర తప్పనిసరి.

సత్వర వైద్యసాయం

అధిక రక్తపోటుతో వచ్చే తలనొప్పి కొన్నిసార్లు హైపర్‌టెన్సివ్‌ క్రైసిస్‌, పక్షవాతానికి సంకేతం కావొచ్చు. కాబట్టి రక్తపోటు 180/120 ఎంఎంహెచ్‌జీ కంటే ఎక్కువగా ఉండటం, ఛాతీనొప్పితో కూడిన తీవ్రమైన తలనొప్పి, అకస్మాత్తుగా దృష్టి సమస్యలు, గందరగోళంగా అనిపించడం, మాట్లాడటం కష్టం కావడం, శరీరం ఓ వైపు మొద్దుబారినట్టు ఉంటే వెంటనే వైద్య సాయం పొందాలి. ఆలస్యం చేయకూడదు.