Sunflower Health Benefits | పొద్దుతిరుగుడి పువ్వు గింజలతో ఇన్ని ప్రయోజనాలున్నాయా?

పసుపుపచ్చటి పువ్వులో విచ్చుకునే పొద్దు తిరుగుడు గింజల్లో ఆరోగ్య ప్రయోజనాలు అపారం. ఎన్నో ఖనిజ లవణాలు, పోషకాలను కలిగిన ఈ గింజలు వివిధ రుగ్మతలకు పరిష్కారాలు.

Sunflower Health Benefits |  పసుపుపచ్చటి పువ్వులో విచ్చుకునే పొద్దు తిరుగుడు గింజల్లో ఆరోగ్య ప్రయోజనాలు అపారం. ఎన్నో ఖనిజ లవణాలు, పోషకాలను కలిగిన ఈ గింజలు వివిధ రుగ్మతలకు పరిష్కారాలు. పొద్దు తిరుగుడులో రెండు రకాలు. ఒకదాన్ని కేవలం ఆహారం కోసం వినియోగిస్తారు. మరో రకంతో నూనె తీస్తారు.

ఎన్నో ప్రయోజనాలు

• పొద్దు తిరుగుడు గింజల్లో ప్రొటీన్లు, అమైనో ఆమ్లాలు, తేలికగా అరిగే డైటరీ ఫైబర్‌, విటమిన్‌-ఇ, ఇతర పోషకాలు అధికంగా ఉంటాయి. ఇవి నొప్పి, వాపు నివారణలో సాయపడతాయి.
• వీటిలో క్యాల్షియం, ఫాస్ఫరస్‌, ఐరన్‌, మెగ్నీషియం, జింక్‌ ఎక్కువ. దీంతో జుట్టు రాలడాన్ని అరికడతాయి.
• వీటిలోని ఓలిక్‌, లినోలిక్‌ యాసిడ్‌ లాంటి అసంతృప్త ఆమ్లాలు చెడు కొలెస్ట్రాల్‌ను నియంత్రిస్తాయి. గుండె కవాటాల వ్యాధులు రాకుండా నివారిస్తాయి. గుండె ఆరోగ్యానికి హామీ ఇస్తాయి.
• సోడియం, సాచురేటెడ్‌ ఫ్యాట్స్‌ తక్కువగా ఉంటాయి కాబట్టి, అధిక రక్తపోటును నివారిస్తాయి.
• వేయించిన గింజలను స్నాక్‌గా తీసుకోవచ్చు. సలాడ్లకు గార్నిష్‌గా వాడుకోవచ్చు. బేకరీ ఉత్పత్తుల్లో జోడించుకోవచ్చు. ప్రొటీన్‌ బార్లు, పొడులు కూడా తయారు చేసుకోవచ్చు. పొద్దు తిరుగుడు గింజల పొడిని నీటిలో కలుపుకొనీ తాగొచ్చు.

పరిమితులు
పొద్దు తిరుగుడు గింజల్లో పోషకాలు ఎక్కువే. అదే సమయంలో వీటిలో కెలోరీలు కూడా ఎక్కువే. బరువు తగ్గాలనుకునే వారు మితంగా తీసుకోవాలి. ఈ గింజలంటే అలర్జీ ఉన్నవాళ్లు అస్సలు తినకూడదు. అరుగుదల, కిడ్నీ సమస్యలు ఉన్నవాళ్లు రోజుకు 10 గ్రాములకు మించకుండా తినాలి. అంటే, అవసరమైనవారు అవసరమైనంత మేరకే తీసుకోవాలి.

పోషక విలువలు

30 గ్రాములకు

కెలోరీలు: 175
సోడియం: 2.7 మి.గ్రా
ప్రొటీన్లు: 6 గ్రా.
ఐరన్‌: 8 శాతం
మెగ్నీషియం: 24 శాతం