చెక్కతో చక్కగా!

దాల్చిన చెక్క.. ఆహారానికి రుచితోపాటు ఆరోగ్యానికి ఎన్నో ప్రయోజనాలు అందిస్తుంది. అంతేకాదు.. అందాన్ని కాపాడటంలోనూ ముందుంటుంది. దాల్చిన చెక్కలోని యాంటి ఇన్‌ఫ్లమేటరీ, యాంటి మైక్రోబయల్‌ లక్షణాలు.. మొటిమలు, ఇతర చర్మ ఇన్ఫెక్షన్లను తగ్గించడంలో ముందుంటాయి.

దాల్చిన చెక్క.. ఆహారానికి రుచితోపాటు ఆరోగ్యానికి ఎన్నో ప్రయోజనాలు అందిస్తుంది. అంతేకాదు.. అందాన్ని కాపాడటంలోనూ ముందుంటుంది. దాల్చిన చెక్కలోని యాంటి ఇన్‌ఫ్లమేటరీ, యాంటి మైక్రోబయల్‌ లక్షణాలు.. మొటిమలు, ఇతర చర్మ ఇన్ఫెక్షన్లను తగ్గించడంలో ముందుంటాయి. ఇందులోని పాలీఫెనాల్స్‌, యూజినాల్‌.. శరీరంలోని ఫ్రీ రాడికల్స్‌తో పోరాడతాయి. ఇన్‌ఫ్లమేషన్‌ను తగ్గించి.. కణాల నష్టాన్ని, వృద్ధాప్య ఛాయల్ని నివారిస్తాయి.

• దాల్చిన చెక్కలోని యాంటి ఆక్సిడెంట్లు.. స్కిన్‌ టోన్‌ను మెరుగుపరుస్తాయి. ఒక టీస్పూన్‌ దాల్చిన చెక్క పొడిలో రెండు టేబుల్‌ స్పూన్ల పెరుగు వేసి బాగా కలపాలి. ఆ మిశ్రమాన్ని ముఖానికి అప్లయి చేయాలి. 15-20 నిముషాల తర్వాత గోరువెచ్చని నీటితో కడిగేయాలి.
• యాంటి ఫంగల్‌, యాంటి బ్యాక్టీరియల్‌, యాంటి ఇన్‌ఫ్లమేటరీ లక్షణాలు దాల్చిన చెక్కలో పుష్కలం. ఇవి మొటిమలను తగ్గించడంలో సమర్థంగా పనిచేస్తాయి. ఇందుకోసం ఒక టీస్పూన్‌ దాల్చిన చెక్క పొడిలో రెండు టేబుల్‌ స్పూన్ల తేనె కలపాలి. ఈ మిశ్రమాన్ని ముఖానికి అప్లయి చేసి.. 15-20 నిమిషాల తర్వాత శుభ్రం చేసుకోవాలి.
• పెదాలకు రక్త ప్రవాహం పెంచడంలో చెక్క సాయపడుతుంది. దాంతో పెదాలు ఆరోగ్యంగా ఉండి, మరింత అందంగా కనిపిస్తాయి. టేబుల్‌ స్పూన్‌ కొబ్బరి నూనెలో చిటికెడు దాల్చిన చెక్క పొడి వేసి.. బాగా కలపాలి. ఈ మిశ్రమాన్ని పెదవులకు అప్లయి చేసి, కొన్ని నిమిషాల తర్వాత కడిగేయాలి.
• జుట్టు ఆరోగ్యంగా పెరగడంలోనూ దాల్చినచెక్క సాయపడుతుంది. ఒక టీస్పూన్‌ దాల్చిన చెక్క పొడిలో రెండు టేబుల్‌ స్పూన్ల కొబ్బరి నూనెను వేసి బాగా కలపాలి. ఈ మిశ్రమాన్ని తలకు పట్టించి.. సున్నితంగా మసాజ్‌ చేయాలి. 30 నిమిషాల తర్వాత.. తక్కువ గాఢత కలిగిన షాంపూతో తలస్నానం చేయాలి. దాంతో జుట్టు కుదుళ్లకు రక్త సరఫరా బాగా జరిగి.. జుట్టు రాలడం తగ్గుతుంది.