Fever | జ్వరమొస్తే ఒంటికి మంచిదే.. ఎన్నో లాభాలు ఉంటాయని అధ్యయనాల్లో వెల్లడి

Fever | కొంచెం జ్వరం రాగానే ఏదో అయిపోతుందని భయపడిపోకండి.. ఒళ్లు కాలిపోతుందని పిడికెడు గోలీలు గుటుక్కున మింగేయకండి.. జ్వరం వచ్చిందా! అయితే రానీలే అని అలా వదిలేయండి సరిపోద్ది. జ్వరం దానంతట అదే తగ్గిపోతుంది,

Fever |హైదరాబాద్‌ సిటీబ్యూరో, మార్చి 17 (నమస్తే తెలంగాణ): కొంచెం జ్వరం రాగానే ఏదో అయిపోతుందని భయపడిపోకండి.. ఒళ్లు కాలిపోతుందని పిడికెడు గోలీలు గుటుక్కున మింగేయకండి.. జ్వరం వచ్చిందా! అయితే రానీలే అని అలా వదిలేయండి సరిపోద్ది. జ్వరం దానంతట అదే తగ్గిపోతుంది, పైగా అంటువ్యాధులేమైనా ఉంటే వాటినీ తగ్గించేస్తుంది. ఒక్క మాటలో చెప్పాలంటే తేలికపాటి జ్వరం రోగనిరోధక శక్తిని పెంచటంలో దోహదం చేస్తుంది. శాస్త్రవేత్తలు కూడా ఇదే విషయాన్ని స్పష్టం చేస్తున్నారు. తేలికపాటి జ్వరం ఒంటికి మంచిదేలే! అని కెనడాకు చెందిన యూనివర్సిటీ ఆఫ్‌ ఆల్బర్ట్‌ ఇమ్యునాలజిస్ట్‌ ప్రొఫెసర్‌ డానియెల్‌ బరెడా అంటున్నారు. ఆయన నేతృత్వంలోని బృందం.. చేపలకు బ్యాక్టీరియాను సంక్రమింపజేసి, చికిత్స చేయకుండా వదిలేసింది.

తర్వాత పరీక్షిస్తే మిత జ్వరం ఇన్ఫెక్షన్లతో వేగంగా పోరాడగలదని తేలింది. వాపు అయిన చోట కణజాలాన్ని సరిచేయగల రోగనిరోధక శక్తి పెంపొందుతుందని శాస్త్రవేత్తలు కనుగొన్నారు. మితమైన జ్వరం స్వీయ పరిషారమైనదని, సహజంగా వచ్చే జ్వరం శరీరాన్ని ప్రేరేపించగలదని నిర్ధారణ అయ్యిందని తెలిపారు. ఏడు రోజుల్లో చేపలను ఇన్ఫెక్షన్ల నుంచి బయటపడేయటానికి జ్వరం సహాయపడిందని వెల్లడించారు. ఈ వివరాలు ఇమ్యునాలజీ అండ్‌ ఇన్‌ఫ్లమేషన్‌ జర్నల్‌లో ప్రచురితమయ్యాయి. మానవులకు సాధారణ జ్వరం వల్ల కలిగే ఆరోగ్య ప్రయోజనాలపై ఇంకా లోతైన పరిశోధనల చేయాల్సి ఉన్నదని అధ్యయనం పేర్కొన్నది.