స్క్రీన్లు-క్యాన్సర్లు

ఇప్పుడు మన జీవితాల్ని స్క్రీన్లు శాసిస్తున్నాయి. రోజులో చాలా సమయంపాటు ఫోన్లు, ట్యాబ్స్‌, కంప్యూటర్లు, టీవీలు చూడటం అలవాటుగా మారిపోయింది. అయితే, ఎక్కువ కాలంపాటు స్క్రీన్లకు అతుక్కుపోవడం క్యాన్సర్‌ ముప్పును పెంచుతుందని పరిశోధకులు హెచ్చరిస్తున్నారు.

ఇప్పుడు మన జీవితాల్ని స్క్రీన్లు శాసిస్తున్నాయి. రోజులో చాలా సమయంపాటు ఫోన్లు, ట్యాబ్స్‌, కంప్యూటర్లు, టీవీలు చూడటం అలవాటుగా మారిపోయింది. అయితే, ఎక్కువ కాలంపాటు స్క్రీన్లకు అతుక్కుపోవడం క్యాన్సర్‌ ముప్పును పెంచుతుందని పరిశోధకులు హెచ్చరిస్తున్నారు. స్క్రీన్‌ టైమ్‌కు, క్యాన్సర్‌కు ఏదైనా సంబంధం ఉందేమోనని పలు విద్యా సంస్థల పరిశోధకులు అధ్యయనం చేశారు. క్యాన్సర్‌ ముప్పు పెరగడానికి డిజిటల్‌ గ్యాడ్జెట్ల తెరల నుంచి వెలువడే బ్లూ లైట్‌ ప్రధాన కారణం కావచ్చని వారు అభిప్రాయం వ్యక్తం చేస్తున్నారు.

బ్లూ లైట్‌ మన నాణ్యమైన నిద్రకు అవసరమైన మెలటోనిన్‌ హార్మోన్‌ విడుదలను తగ్గిస్తుందట. దీంతో రాత్రిళ్లు సరిగ్గా నిద్ర పట్టదు. రొమ్ము, పెద్దపేగు, ప్రొస్టేట్‌ క్యాన్సర్‌ సహా వివిధ క్యాన్సర్లకు నిద్ర లేమికి సంబంధం ఉంటుంది. అయితే, స్క్రీన్లను ఎక్కువ సేపు చూడటం వల్లే క్యాన్సర్‌ వస్తుందని ఇప్పటికైతే పూర్తి ఆధారాలు లభించలేదని పరిశోధకులు వెల్లడించారు. ఈ దిశగా మరింత అధ్యయనం అవసరమని వారు పేర్కొన్నారు. కాకపోతే, మన జాగ్రత్తలో మనం ఉండాలని సూచిస్తున్నారు. కాబట్టి, స్క్రీన్‌ టైం తగ్గించుకోవడం, చూసేటప్పుడు తగిన జాగ్రత్తలు తీసుకోవడం లాంటివాటితో మన ఆరోగ్యాన్ని కాపాడుకోవచ్చు.

కొన్ని చిట్కాలు

• కంప్యూటర్లు, స్మార్ట్‌ఫోన్లతో గడిపేటప్పుడు 20 20 20 నియమం పాటించాలి. అంటే ప్రతి 20 నిమిషాలకు ఓసారి విరామం తీసుకోవాలి. మనం ఉన్న ప్రదేశం నుంచి 20 అడుగుల దూరంలో ఉన్న వస్తువును ఓ 20 సెకండ్లపాటు చూడాలి.
• స్క్రీన్లు చూసేటప్పుడు కళ్లద్దాలు ధరించాలి. లేదంటే స్క్రీన్ల నుంచి వచ్చే బ్లూ లైట్‌ తొలగిపోయేలా చూసుకోవాలి.
• నిద్రకు ముందు స్క్రీన్లు చూసే అలవాటు మానుకోవాలి. బదులుగా ఏదైనా పుస్తకం చదవడమో, లేదంటే రిలాక్స్‌ కావడమో చేయాలి.
• రోజూ ఒకే సమయంలో నిద్రించడానికి ప్రయత్నించాలి.