గేమ్‌ ఛేంజర్‌ యావత్‌ దేశానికే ఆదర్శం..

• సీఎం కేసీఆర్‌ సంకల్పంతో సాగు సస్యశ్యామలం
• రైతులు పత్తి సాగు వైపు మొగ్గు చూపాలి
• వ్యవసాయ శాఖ మంత్రి నిరంజన్‌రెడ్డి
• ఆలేరు, ముత్తిరెడ్డిగూడెంలో రైతు బంధు సంబురాలు
• జిల్లావ్యాప్తంగా కొనసాగిన వారోత్సవాలు

పెట్టుబడి సాయం ఆలోచన ప్రపంచంలోనే మొట్టమొదటిది వ్యవసాయ రంగ సంస్కరణల్లో రైతు బంధును గేమ్‌ ఛేంజర్‌ అని వ్యవసాయ నిపుణులు, ఆర్థిక వేత్తలు అభివర్ణిస్తున్నారని నిరంజన్‌రెడ్డి తెలిపారు. మన పత్తికి అంతర్జాతీయంగా మంచి డిమాండ్‌ ఉందని, రైతులు ఆ దిశగా మొగ్గు చూపి లాభాలు పొందాలని ఆకాంక్షించారు. గ్రామగ్రామాన రైతుబంధు ఉత్సవాలు ఘనంగా సాగుతున్నాయని, పార్టీలతో సంబంధం లేకుండా రైతులంతా పాల్గొంటుండడం గొప్ప విషయమని మంత్రి నిరంజన్‌రెడ్డి పేర్కొన్నారు. మరోవైపు జిల్లావ్యాప్తంగా సంబురాలు కొనసాగాయి. ఎడ్లబండ్లు, ట్రాక్టర్లతో రైతులు ర్యాలీ తీశారు. ముఖ్యమంత్రి కేసీఆర్‌ ఫ్లెక్సీలకు క్షీరాభిషేకం చేశారు.

పంటల సాగుకు ప్రభుత్వమే పెట్టుబడి పెట్టి రైతన్నకు అండగా నిలబడాలన్న ముఖ్యమంత్రి కేసీఆర్‌ ఆలోచన ప్రపంచంలోనే మొట్టమొదటిదని, రైతు బంధు పథకం యావత్‌ దేశానికి ఆదర్శమని రాష్ట్ర వ్యవసాయ శాఖ మంత్రి సింగిరెడ్డి నిరంజన్‌రెడ్డి అన్నారు. రైతు బంధు వారోత్సవాల్లో భాగంగా శుక్రవారం ఆలేరు, భువనగిరి
మండలంలోని ముత్తిరెడ్డిగూడెంలో ప్రభుత్వ విప్‌ గొంగిడి సునీతామహేందర్‌రెడ్డి, ఎమ్మెల్యే పైళ్ల శేఖర్‌రెడ్డితో కలిసి సంబురాల్లో పాల్గొన్నారు. ఈ సందర్భంగా రైతులతో మాట్లాడి మంత్రి సంతోషం పంచుకున్నారు. రైతుకు ఎకరాకు ఏడాదికి రూ.10వేలు పెట్టుబడి పెడుతున్నది ఒక్క కేసీఆర్‌ ప్రభుత్వ మాత్రమేనని గుర్తు చేశారు.

యాదాద్రి/భువనగిరి అర్బన్‌, జనవరి 7: ముఖ్యమంత్రి కేసీఆర్‌ ప్రవేశపెట్టిన రైతుబంధు పథకం ప్రపంచానికే మార్గదర్శిగా నిలిచిందని వ్యవసాయ, సహకార, మార్కెటింగ్‌శాఖల మంత్రి నిరంజన్‌రెడ్డి అన్నారు. శుక్రవారం భువనగిరి మండలం ముత్తిరెడ్డిగూడెం, ఆలేరులో నిర్వహించిన రైతు బంధు వారోత్సవాల్లో మంత్రి ముఖ్య అతిథిగా హాజరై మాట్లాడారు. ప్రభుత్వ విప్‌ గొంగిడి సునీతా మహేందర్‌రెడ్డి, ఎమ్మెల్యే పైళ్ల శేఖర్‌రెడ్డితో కలిసి సంబురాల్లో పాల్గొన్నారు. ఈ సందర్భంగా మంత్రి మాట్లాడుతూ ఈ నెల 10వరకు జరుగనున్న రైతుబంధు వారోత్సవ సంబరాల్లో రైతులు పెద్ద ఎత్తున పాల్గొంటున్నారని అన్నారు. రైతులోకం కోరకున్నా ఎలాంటి షరతులు లేకుండా రాష్ట్రంలో 65 లక్షల మందికి పెట్టుబడి సాయం అందుతున్నదన్నారు. ముఖ్యమంత్రి కేసీఆర్‌ ప్రవేశపెట్టిన పథకాలన్నీ ఆయన అద్భుత ఆలోచన నుంచి ఉద్భవించినవేనని, అలాంటి సంక్షేమ పథకాలను ఇతర రాష్ర్టాలతో పాటు బీజేపీ ప్రభుత్వం కూడా కాపీ కొట్టిందని తెలిపారు. తెలంగాణ కంటే ఐదు రెట్లు పెద్దదైన ఉత్తర్‌ప్రదేశ్‌లో రైతులు ఆయిల్‌ ఇంజన్‌ మోటార్ల మీదనే ఆధారపడ్డారని, కానీ తెలంగాణ రాష్ట్రంలో రైతాంగానికి 24 గంటల నిరంతర ఉచిత కరంట్‌ ఇస్తున్నామని అన్నారు. సంక్రాంతి సందర్భంగా రైతులు ధాన్యపు రాశులతో ముగ్గులు వేస్తున్నారని, రైతులు వేసిన పంటలో, రైతు జీవన విధానంలో ముఖ్యమంత్రి కేసీఆర్‌ స్పష్టంగా కనిపిస్తున్నారని, రైతుల జీవితాల్లో కొత్త వెలుగులు నింపారని అన్నారు. రాష్ట్రంలోని మిగులు ప్రాంతాల్లో ఏడాదిన్నరలోగా పూర్తి స్థాయిలో సాగునీరు అందిస్తారని తెలిపారు. పత్తి క్వింటాల్‌ రూ.10,200 పలుకుతుందని, నీరు, కరంటు ఉచితంగా ఇస్తున్నందున రైతులు పత్తి సాగు చేయాలని, పెసర్లు, కందులు, ఆముదాలు, శనగలు, కూరగాయలు ఇతర ఆరుతడి పంటలు వేసుకుంటే లాభం ఉంటుందని చెప్పారు.

బ్రహ్మాండంగా ‘రైతుబంధు’ వారోత్సవాలు

• ప్రభుత్వ విప్‌ సునీతా మహేందర్‌రెడ్డి

గ్రామ, గ్రామాన, వాడ, వాడల్లో ‘రైతుబంధు’ వారోత్సవాలు బ్రహ్మాండంగా జరుగుతున్నాయని ప్రభుత్వ విప్‌ గొంగిడి సునీతామహేందర్‌రెడ్డి అన్నారు. గత ప్రభుత్వాల హయాంలో రైతులు ఆత్మహత్యలు చేసుకుంటే ముఖ్యమంత్రి కేసీఆర్‌ పాలనలో సంతోషంగా వ్యవసాయం చేసుకుంటున్నారని అన్నారు. మూస పద్ధతిని వీడి ఆరుతడి పంటలు సాగు చేసి ఆదాయం పొందాలని రైతులకు సూచించారు. రైతులు సగౌరవంగా బతికే రోజులు వచ్చాయని చెప్పారు. కరోనా కష్టకాలంలోనూ రాష్ట్ర ప్రభుత్వం వరి ధాన్యం కొనుగోలు చేసి గిట్టుబాటు ధర ఇస్తున్నదని గుర్తు చేస్తూ ప్రభుత్వానికి ఆదాయం తగ్గినా రైతుబంధును మాత్రం ఆపలేదన్నారు.

రైతు బాంధవుడు సీఎం కేసీఆర్‌

• ఎమ్మెల్యే పైళ్ల శేఖర్‌రెడ్డి
  రైతు సంక్షేమం కోసం నిరంతరం పరితపించే ముఖ్యమంత్రి కేసీఆర్‌ రైతు బాంధవుడని ఎమ్మెల్యే పైళ్ల శేఖర్‌రెడ్డి అన్నారు. స్వరాష్ట్రంలో రైతు బీమా, రైతు బంధు, 24 గంటల ఉచిత కరంటుతోపాటు రైతుకు లబ్ధిచేకూరే ఎన్నో పథకాలు అందించడంతో రైతులు సుఖఃసంతోషాలతో ఉన్నారని పేర్కొన్నారు. రైతు క్షేమం కోరుతూ రైతును రాజు చేయాలనే సంకల్పంతో తెలంగాణ ప్రభుత్వం ముందుకెళ్తున్నదని తెలిపారు. భువనగిరిలో జరిగిన రైతు బంధు సంబురాల్లో జిల్లా కలెక్టర్‌ పమేలా సత్పతి, జిల్లా గ్రంథాలయ సంస్థ చైర్మన్‌ డాక్టర్‌ జడల అమరేందర్‌గౌడ్‌, రైతుబంధు సమితి జిల్లా అధ్యక్షుడు కొలుపుల అమరేందర్‌, ఎంపీపీ నరాల నిర్మలావెంకటస్వామి, మార్కెట్‌ కమిటీ చైర్మన్లు నల్లమాస రమేశ్‌గౌడ్‌, కునపురి కవిత, మున్సిపల్‌ చైర్మన్‌ ఎన్నబోయిన ఆంజనేయులు, జడ్పీటీసీ బీరు మల్లయ్య, పీఏసీఎస్‌ చైర్మన్లు నోముల పరమేశ్వర్‌రెడ్డి, మెట్టు శ్రీనివాస్‌రెడ్డి, మున్సిపల్‌ వైస్‌ చైర్మన్‌ చింతల కిష్టయ్య, రైతుబంధు మండల కన్వీనర్‌ కంచి మల్లయ్య, సర్పంచుల ఫోరం మండలాధ్యక్షుడు ఎడ్ల రాజిరెడ్డి, టీఆర్‌ఎస్‌ పట్టణ, మండలాధ్యక్షులు ఏవీ.కిరణ్‌కుమార్‌, జనగాం పాండు, ప్రధాన కార్యదర్శులు రచ్చ శ్రీనివాస్‌రెడ్డి, నీల ఓం ప్రకాశ్‌గౌడ్‌, టీఆర్‌ఎస్‌ నాయకులు జిల్లా వ్యవసాయ, సహకార శాఖల అధికారులు అనూరాధ, అన్నపూర్ణ పాల్గొన్నారు.
  ఆలేరులో జరిగిన రైతు బంధు సంబురాల్లో మార్కెట్‌ కమిటీ చైర్మన్‌ గడ్డమీది రవీందర్‌గౌడ్‌, ఆర్డీఓ భూపాల్‌రెడ్డి, ఏడీఏ పద్మావతి, వైస్‌ చైర్మన్‌ గ్యాదపాక నాగరాజు, డైరెక్టర్లు పత్తిపాటి మంజుల, బద్దూనాయక్‌, మామిడాల నర్సింహులు, అనంతుల జంగారెడ్డి, గుంటి కృష్ణ, బూడిద అయిలయ్య, ఆలేరు మున్సిపల్‌ చైర్మన్‌ వస్పరి శంకరయ్య, యాదగిరిగుట్ట వైస్‌ చైర్మన్‌ ఎరుకల సుధ, టీఆర్‌ఎస్‌ ఆలేరు మండల, పట్టణ, యాదగిరిగుట్ట మండలాధ్యక్షులు గంగుల శ్రీనివాస్‌, పుట్ట మల్లేశ్‌, కర్రె వెంకటయ్య, మోటకొండూర్‌ వైస్‌ ఎంపీపీ ఇల్లందుల మల్లేశ్‌గౌడ్‌, నాయకులు వెంకటయ్య, శ్రీనివాస్‌, వెంకటేశ్‌ పాల్గొన్నారు.