Development works | అభివృద్ది, సంక్షేమమే టీఆర్‌ఎస్ పాలనకు తారక మంత్రం : ఎమ్మెల్యే మాగంటి గోపినాథ్‌

జూబ్లీహిల్స్ : తెలంగాణలో అట్టడుగున ఉన్న పేద ప్రజల జీవితాలలో మార్పు తెచ్చేందుకు ముఖ్యమంత్రి కేసీఆర్‌ అభివృద్ది, సంక్షేమమే తారక మంత్రంగా టీఆర్‌ఎస్ పాలన అందిస్తున్నారని జూబ్లీహిల్స్​‍ ఎమ్మెల్యే మాగంటి గోపినాథ్‌ పేర్కొన్నారు. శుక్రవారం యూసుఫ్‌గూడ పోలీస్ లైన్స్​‍లో రూ.1 కోటి 10 లక్షలతో మంజూరైన బీటి రోడ్డు పనులకు కార్పొరేటర్‌ రాజ్‌కుమార్‌ పటేల్‌తో కలిసి శంకుస్థాపన చేశారు.

ఈ సందర్భంగా ఎమ్మెల్యే మాట్లాడుతూ ఇంతకాలం పేదల బాగోగులను పట్టించుకోని పార్టీలు ఇప్పుడు మొసలి కన్నీరు కార్చడం విడ్డూరంగా ఉందని ఎద్దేవా చేశారు. తెలంగాణలో అమలవుతున్న అనేక సంక్షేమ పథకాలు దేశంలో ఎక్కడా లేవని, ఈ విషయాన్ని ప్రజలకు ముందు వివరించిన తరువాత ప్రతిపక్షాలు విమర్శలు చేయాలా వద్దా అని ఆత్మ విమర్శ చేసుకోవాలని అన్నారు.

దేశంలో ఎక్కడాలేని విధంగా సంక్షేమ పథకాలు అమలవుతున్న తరుణంలో పేద ప్రజలను తప్పుదోవ పట్టిస్తున్న ప్రతిపక్ష పార్టీలు వారి పొట్టకొట్టి ఆ పాపం మూటగట్టుకుని చివరికి కనుమరుగైపోవడం ఖాయమన్నారు. తెలంగాణలో గతంలో ఎన్నడూ లేనంత అభివృద్ది జరుగుతుంటే ఆమోదించి సద్విమర్శలు చేసే సత్తా లేని పార్టీలకు ప్రజల వద్ద స్థానం ఉండదని ఆయన పేర్కొన్నారు.

ఈ సందర్భంగా టీఆర్‌ఎస్ ప్రభుత్వ హయాంలో జూబ్లీహిల్స్​‍లో అనూహ్యమైన అభివృద్ది జరిగిందని, నియోజకవర్గం అభివృద్ది పథంలో అగ్రస్థానంలో నిలుస్తుందని అన్నారు. ఈ కార్యక్రమంలో టీఆర్‌ఎస్ డివిజన్‌ అధ్యక్షుడు ఎన్‌.సంతోష్‌ ముదిరాజ్‌, డివిజన్‌ ప్రధాన కార్యదర్శి ఐ.నర్సింగ్‌, నాయకులు పాల్గొన్నారు.