రేపటి నుంచి మహాకుంభాభిషేకం

• ఈ నెల 25 వరకు యాదాద్రి శివాలయంలో ఉత్సవాలు
• పాంచాహ్నిక దీక్షతో పంచకుండాత్మక రుద్రయాగం
• పాల్గొననున్న బహ్మవేదపారాయణ, యజ్ఞాచార్య, రుత్విక్‌,
• పరిచారక బృందాలు 25న సీఎం కేసీఆర్‌ రాక
• వివరాలు వెల్లడించిన యాదాద్రి ఆలయ ఈఓ గీత

‘యాదాద్రి లక్ష్మీనరసింహ స్వామి దేవస్థానం అనుబంధమైన పర్వతవర్ధినీ సమేత రామలింగేశ్వర ఆలయంలో ఈ నెల 20న మహాకుంభాభిషేక మహోత్సవాలు వైభవంగా ప్రారంభమవుతాయి.. శివాలయం ప్రతిష్ఠ, ఉపదేవీ దేవతల ప్రతిష్ఠతోపాటు ఐదురోజులు పాంచాహ్నిక దీక్షా విధానంతో పంచకుండాత్మక రుద్రయాగం నిర్వహిస్తాం.. శ్రీరాంపురం పీఠాధీశ్వరులు మాధవానంద సరస్వతీ స్వామి చేతుల మీదుగా పూజాది కార్యక్రమాలు శాస్ర్తోక్తంగా జరుగుతాయి.. ఈ నెల 25న ముఖ్యమంత్రి కేసీఆర్‌ స్ఫటిక లింగ ప్రతిష్ఠ, అష్టబంధం, ప్రాణ ప్రతిష్ఠ మహోత్సవాల్లో ముఖ్య అతిథిగా పాల్గొంటారు’అని యాదాద్రి ఆలయ ఈఓ ఎన్‌.గీత తెలిపారు.

యాదాద్రి, ఏప్రిల్‌18: యాదాద్రి లక్ష్మీనరసింహస్వామి దేవస్థానం అనుబంధమైన పర్వతవర్ధినీ సమేత రామలింగేశ్వర ఆలయంలో ఈ నెల 20న ఉదయం 9 గంటలకు విఘ్నేశ్వర పూజతో మహాకుంబాభిషేక మహోత్సవాలకు శ్రీకారం చుడుతున్నట్లు ఆలయ ఈఓ ఎన్‌.గీత తెలిపారు. సోమవారం తన కార్యాలయంలో మీడియాతో ఆమె మాట్లాడారు. ఈ నెల 20నుంచి 25వరకు మహాకుంబాభిషేక మహోత్సవాలు స్మార్తగమ శాస్త్రం ప్రకారం అత్యంత వైభవంగా నిర్వహిస్తున్నట్లు వెల్లడించారు. శివాలయం, ఉపదేవీదేవతల ప్రతిష్ఠతో 21నుంచి ఐదురోజులపాటు పాంచాహ్నిక దీక్షా విధానంతో పంచకుండాత్మక రుద్రయాగం జరిపిస్తామని తెలిపారు.

ఈ నెల 25న ఉదయం 10.25గంటలకు ధనిష్టా నక్షత్ర యుక్త మిధున లగ్న పుష్కరాంశ సుముహూర్తాన పరమ హంస పరివ్రాజకాచార్యులైన శ్రీరాంపురం(తొగుట) పీఠాధీశ్వరులు మాధవానంద సరస్వతీ స్వామి చేతుల మీదుగా రామలింగేశ్వర స్పటిక లింగ ప్రతిష్ఠ, అష్టబంధం, ప్రాణ ప్రతిష్ఠా మహోత్సవాలు ఉంటాయని, ఈ కార్యక్రమాలకు సీఎం కేసీఆర్‌ ముఖ్య అతిథిగా హాజరవుతారని చెప్పారు.

ఈ మహోత్సవాలకు వేములవాడ, బాసరతో పాటు రాష్ట్రంలోని వివిధ ఆలయాల నుంచి సుమారు 54 మంది ఆచార్య బ్రహ్మ వేద పారాయణ, యజ్ఞాచార్య, రుత్విక్‌, పరిచారక బృందం పాల్గొంటారని, వీరంతా 19వ తేదీ సాయంత్రానికి యాదాద్రికి చేరుకుంటారని తెలిపారు. వీరికి తులసీ కాటేజీలోని లక్ష్మీసదనంలో బస ఏర్పాటు చేశామన్నారు. కొండపై అనువంశిక ధర్మకర్త భవనం ప్రాంగణంలో భోజన వసతి కల్పిస్తున్నట్లు తెలిపారు. విద్యుద్దీపాలంకరణ, పుష్పాలంకరణతో శివాలయాన్ని అద్భుతంగా తీర్చిదిద్దుతామన్నారు. ఇప్పటికే కలశ స్థాపనకు పరంజా, మహా యాగానికి యాగశాలను ఏర్పాటు చేశామని చెప్పారు. ఉత్సవాలకు అందరూ ఆహ్వానితులేనని, ప్రత్యేకంగా ఎవరికీ ఆహ్వానం లేదని స్పష్టం చేశారు. సమావేశంలో ఆలయ ఏఈఓ భాస్కర్‌ శర్మ పాల్గొన్నారు.

ఉత్సవ కార్యక్రమాలు..

• 20న ఉదయం 9 గంటల నుంచి మధ్యాహ్నం ఒంటి గంట వరకు విఘ్నేశ్వర పూజ, పుణ్యాహవాచనం, మాతృకాపూజ నాంధిముఖం, పంచగవ్య ప్రాశనం, రుత్విగ్వరణం, సాయంత్రం 5 నుంచి 8.30గంటల వరకు అంకురారోపణం, ఉదక శాంతి, రక్షోఘ్నహోమం.
• 21న ఉదయం 9 నుంచి మధ్యాహ్నం ఒంటిగంట వరకు యాగశాల ప్రవేశం, మండప, స్తంభ ద్వార తోరణ పూజ, చతుస్థానార్చనలు, హోమకుండ సంస్కారం, అగ్ని ప్రతిష్ఠ, మహారుద్ర పురశ్చరణ, మూలమంత్రానుష్టాన హవనం, సాయంత్రం 5 నుంచి 8.30 గంటల వరకు శాంతి, దీక్షాహోమం, అగ్న్యత్తారణం, కౌతుక బంధనం, జలాధివాసం.
• 22న ఉదయం 9నుంచి మధ్యాహ్నం ఒంటిగంట వరకు స్థాపిత దేవతాయజన, మూలమంత్రానుష్టాన హవనం, వేదికాత్రయ ప్రోక్షణం, బలిహరణం, సాయంత్రం 5 నుంచి 8.30 గంటల వరకు ప్రతిమానయనం, నేత్రోన్మీలనం, స్నపనం, అర్చన, మూర్తిపతిలోకపాల స్థాప్యదేవతాహవనం, వేదహవనం, నీరాజన మంత్రపుష్పాలు.
• 23న ఉదయం 9నుంచి మధ్యాహ్నం ఒంటిగంట వరకు యాగశాల ద్వారతోరణ పూజ, స్థాపిత దేవతాదీక్షాహోమాలు, మహాలింగార్చనం, మహాన్యాస పారాయణం, మూలమంత్రానుష్టా హవనం. సాయంత్రం 5 నుంచి 8.30 గంటల వరకు ప్రాసాద వాస్తు నిక్షేపణం, ప్రాసాద వాస్తుశాంతి, ధాన్యాధివాసం, మూర్తి, మూర్తిపతి, లోకపాల స్థాప్య దేవతా హవనం, నీరాజన మంత్రపుష్పాలతో ఉత్సవాలు.
• 24న ఉదయం 9 నుంచి మధ్యాహ్నం ఒంటిగంట వరకు యాగశాల ద్వారాతోరణ పూజ, శతరుద్రాభిషేకం, మహా రుద్రపురశ్చరణ, మూలమంత్రానుష్టాన వేద హవనాలు, సాయంత్రం 5నుంచి 8.30 గంటల వరకు రుద్రహవనం, ప్రాసాద స్నపనం, కూర్మశిలా బ్రహ్మశిలా, పిండికా స్థాపనాలు, శయ్యాధివాసం, పుష్పాధివాసం, ప్రాసాదాధివాసాలు.
• 25న ఉదయం 7గంటలకు నుంచి ద్వారాతోరణపూజ స్థాపిత దేవతాయజన, ప్రాసాద దిక్‌స్తుండీల హోమాలు, వ్యాహృతి హోమాలు, శతకృత్వోభి మంత్రణం, దేవ మస్తకాభిషేకం, గర్తన్యాసం, ఉదయం 10.25 గంటలకు ధనిష్టానక్షత్ర యుక్త మిధునలగ్న పుష్కరాంశ సుముహూర్తాన మాధవనంద సరస్వతీ స్వామి చేతుల మీదుగా రామలింగేశ్వర స్పటిక లింగ ప్రతిష్ఠ, అష్టబంధం, ప్రాణప్రతిష్ఠ, ప్రతిష్ఠాంగహోమం, అఘోరమంత్ర హోమం, దిగ్దేవతాక్షేత్ర పాలక బలిహరణం, శోభాయాత్ర, కలశ ప్రతిష్ఠ కార్యక్రమాలు నిర్వహిస్తారని తెలిపారు. మధ్యాహ్నం 12.30 గంటలకు మహా పూర్ణాహుతి, అవబృదం, మహాకుంభాభిషేకం, స్వామివారి అనుగ్రహ భాషణం, మహదాశీర్వచనం, తీర్థ ప్రసాద వితరణ, ప్రతిష్ఠాయాగపరి సమాప్తి.