ఇంటి ముంగిటే వైద్యం త్వరగా ఉపశమనం

కరోనా స్వల్ప లక్షణాలున్నవారికి మెడికల్‌ కిట్‌
హడావుడి లేకుండా ఇంటి వద్దకే వైద్య సేవలు
ఆస్పత్రుల చుట్టూ తిరగకుండా హోం ఐసొలేషన్‌తో సాంత్వన
మల్టీ విటమిన్‌ మాత్రలతో సహా రూ.500-600 విలువైన మందుల పంపిణీ
గ్రేటర్‌ వ్యాప్తంగా వేగంగా ఫీవర్‌ సర్వే

సిటీబ్యూరో ప్రధాన ప్రతినిధి, జనవరి 27 (నమస్తేతెలంగాణ) : కరోనా స్వల్ప లక్షణాలతో బాధపడుతున్న వారికి ప్రభుత్వమిస్తున్న మందుల కిట్‌ (మెడికల్‌ కిట్‌) సత్ఫలితాలిస్తోంది. మహమ్మారి నియంత్రణకు వైద్య ఆరోగ్యశాఖ రాష్ట్రవ్యాప్తంగా ప్రారంభించిన జ్వర సర్వే గురువారానికి ఏడు రోజులు పూర్తయ్యింది. ఈ సర్వేలో ఇంట్లో లక్షణాలున్నట్లు అనిపిస్తే వెంటనే కిట్‌ అందజేస్తున్నారు. సర్వేతో ఇంటి ముంగిటకే వైద్య సేవలు రావడం ఒకవంతైతే, ఎలాంటి హడావుడి లేకుండా, సామాజిక ఇబ్బందులు తలెత్తకుండా, ప్రైవేటు ఆస్పత్రులు, ల్యాబ్‌లకు వెళ్లి డబ్బులు దుబారా చేసుకోకుండా హోం ఐసొలేషన్‌తో బాధితులు ఉపశమనం పొందుతున్నారు. ప్రభుత్వమిచ్చే మందుల కిట్‌ విలువ రూ.500- రూ.600 ఉంటోంది.
ఫీవర్‌ సర్వేలో భాగంగా గ్రేటర్‌వ్యాప్తంగా వైద్య సిబ్బంది, ఆశా కార్యకర్తలు ఇంటింటికి తిరుగుతూ సర్వే నిర్వహిస్తున్నారు. జ్వరం, జలుబు, దగ్గు, ఒళ్లునొప్పులు ఉన్నట్లు చెప్పిన వెంటనే మందులు అందజేస్తున్నారు. ఫలితంగా కరోనా వ్యాప్తిని నివారించడంతోపాటు బాధితులకు ఆర్థిక ఇబ్బందులు తప్పినట్లవుతోంది.

సర్వేతో ప్రయోజనం

• ఫీవర్‌ సర్వేలో భాగంగా అధికార యంత్రాంగం ఇంటింటికీ వెళ్లడం ద్వారా ప్రజలకు మానసికంగా భరోసా కలుగుతుంది.
• కుటుంబంలో అనారోగ్యంగా ఉన్నట్లయితే ఎటూ వెళ్లకుండా ఇంటి ముంగిటకే వైద్య సేవలు రావడం ఎంతో ఊరట.
• ప్రస్తుతం డెల్టాగానీ, ఒమిక్రాన్‌ కేసులుగానీ ఆస్పత్రిలో చేరేంత సీరియస్‌గా ఉండటం లేదు.
• గతంలోనైతే స్వల్ప లక్షణాలున్న వారు కూడా ఆస్పత్రులకు పరుగులు తీయడంతో అనవసర ఇన్‌పేషెంట్ల సంఖ్య పెరిగి లక్షలాదిరూపాయలు ఖర్చు చేశారు.
• కానీ ఇప్పుడు ఆ పరిస్థితి లేదు. హోం ఐసొలేషన్‌లో ఉండటం వల్ల చాలామందికి నయమవుతోంది. సాధారణ జలుబు, జ్వరం ఉన్నట్లయితే అనవసరంగా ఆందోళన పడకుండా ఇంట్లోనే ప్రశాంతంగా ఉంటున్నారు. సీరియస్‌గా ఉన్న వారిని మాత్రమే ఆస్పత్రుల్లో చేర్చుతున్నారు.
• అనారోగ్యం ఉన్న వారికి యంత్రాంగం ఉచితంగా మందులు అందిస్తున్నది. గతంలో కొన్ని రకాల మందులను బ్లాక్‌ చేసి అధిక రేట్లకు అమ్మిన సందర్భాలు ఉన్నాయి.
• కొవిడ్‌ స్వల్ప లక్షణాలు ఉన్నట్లయితే గతంలో బయటకెళ్లి, ఆస్పత్రుల చుట్టూ తిరగడం వంటి పరిణామాలతో సామాజికంగానూ అనేక ఇబ్బందులు ఎదుర్కోవాల్సి వచ్చేది. ఇంటి చుట్టుపక్కల వారితోనూ ఇబ్బందిగా ఉండేది. కానీ ఇప్పుడు సర్వేలో భాగంగా వచ్చే యంత్రాంగం హడావుడి లేకుండా మందులు ఇచ్చి పోతుండడంతో హోం ఐసొలేషన్‌లో ఉంటూ త్వరగా నయమవుతున్నారు.

బయట మార్కెట్లో ప్రభుత్వమిచ్చే మందుల ధరలు

మందు ధర
అజిత్రోమైసిన్‌ 180.00
పారాసిటమాల్‌ 20.00
లెవోసెటిరిజైన్‌ 110.00
రానిటిడైన్‌ 10.00
విటమిన్‌-సి 16.00
మల్టీ విటమిన్‌ 80.00
విటమిన్‌-డి 120.00
మొత్తం 536.00