మాస్కులు ధరించి.. భౌతిక దూరం పాటించి..

• కొవిడ్‌ నిబంధనలతోప్రారంభమైన స్కూళ్లు
• తొలిరోజు జిల్లాలో 28,825 మంది
• విద్యార్థులు హాజరు

సుదీర్ఘ సెలవుల అనంతరం పాఠశాలలు, కళాశాలలు మంగళవారం తెరుచుకున్నాయి. సంక్రాంతి పండుగతోపాటు కరోనా కారణంగా ప్రభుత్వం సెలవులు ప్రకటించగా 24 రోజుల తర్వాత తిరిగి ప్రారంభమయ్యాయి. మాస్కులు ధరించి, శానిటైజర్‌ వెంట పెట్టుకొని విద్యార్థులు బడికి రాగా సిబ్బంది థర్మల్‌ స్క్రీనింగ్‌ చేసి లోపలికి పంపించారు. తొలిరోజు జిల్లాలో ప్రభుత్వ పాఠశాలల విద్యార్థులు 17,450 మంది(28శాతం), ప్రైవేట్‌ పాఠశాలల విద్యార్థులు 11,375 మంది (30 శాతం) హాజరయ్యారు.

భువనగిరి అర్బన్‌, ఫిబ్రవరి 1: సంక్రాంతి, కరోనా ఉధృతి కారణంగా పాఠశాలలకు సెలవులు ప్రకటించగా.. 24 రోజుల తర్వాత ప్రభుత్వ ఆదేశాలతో మంగళవారం జిల్లా వ్యాప్తంగా పునఃప్రారంభమయ్యాయి. జిల్లాలోని 734 ప్రభుత్వ పాఠశాలలు, 156 ప్రైవేట్‌ పాఠశాలల్లో కొవిడ్‌ నిబంధనల మేరకు పాఠశాలలకు వచ్చే విద్యార్థులకు థర్మల్‌ స్క్రీనింగ్‌, చేతులను శానిటైజ్‌ చేసి తరగతి గదుల్లోకి పంపించారు. విద్యార్థులు మాస్కులు ధరించి భౌతికదూరం పాటించేలా చర్యలు తీసుకున్నారు. సోమవారమే పాఠశాలల్లో గదులు, మురుగుదొడ్లు, తాగునీటి ట్యాంకులను శుభ్రం చేయించారు. ప్రభుత్వ పాఠశాలల్లోని 62,765 మంది విద్యార్థులకు మొదటి రోజు 17,450(28 శాతం)మంది హాజరయ్యారు. ప్రైవేట్‌ పాఠశాలల్లోని 38,236 మంది విద్యార్థులకు 11,375(30 శాతం)మంది వచ్చారు.

జాగ్రత్తలు పాటించేలా చర్యలు

• ప్రతి రోజూ పాఠశాలల్లోని తరగతి గదులను శుభ్రం చేయడం, ఉపాధ్యాయులు, సిబ్బంది, విద్యార్థులు మాస్కులు ధరించి భౌతికదూరం పాటించడం, విద్యార్థులకు థర్మల్‌ స్క్రీనింగ్‌, శానిటైజేషన్‌ చేసిన తర్వాతనే తరగతుల్లోకి వెళ్లేలా జాగ్రత్తలు తీసుకోనున్నారు. విద్యార్థులు ఇండ్ల నుంచే బాటిళ్లలో తాగునీరు తెచ్చుకునేలా చర్యలు తీసుకుంటున్నారు.
• యాదగిరిగుట్ట రూరల్‌ : యాదగిరిగుట్ట మండల వ్యాప్తంగా 46 ప్రభుత్వ పాఠశాలల్లో 3,787 మంది విద్యార్థులకు 1,200 మంది హాజరయ్యారు.
• మోత్కూరు : మండల కేంద్రంలోని ప్రభుత్వ ఉన్నత పాఠశాలతోపాటు దాచారం, పాటిమట్ల, బుజిలాపురం, కొండగడప, పొడిచేడు, దత్తప్పగూడెం, పాలడుగు లో ప్రత్యేక చర్యలు తీసుకున్నారు. మండల కేంద్రంలోని ప్రభుత్వ జూనియర్‌ కళాశాలలో తరగతులను నిర్వహించారు.
• రామన్నపేట మండలంలో..
• రామన్నపేట : మండలవ్యాప్తంగా తొలిరోజు 24 శాతం మంది విద్యార్థులు హాజరయ్యారు. విద్యార్థులకు థర్మల్‌ స్క్రీనింగ్‌ టెస్టులు, శానిటేషన్‌ చేశారు.