ఊరికి పోతున్నారా.. ఇల్లు జాగ్రత్త!

• తాళం వేసిన ఇండ్లల్లో దొంగతనాలు జరిగే అవకాశం
• జాగ్రత్తలు పాటించాలంటున్న పోలీసులు

నేరేడుచర్ల, జనవరి 12 : సంక్రాంతి పండుగకు ఇంటిల్లిపాది ఊరెళ్లేందుకు సిద్ధమవుతున్నారా.. జర జాగ్రత్తలు తీసుకోండి. ఊరెళ్లే హడావిడిలో ఇంటి భద్రత, విలువైన వస్తువుల గురించి మరిచిపోకండి. ఈ సమయంలో తాళం వేసిన ఇండ్లల్లో దొంగతనాలు జరిగే అవకాశం ఉంటుందని, జాగ్రత్తలు పాటించాలని పోలీసులు సూచిస్తున్నారు.

ఈ జాగ్రత్తలు తీసుకోవాలి..

• ఇంటికి తాళం వేసి ఊరెళ్లేవారు ఇల్లు చూడమని చుట్టుపక్కల వారికి చెప్పడం మంచిది. అపార్టుమెంట్‌ అయితే వాచ్‌మన్‌కు చెప్పి జాగ్రత్తలు తీసుకోవాలి.
• ఇంటి కిటికీలను మూసేయాలి. వాటికి ఉన్న బోల్ట్‌లు బిగించి ఉన్నాయో లేదో సరిచూసుకోవాలి.
• ఇంట్లో నగలు, నగదు ఉంచొద్దు. బ్యాంకు లాక్లర్లలో భద్రపరుచకోవడం క్షేమం.
• దూర ప్రాంతాలకు వెళ్లేవారు తమ ఇంటి చిరునామా, ఫోన్‌ నంబర్‌ను సంబంధిత పోలీసు స్టేషన్‌లో అందజేయాలి.
• రాత్రివేళ కొత్తవారు వస్తే వివరాలు తెలుసుకొని రిజిస్టర్‌లో నమోదు చేసుకోమని అపార్టుమెంట్‌ వాచ్‌మన్‌కు చెప్పాలి.
• అనుమానితులు కనిపిస్తే వెంటనే పోలీసులకు సమాచారం ఇవ్వాలి.
• ప్రయాణంలోనూ తగు జాగ్రత్తలు తీసుకోవాలి. డబ్బును చేతి సంచుల్లో, కర్ర బ్యాగుల్లో పెట్టొద్దు.
• ప్రయాణాల్లో కొత్తవారితో అప్రమత్తంగా ఉండాలి.
• అనుమానాస్పద వాహనాల్లో ప్రయాణించొద్దు.
• బంగారు ఆభరణాలు ధరించి ఆరుబయట నిద్రించొద్దు. ఇంట్లో పడుకున్నా కిటికీలు తెరిచిన వైపు పడుకోవద్దు.
• దుస్తుల్లో డబ్బులు పెట్టి కిటికీలకు, తలుపులకు తగిలించొద్దు.
• వీలైతే కుక్కలను పెంచుకోవాలి.
• ఇంట్లో ఎలాంటి శబ్ధం, అలికిడి వినిపించినా అప్రమత్తం కావాలి. అలసత్వం ప్రదర్శించొద్దు.

పండుగ ప్రయాణం విషాదం కావద్దు

సూర్యాపేట జిల్లా ఎస్పీ రాజేంద్రప్రసాద్‌
సూర్యాపేట రూరల్‌, జనవరి 12 : పండుగ ప్రయాణం విషాదం కావద్దని, పండుగలకు వెళ్లేవారు జాగ్రత్తలు పాటించాలని సూర్యాపేట జిల్లా ఎస్పీ రాజేంద్రప్రసాద్‌ సూచించారు. సూర్యాపేట మండలంలోని 65వ జాతీయ రహదారిపై జనగాం క్రాస్‌ రోడ్డు వద్ద ఏర్పాటు చేసిన చెక్‌పోస్టును బుధవారం ఆయన పరిశీలించి మాట్లాడారు. సంక్రాంతి పండుగ సందర్భంగా ట్రాఫిక్‌ సమస్య రాకుండా జాతీయ రహదారిపై చెక్‌పోస్టులు ఏర్పాటు చేసినట్లు తెలిపారు. వాహనదారులు నెమ్మదిగా వెళ్లాలని, ఇతరులకు ఇబ్బంది కలిగించొద్దని సూచించారు. జిల్లాలోని అన్ని మార్గాల్లో పెట్రోలింగ్‌ నిర్వహిస్తున్నామని, అత్యవసర సమయంలో డయల్‌ 100కు ఫోన్‌ చేసి పోలీస్‌ సేవలు పొందాలని అన్నారు. రహదారిపై బారికేడ్లు ఏర్పాటు చేశామని, వాహనదారులు రోడ్డు సూచికలు పాటించాలని, క్రాసింగ్‌ల వద్ద జాగ్రత్తగా వెళ్లాలని సూచించారు. ఆయన వెంట సూర్యాపేట రూరల్‌ సీఐ విఠల్‌రెడ్డి, పోలీస్‌ సిబ్బంది ఉన్నారు.