Degree Student Missing | మంగపేట : ‘ఈ చదువు నావల్ల కావడంలేదు. నావల్ల ఏమీ కాదట. అందరూ అంటున్నారు. కానీ నాకు చదువు రావడం లేదు. నెల నుంచి చనిపోవాలని అనిపిస్తోంది. నేను మీకు సమస్యగా ఉండొద్దని వెళ్లి పోతున్నా. నేను ఎవరినీ ప్రేమించలేదు. దూరంగా వెళ్లి చనిపోతున్నా. నా శవం కూడా దొరకదు’ అంటూ డిగ్రీ చదువుతున్న యువతి తల్లిదండ్రులకు లేఖ రాసి అదృశ్యమైంది. మహబూబాబాద్ జిల్లా మంగపేట మండలం బోరునర్సాపురంలో యువతి ఇంట్లో నుంచి వెళ్లిపోవడం కలకలం సృష్టిస్తోంది.
ఎస్సై తాహెర్బాబా కథనం ప్రకారం.. మంగపేట మండలం బోరునర్సాపురం గ్రామానికి చెందిన జనగాం కృష్ణ రెండో కూతురు కల్యాణి వరంగల్లో డిగ్రీ ఫస్టియర్ చదువుతోంది. చదువు కొనసాగించడం ఇష్టం లేక నాలుగు నెలలుగా ఇంటి వద్దే ఉంటోంది. దీంతో తనకు చదువు రాదని.. తనతో ఏమీ కాదని చుట్టుపక్కల వాళ్లు, సన్నిహితుల అంటుండటంతో తీవ్ర మనోవేదనకు గురైంది. బతికి ఎలాంటి ప్రయోజనం లేదని భావించి చనిపోవాలని నిర్ణయించుకుంది. ఈ క్రమంలో తల్లిదండ్రులకు ఓ లెటర్ రాసి ఈనెల 15న ఉదయం 9గంటలకు ఇంట్లో నుంచి వెళ్లిపోయింది. ఈ చదువులు తన వల్ల కావడం లేదని.. తన వల్ల ఏమీ కావడం లేదని అందరూ అంటున్నారని ఆ లెటర్లో పేర్కొంది. అందరూ ఎన్ని మాటలు అన్నా కూడా తనకు చదువు రావడం లేదని.. అందుకే సమస్యగా ఉండొద్దని వెళ్లిపోతున్నా అంటూ తన బాధను ఆ లేఖలో వెల్లగక్కింది. తాను ఎవరినీ ప్రేమించలేదని.. ఏ తప్పు చేయలేదని పేర్కొంది. తమకు సమస్యగా మారవద్దనే ఉద్దేశంతోనే ఇంట్లో నుంచి వెళ్లిపోతున్నానని పేర్కొంది. దూరంగా వెళ్లిపోతున్నా.. నా శవం కూడా దొరకదు అంటూ రాసుకొచ్చింది. కల్యాణి రాసిన లేఖ చూసి కంగారుపడిన తల్లిదండ్రులు, కుటుంబసభ్యులు ఎక్కడ వెతికినా ఆచూకీ లభించలేదు. దీంతో శుక్రవారం నాడు పోలీసులకు ఫిర్యాదు చేశారు. కాగా కనిపించకుండా పోయిన కల్యాణి ఆచూకీ తెలిస్తే ఎస్సై సెల్ 9440795241, రైటర్ సెల్ 738293503 నంబర్లకు అందించాలని ఎస్సై ప్రజలకు సూచించారు.