రెట్టింపు వినోదం ఖాయం

‘డీజే టిల్లు’ చిత్రం ద్వారా యూత్‌కు బాగా చేరువయ్యారు హీరో సిద్ధు జొన్నలగడ్డ హైదరాబాద్‌ బస్తీ యువకుడిగా ఆయన పండించిన హాస్యం అందరికి గుర్తుండిపోయింది.

‘డీజే టిల్లు’ చిత్రం ద్వారా యూత్‌కు బాగా చేరువయ్యారు హీరో సిద్ధు జొన్నలగడ్డ హైదరాబాద్‌ బస్తీ యువకుడిగా ఆయన పండించిన హాస్యం అందరికి గుర్తుండిపోయింది. ఇప్పుడీ సినిమాకు సీక్వెల్‌గా ‘టిల్లు స్వేర్‌’ తెరకెక్కుతున్న విషయం తెలిసిందే. మల్లిక్‌ రామ్‌ దర్శకత్వం వహిస్తున్న ఈ చిత్రాన్ని సితార ఎంటర్‌టైన్‌మెంట్‌ పతాకంపై సూర్యదేవర నాగవంశీ నిర్మిస్తున్నారు. అనుపమ పరమేశ్వరన్‌ కథానాయిక. మార్చి 29న ప్రేక్షకుల ముందుకురానుంది.

వాలెంటైన్స్‌ డేను పురస్కరించుకొని బుధవారం ఈ సినిమా ట్రైలర్‌ను విడుదల చేశారు. ప్రేయసి రాధిక కారణంగా చిక్కుల్లో పడ్డ టిల్లు.. సీక్వెల్‌లో కూడా అదే తరహా సమస్యలను ఎదుర్కొంటూ కనిపించారు. ఆద్యంతం హాస్య ప్రధానంగా ఊహించని ట్విస్ట్‌లతో ట్రైలర్‌ ఆసక్తిని పెంచింది. తొలి భాగం కంటే రెట్టింపు వినోదంతో ఈ సినిమాను తెరకెక్కించామని, ఇప్పటికే విడుదలైన పాటలు వైరల్‌ అవుతున్నాయని, టిల్లు పంచే వినోదం ప్రేక్షకుల్ని కడుపుబ్బా నవ్విస్తుందని చిత్ర బృందం పేర్కొంది. ఈ చిత్రానికి సినిమాటోగ్రఫీ: సాయిప్రకాష్‌ ఉమ్మడిసింగు, సంగీతం: రామ్‌ మిరియాల.