స‌ర్కారు వారి పాట‌పై మ‌హేశ్‌బాబు ఫోక‌స్‌.. షూటింగ్‌లో పాల్గొనేది ఎప్పుడంటే..

January 30, 2022 / 07:42 PM IST

Sarkaru vaari paata Update | సూపర్ స్టార్ మహేశ్‌ బాబు కొవిడ్ నుంచి కోలుకున్నారు. ఉత్సాహంగా షూటింగ్‌కు సిద్ధమవుతున్నారు. ఆయన నటిస్తున్న సర్కారు వారి పాట సినిమా చిత్రకరణ కొత్త షెడ్యూల్‌కు సన్నాహాలు చేసుకుంటోంది. ఈ షెడ్యూల్‌లో మహేశ్‌ బాబు జాయిన్ కాబోతున్నారు. దర్శకుడు పరశురామ్ పెట్ల రూపొందిస్తున్న సర్కారు వారి పాట సినిమా మరో నెలన్నరలో షూటింగ్ కంప్లీట్ చేసుకోనుంది. ఇది పెద్ద కథ కావడంతో చిత్రీకరణకు ఎక్కువ సమయం పడుతోంది.

కరోనా రెండు వేవ్ ల వల్ల షూటింగ్ వాయిదా పడుతూ వచ్చింది. ఇటీవల మహేశ్‌ బాబుకు కొవిడ్ సోకడం, ఆ తర్వాత కీర్తి సురేశ్‌ కూడా వైరస్ బారిన పడటంతో కొత్త షెడ్యూల్ ఆలస్యమవుతూ వచ్చింది. థర్డ్ వేవ్ నుంచి ఇండస్ట్రీ కోలుకుంటున్న ఈ టైమ్‌లో భారీ షెడ్యూల్‌కు యూనిట్ సిద్ధమవుతోంది. ఈ షెడ్యూల్‌లో సినిమా మేజర్ పార్ట్ పూర్తి చేయబోతున్నారు. 14 రీల్స్ ప్ల‌స్, మైత్రీ మూవీ మేకర్స్ సంయుక్తంగా నిర్మిస్తున్న సర్కారు వారి పాట చిత్రంలో మహేశ్‌ బాబు ప్రొడక్షన్ కూడా భాగస్వామిగా వ్యవహరిస్తోంది.

బ్యాంకింగ్ రంగ నేపథ్యంతో యాక్షన్ ఎంటర్ టైనర్‌గా ఈ సినిమా రూపొందుతోంది. ఈ సినిమాకు థమన్ సంగీతాన్ని అందించారు. ఈ చిత్రంలోని తొలి లిరికల్ సాంగ్ ను ఫిబ్రవరి 14న వాలైంటైన్స్ డే సందర్భంగా విడుదల చేయబోతున్నట్లు చిత్ర బృందం ప్రకటించింది. సుబ్బరాజు, వెన్నెల కిషోర్, సముద్రఖని ఇతర కీలక పాత్రలు పోషిస్తున్నారు. సర్కారు వారి పాట చిత్రీకరణలో ఫిబ్రవరి 2 తేదీ నుంచి మహేశ్‌ బాబు చేరబోతున్నారు. ఈ షెడ్యూల్‌తో మహేశ్‌ బాబు తన పార్ట్ కంప్లీట్ చేస్తారని సమాచారం.

మరోవైపు సినిమా చిత్రీకరణతో పాటు సమాంతరంగా నిర్మాణాంతర కార్యక్రమాలు కూడా జరుగుతున్నాయి. ముందుగా ఈ సినిమాకు ఏప్రిల్‌లో విడుదల తేదీ అనుకున్నా, అది మరికాస్త ఆలస్యమయ్యేలా ఉంది. ఏదైనా చిత్ర బృందం నుంచి అధికారికంగా ప్రకటన వచ్చేవరకు వేచి చూడాలి.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి