బాలీవుడ్ (Bollywood)లో మూడు దశాబ్దాలు పైబడిన స్టార్ డమ్ సల్మాన్ ఖాన్ (Salman khan)ది. ఇప్పటికీ ఆయన సినిమాలకు అదే క్రేజ్. ఇంత సుదీర్ఘమైన నట ప్రయాణంలో ఏ రోజూ దర్శకత్వం వైపు అడుగులు వేయలేదు సల్మాన్. నటుడిగానే కొనసాగారు. దర్శకుడికి తోచిన సలహాలు ఇచ్చేవారేమో కానీ నేరుగా మెగాఫోన్ పట్టింది లేదు. అయితే ఇప్పుడా టైమ్ వచ్చిందంటున్నారు సల్మాన్ సన్నిహితులు. భాయ్ డైరెక్టర్ అయ్యే సమయం దగ్గర్లోనే ఉందంటున్నారు.
సల్మాన్ ఖాన్ కొత్త సినిమా కభీ ఈద్ కభీ దివాలీ (Kabhi Eid Kabhi Diwali) త్వరలో సెట్స్ మీదకు వెళ్లబోతున్నది. ఈ చిత్రానికి ఫర్హాద్ సమ్జీ (Farhad samji) దర్శకత్వం వహించాలి. అయితే ఈ చిత్రానికి ఫర్హాద్ బదులు సల్మాన్ దర్శకత్వం చేయాలనుకుంటున్నారట. ఈ విషయాన్ని సల్మాన్ బృందం చెబుతోంది. వారి మాటల ప్రకారం చూస్తే సల్మాన్ గత ఐదేళ్లుగా తన దర్శకులను గైడ్ చేస్తూనే ఉన్నాడట.
అధికారికంగా దర్శకుడు కాకపోయినా చాలా వరకు సినిమాను తానే దగ్గరుండి చూసుకుంటాడట. సెట్స్ లోనే కాదు ఎడిటింగ్ టేబుల్ దగ్గరా సల్మాన్ ఉండాల్సిందేనన్నది వారు చెబుతున్న సమాచారం. ఈ క్రియేటివ్ డిఫరెన్సెస్ వల్లే ప్రముఖ దర్శకుడు సంజయ్ లీలా భన్సాలీ సల్మాన్ తో ఇన్షాల్లా అనే చిత్రాన్ని ప్రకటించి ఆపేశారని బాలీవుడ్ లో టాక్ నడుస్తున్నది.
దిగ్గజ దర్శకుడైన భన్సాలీ సల్మాన్ ఆలోచనల మేరకు దర్శకత్వం చేసేందుకు ఒప్పుకోకపోవడమే ఈ ప్రాజెక్ట్ అటకెక్కడానికి కారణమంటున్నారు. ఇందులో నిజానిజాలు అటు సల్మాన్, ఇటు భన్సాలీ ఎవరో ఒకరు స్పందిస్తేనే తెలుస్తాయి.