ఒక అమ్మాయిని ఇష్టపడ్డ ఆర్‌.నారాయణమూర్తి.. పెండ్లి చేసుకుందాం అనుకుంటే..

August 29, 2021 / 08:09 PM IST

ఆర్.నారాయణమూర్తి అంటే వెంటనే అందరికీ గుర్తొచ్చేది ఉద్యమ సినిమాలు. విప్లవకారుడిగా ఎన్నో సినిమాల్లో అద్భుతమైన నటనతో తనకంటూ ప్రత్యేకమైన అభిమానుల్ని సంపాదించుకున్నాడు. పీపుల్స్ స్టార్‌గా ఎదిగాడు నారాయణ మూర్తి. దాదాపు 45 ఏళ్లుగా తెలుగు ఇండస్ట్రీలో ఉన్న ఈయ‌న‌.. పెళ్లి మాత్రం చేసుకోకుండా బ్ర‌హ్మ‌చారిగా మిగిలిపోయాడు. విప్ల‌వ భావ‌జాలం ఎక్కువ‌గా ఉన్న నారాయ‌ణ‌మూర్తి కావాల‌నే పెండ్లి చేసుకోలేద‌ని అంద‌రూ అనుకుంటారు. కానీ అది నిజం కాదంట‌. మ‌న‌సుకు న‌చ్చిన‌ అమ్మాయిని పెండ్లి చేసుకొని ఆనంద‌మైన జీవితం గ‌డపాల‌ని క‌ల‌లు క‌న్నాడంట‌. కానీ జీవితం త‌న‌కు అలాంటి అవ‌కాశం ఇవ్వ‌లేద‌ని చెబుతున్నాడు నారాయ‌ణ‌మూర్తి. త‌న ల‌వ్ ఫెయిల్యూర్ గురించి ఒక ఇంట‌ర్వ్యూలో మ‌న‌సు విప్పాడు.

ఆర్‌. నారాయ‌ణ‌మూర్తి యుక్త వయసులో ఉన్నప్పుడు ఒక అమ్మాయిని చూసి ఇష్టపడ్డాడు. ఆమెని పెండ్లి చేసుకోవాలని అనుకున్నాడు. ఇదే విషయం అమ్మాయి కుటుంబంతో కూడా చెప్పాడు. కానీ కులాలు వేరుకావడంతో పాటు నారాయ‌ణ‌మూర్తి న‌టుడిగా ఉండ‌టం అమ్మాయి త‌ల్లిదండ్రుల‌కు న‌చ్చ‌లేదు. దీంతో వాళ్లు పెండ్లికి ఒప్పుకోలేదు. అయితే ఇష్టపడిన అమ్మాయిని కాకుండా వేరే అమ్మాయిని పెండ్లి చేసుకోవ‌డం ఆయ‌న మ‌న‌సుకు న‌చ్చ‌లేదు. అదే సమయంలో సినిమాల్లో గుర్తింపు తెచ్చుకోవాలని దానిపై మొత్తం దృష్టి పెట్టాడు. అందుకే ఎవ‌ర్నీ పెండ్లి చేసుకోకుండా బ్రహ్మ‌చారిగా ఉండిపోయాడు. అయితే పెండ్లి చేసుకోక‌పోవ‌డం గురించి ఆయ‌న ఇప్పుడు బాధ‌ప‌డుతున్నారు. వ‌య‌సు పెరుగుతున్నకొద్దీ క‌చ్చితంగా ఒక‌రు తోడు ఉండాల‌ని.. అలా తోడు లేని జీవితం న‌ర‌కం అని ఇప్ప‌టి యువ‌త‌కు ఆయ‌న స‌ల‌హా ఇస్తున్నారు. ఏ వ‌య‌సులో జ‌ర‌గాల్సిన ముచ్చ‌ట ఆ వ‌య‌సులో జ‌ర‌గాల‌ని లేక‌పోతే త‌ర్వాత బాధ‌ప‌డ‌తార‌ని త‌న అనుభ‌వంతో చెబుతున్నాడు పీపుల్స్ స్టార్.

త‌న జీవితంలో జ‌రిగిన మ‌రో ఘ‌ట‌న గురించి కూడా ఆర్‌. నారాయ‌ణ‌మూర్తి పంచుకున్నాడు. త‌న అమ్మ నాన్న ఎంతో మంచివాళ్ల‌ని.. కాక‌పోతే వారికి కులం పట్టింపులు ఎక్కువ‌గా ఉండేవ‌ని చెప్పుకొచ్చాడు. అలా ఒక‌సారి తాను అంటరాని వ్య‌క్తిని ఆలింగ‌నం చేసుకున్నానే కార‌ణంతో ఇంట్లో నుంచి గెంటేశార‌ని ఎమోష‌న‌ల్ అయ్యాడు.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి