High Fibre Jelly | జీర్ణక్రియకు మేలు చేసే ఫైబర్ జెల్లీ.. తయారీ ఇలా..

రోజువారీ ఆహారంలో తగినంత పీచు పదార్థం తీసుకోవడం జీర్ణక్రియ సక్రమంగా సాగడానికి, మలవిసర్జన క్రమబద్ధంగా ఉండడానికి, పేగుల ఆరోగ్యాన్ని కాపాడుకోవడానికి ఎంతో అవసరం. అయితే, ఆహారం ద్వారా మాత్రమే శరీరానికి సరిపడా పీచు పదార్థాన్ని పొందడం చాలామందికి సాధ్యం కావడం లేదు.

High Fibre Jelly | రోజువారీ ఆహారంలో తగినంత పీచు పదార్థం తీసుకోవడం జీర్ణక్రియ సక్రమంగా సాగడానికి, మలవిసర్జన క్రమబద్ధంగా ఉండడానికి, పేగుల ఆరోగ్యాన్ని కాపాడుకోవడానికి ఎంతో అవసరం. అయితే, ఆహారం ద్వారా మాత్రమే శరీరానికి సరిపడా పీచు పదార్థాన్ని పొందడం చాలామందికి సాధ్యం కావడం లేదు. ఈ సమస్యకు పరిష్కారంగా పోషకాహార నిపుణులు సులభంగా తయారు చేసుకోగలిగే అధిక పీచు పదార్థం కలిగిన జెల్లీ తయారీ విధానాన్ని వెల్లడించారు. ఈ జెల్లీ మలవిసర్జన సజావుగా జరిగేందుకు తోడ్పడడంతోపాటు రక్తంలో చక్కెర స్థాయిలు స్థిరంగా ఉండేందుకు కూడా సహాయపడుతుందని పేర్కొంటున్నారు. తాజాగా తన ఇన్‌స్టాగ్రామ్‌ వీడియోలో పోషకాహార నిపుణురాలు దీపశిఖా జైన్‌ ఈ జెల్లీ తయారీ విధానాన్ని వివరించారు. ఈ వంటకాన్ని ఇంతకు ముందు ఎందుకు ప్రయత్నించలేదా అని అనిపిస్తోందని, ఇది జెల్లీలా ఉన్నప్పటికీ అధిక మొత్తంలో పీచు పదార్థాన్ని అందిస్తుందని ఆమె తెలిపారు. ప్రతిరోజూ రాత్రి నిద్రపోయే ముందు ఈ జెల్లీని ఒక చెంచా తీసుకుంటానని వెల్లడించారు. దీని తయారీ కూడా ఎంతో సులభమని వివరించారు.

అధిక పీచు పదార్థం కలిగిన జెల్లీని ఎలా తయారు చేయాలి?

ముందుగా ఒక చిన్న గాజు సీసా తీసుకోవాలి. అందులో రెండు టేబుల్‌ స్పూన్ల ఇసబ్గోల్‌ లేదా సైలియం హస్క్‌ వేయాలి. ఈ జెల్లీ తయారీలో ఇదే ప్రధాన పదార్థమని ఆమె తెలిపారు. అనంతరం అర కప్పు కొంబుచా కలపాలి. అయితే, అందులో జీవించి క్రియాశీలంగా ఉండే సూక్ష్మజీవుల క‌ల్చ‌ర్‌ ఉన్నాయో లేదో నిర్ధారించుకోవాలని సూచించారు. కొంబుచా అనేది పులియబెట్టిన టీ అని, ఇది పేగుల ఆరోగ్యానికి ఎంతో మేలు చేస్తుందని ఆమె వివరించారు. ఈ పదార్థాలన్నింటినీ బాగా కలిపిన తర్వాత కొద్దిగా నీటిని జోడించాలి. మరోసారి మిశ్రమాన్ని బాగా కలిపి రాత్రంతా రిఫ్రిజిరేటర్‌లో ఉంచాలి. మరుసటి రోజుకు పేగుల ఆరోగ్యానికి తోడ్పడే జెల్లీ సిద్ధమవుతుందని దీపశిఖా జైన్‌ తెలిపారు. ఈ జెల్లీ తీసుకోవడం వల్ల రక్తంలో చక్కెర స్థాయిలు స్థిరంగా ఉండడంతోపాటు మలవిసర్జన మెరుగుపడినట్లు ఆమె తన వీడియోలో వెల్లడించారు. అయితే, ఈ వంటకం తన సొంత ఆలోచన కాదని, ఆన్‌లైన్‌లో చూసి తెలుసుకున్నానని, రుచిగా కూడా ఉంటుందని ఆమె స్పష్టం చేశారు.

ఎంత తీసుకోవాలి..?

ఈ జెల్లీని రోజుకు ఒకటి నుంచి రెండు టేబుల్‌ స్పూన్ల పరిమితిలో మాత్రమే తీసుకోవాలని ఆమె సూచించారు. అధికంగా తీసుకుంటే జీర్ణవ్యవస్థకు సంబంధించిన అసౌకర్యాలు తలెత్తే అవకాశం ఉందని హెచ్చరించారు. ముఖ్యంగా సైలియం హస్క్‌ తీసుకునేటప్పుడు తగినంత ద్రవం తీసుకోవడం అవసరం. మింగడంలో ఇబ్బందులు ఉన్నవారు లేదా మందులు వాడుతున్నవారు దీనిని ఆహారంలో చేర్చుకునే ముందు వైద్య నిపుణుల సలహా తీసుకోవడం మంచిది. ఈ జెల్లీ సమతుల్య ఆహారానికి ప్రత్యామ్నాయం కాదని గుర్తుంచుకోవాలి.