విజయాలుంటేనే ఇక్కడ విలువిస్తారు!

‘నేను కొంచెం గట్టిగా మాట్లాడితే దిల్‌రాజుకు ఆటిట్యూడ్‌ వచ్చిందంటారు. హీరో నితిన్‌తో చేసిన రీసెంట్‌ ఇంటర్వ్యూలో తనలోని గుడ్‌, బ్యాడ్‌ క్వాలిటీస్‌ ఏంటో చెప్పమని నితిన్‌ నన్నడిగాడు.

‘నేను కొంచెం గట్టిగా మాట్లాడితే దిల్‌రాజుకు ఆటిట్యూడ్‌ వచ్చిందంటారు. హీరో నితిన్‌తో చేసిన రీసెంట్‌ ఇంటర్వ్యూలో తనలోని గుడ్‌, బ్యాడ్‌ క్వాలిటీస్‌ ఏంటో చెప్పమని నితిన్‌ నన్నడిగాడు. ‘అల్లు అర్జున్‌కంటే నువ్వే ముందు కెరీర్‌ మొదలుపెట్టావ్‌..కానీ ఆయన రేంజ్‌కు వెళ్లలేకపోయావు’ అని ఓ శ్రేయోభిలాషిగా నా మనసులోని మాటను చెప్పా. మా ఇద్దరి మధ్య ఉన్న అనుబంధం అలాంటిది. దానిని నెగెటివ్‌ కోణంలో చూడొద్దు’ అన్నారు అగ్ర నిర్మాత దిల్‌రాజు. ఆయన నిర్మాణంలో నితిన్‌ కథానాయకుడిగా నటించిన ‘తమ్ముడు’ చిత్రం ఈ నెల 4న విడుదలకానుంది. శ్రీరామ్‌ వేణు దర్శకుడు. ఈ సందర్భంగా బుధవారం దిల్‌రాజు పాత్రికేయులతో ముచ్చటించారు. సినిమా విశేషాలతో పాటు ఇండస్ట్రీ తాజా పరిణామాలపై ఆసక్తికరమైన అంశాల్ని పంచుకున్నారు.

• ఈ సినిమా కథ 80శాతం అటవీ నేపథ్యంలోనే నడుస్తుంది. కొన్ని యాక్షన్‌ ఎపిసోడ్స్‌లో వయొలెన్స్‌ ఉండటం వల్ల ‘ఏ’ సర్టిఫికెట్‌ వచ్చింది. రెండు యాక్షన్‌ ఎపిసోడ్స్‌ తీసివేస్తే ‘యు/ఏ’ ఇస్తామని చెప్పారు. ప్రేక్షకులకు అద్భుతమైన విజువల్‌ ఎక్స్‌పీరియన్స్‌ అందించాలన్నదే మా ఉద్దేశ్యం. అందుకే ఫైట్‌ సీక్వెన్స్‌ తీసివేయకుండా ‘ఏ’ సర్టిఫికెట్‌కు అంగీకరించాం. కథాపరంగా చాలా సింపుల్‌ స్టోరీ ఇది. గొప్ప అనుబంధం కలిగిన అక్కాతమ్ముడు, వారి మధ్య అనుకోని సమస్య రావడం, దాని పరిష్కారం కోసం వారు చేసే ప్రయత్నాలే ఈ చిత్ర ఇతివృత్తం.
• ఇండస్ట్రీని ఆర్థికంగా నష్టం చేసే పైరసీ వంటి చర్యలతో పాటు నెగెటివ్‌ ప్రచారాన్ని ఓ క్రమపద్ధతిలో ఎదుర్కొంటూ వెళ్లాలి. రివ్యూస్‌ రాసేముందు నిర్మాతల సైడ్‌ నుంచి కూడా కాస్త ఆలోచించాలి. ఉద్దేశ్యపూర్వకంగా చేసే నెగెటివ్‌ ప్రచారం వల్ల ఎక్కువగా నష్టపోయేది నిర్మాతనే. పైరసీని అరికట్టడానికి ఇండస్ట్రీ నుంచి కఠినమైన చర్యలు తీసుకుంటున్నాం. కేంద్ర ప్రభుత్వం కూడా ఈ విషయంలో బాగా సపోర్ట్‌ చేస్తున్నది.
• గట్టిగా మాట్లాడితే నాకు ఆటిట్యూడ్‌ అంటారు. నా వ్యక్తిత్వం అలాంటిది కాదు. సక్సెస్‌ఫుల్‌ సినిమాలు తీసినన్ని రోజులే నాకు ఇక్కడ విలువిస్తారు. నిర్మాతగా 22 ఏళ్ల ప్రయాణం పూర్తయింది. ఇంకా ఎన్నేళ్లు సినిమాలు చేస్తానో నాకు తెలియదు. ఇండస్ట్రీలోకి కొత్త వాళ్లు వస్తూనే ఉంటారు. ఇదొక ప్రాసెస్‌. విజయాలు లేనప్పుడు బయటి వారు రిసీవ్‌ చేసుకునే పద్ధతి ఎలా ఉంటు ందో కూడా నాకు తెలుసు. ఈ విషయాలన్నింటిపై నాకు పూర్తి స్పష్టత ఉంది కాబట్టి ఆటిట్యూడ్‌ చూపించడానికి ఆస్కారమే లేదు.
• ఇండస్ట్రీలో నూతన ప్రతిభను ప్రోత్సహించాలనే లక్ష్యంతో దిల్‌రాజు డ్రీమ్స్‌ మొదలుపెట్టాం.తొలిరోజే 12వేల అప్లికేషన్స్‌ వచ్చాయి. అందులో నిర్మాతల విభాగానికే 81 అప్లికేషన్స్‌ రాగా..వాటిని పరిశీలించి ఏడింటిని ఫైనలైజ్‌ చేశాం. ఎఫ్‌డీసీ నుంచి ఇటీవల గద్దర్‌ అవార్డ్స్‌ అందించాం. త్వరలో చిల్డ్రన్‌ ఫిలిం ఫెస్టివల్‌ను తిరిగి మొదలుపెట్టాలనుకుంటున్నాం. ప్రస్తుతం మా బ్యానర్‌లో రౌడీ జనార్ధన, ఎల్లమ్మ, దేత్తడి చిత్రాలు ప్రొడక్షన్‌లో ఉన్నాయి. వచ్చే ఏడాది అనిల్‌ రావిపూడి దర్శకత్వంలో ఓ సినిమా, ‘మార్కో’ దర్శకుడు హనీఫ్‌తో ఓ ప్రాజెక్ట్‌ ఉంటుంది. అలాగే ఇద్దరు కొత్త దర్శకులతో సినిమాలు చేయబోతున్నాం.