DSP in Pawan kalyan Movie | పవన్ కళ్యాణ్ కోసం నటుడిగా మారిన దేవి శ్రీ ప్రసాద్..?

January 24, 2022 / 04:32 PM IST

DSP in Pawan kalyan movie | తెలుగు ఇండస్ట్రీలో రాక్ స్టార్ దేవి శ్రీ ప్రసాద్‌కు ఉన్న ఫాలోయింగ్ చూసి కొంతమంది హీరోలు కూడా కుళ్లుకుంటారు. పేరుకు మ్యూజిక్ డైరెక్టర్ అయినా కూడా హీరోలకు ఏమాత్రం తీసిపోని ఇమేజ్ ఎంజాయ్ చేస్తున్నాడు DSP. అందుకే ఈయనను హీరో చేయాలనే ఆలోచన కూడా చాలా మంది నిర్మాతలు, దర్శకులు చేశారు. ఆ మధ్య సుకుమార్ అయితే ఏకంగా తన దర్శకత్వంలో దేవి శ్రీ ప్రసాద్ ను హీరోగా పరిచయం చేస్తూ ఓ సినిమా చేస్తున్నట్లు అనౌన్స్ చేశాడు కూడా. దిల్ రాజు ఈ సినిమాను నిర్మించాలనుకున్నాడు. అనుకోని కారణాలతో ఈ సినిమా ఆగిపోయింది. ఇదిలా ఉంటే ఇప్పటికే కొన్ని సినిమాల్లో అలా తళుక్కున మెరిసి మాయమయ్యాడు దేవిశ్రీప్ర‌సాద్‌. కానీ గుర్తుండిపోయే పాత్ర మాత్రం ఇప్పటివరకు చేయలేదు. అయితే ఇప్పుడు ఆ సమయం వచ్చినట్లు తెలుస్తోంది. పవన్ కళ్యాణ్ సినిమాలో డీఎస్పీ ఒక కీలక పాత్రలో నటించబోతున్నారని ప్రచారం జరుగుతోంది.

పవన్ ప్రస్తుతం వరుస సినిమాలు చేస్తున్నాడు. అందులో భీమ్లా నాయక్ విడుదలకు సిద్ధమైంది. హరిహర వీరమల్లు సినిమా సగం షూటింగ్ పూర్తయింది. వీటి తర్వాత హరీశ్‌ శంకర్ దర్శకత్వంలో భవదీయుడు భగత్ సింగ్ సినిమా చేయబోతున్నాడు పవన్ కళ్యాణ్. మైత్రి మూవీ మేకర్స్ ఈ సినిమాను భారీ బడ్జెట్ తో నిర్మించబోతుంది. గబ్బర్ సింగ్ కాంబినేషన్ రిపీట్ అవుతుండటంతో అంచనాలు తారాస్థాయిలో ఉన్నాయి. ఈ సినిమాలో సంగీత దర్శకుడు దేవి శ్రీ ప్రసాద్ కీలక పాత్రలో నటించబోతున్నారని ప్రచారం జరుగుతోంది. కథను మలుపు తిప్పే అత్యంత కీలకమైన పాత్ర ఇది అని.. దేవిని ఈ పాత్ర కోసం దర్శకుడు హరీశ్‌ ఒప్పించినట్లు వార్తలు వినిపిస్తున్నాయి. ఠాగూర్ సినిమాలో వీవీ వినాయక్ తరహా పాత్ర ఇది అని తెలుస్తుంది. ఒకవేళ ఈ సినిమాలో క్యారెక్టర్ క్లిక్ అయితే దేవి నటుడిగా కూడా బిజీ అవ్వడం ఖాయం. సమ్మర్ తర్వాత సినిమా షూటింగ్ మొదలు కానుంది. 2023 సమ్మర్‌లో భవదీయుడు భగత్ సింగ్ విడుదల కానుంది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి