దుమ్మురేపిన స్టాక్‌ మార్కెట్లు

వరుస లాభాల్లో దూసుకుపోతున్న దేశీయ స్టాక్‌ మార్కెట్లు శుక్రవారం అదరగొట్టాయి. మదుపరులు పెట్టుబడులతో కదం తొక్కడంతో గత రికార్డులన్నీ చెరిగిపోయాయి. అటు బాంబే స్టాక్‌ ఎక్సేంజ్‌ సూచీ సెన్సెక్స్‌, ఇటు నేషనల్‌ స్టాక్‌ ఎక్సేంజ్‌ సూచీ నిఫ్టీ ఆల్‌టైమ్‌ హైని తాకాయి.

• ఆల్‌టైమ్‌ హైకి బీఎస్‌ఈ, ఎన్‌ఎస్‌ఈ సూచీలు
• 803 పాయింట్లు పుంజుకుని 64,719 వద్ద ముగిసిన సెన్సెక్స్‌
• 217 పాయింట్లు ఎగబాకి 19,189 వద్ద నిలిచిన నిఫ్టీ
• తొలిసారి రూ.296 లక్షల కోట్లు దాటేసిన మదుపరుల సంపద

ముంబై, జూన్‌ 30: వరుస లాభాల్లో దూసుకుపోతున్న దేశీయ స్టాక్‌ మార్కెట్లు శుక్రవారం అదరగొట్టాయి. మదుపరులు పెట్టుబడులతో కదం తొక్కడంతో గత రికార్డులన్నీ చెరిగిపోయాయి. అటు బాంబే స్టాక్‌ ఎక్సేంజ్‌ సూచీ సెన్సెక్స్‌, ఇటు నేషనల్‌ స్టాక్‌ ఎక్సేంజ్‌ సూచీ నిఫ్టీ ఆల్‌టైమ్‌ హైని తాకాయి. ఉదయం ఆరంభం నుంచే దూకుడు మీదున్న మార్కెట్లు.. సమయం గడుస్తున్నకొద్దీ పెరుగుతూపోయాయి. ఈ క్రమంలోనే చివరకు సెన్సెక్స్‌ 803.14 పాయింట్లు లేదా 1.26 శాతం ఎగిసి మునుపెన్నడూ లేనివిధంగా 64వేల మార్కుకు ఎగువన 64,718.56 వద్ద ముగిసింది. ఒకానొక దశలో 853.16 పాయింట్లు పుంజుకుని 64,768.58 వద్దకు చేరి సరికొత్త ఇంట్రా-డే హైని నెలకొల్పింది. నిఫ్టీ సైతం 216.95 పాయింట్లు లేదా 1.14 శాతం ఎగబాకి తొలిసారి 19వేల స్థాయిని అధిగమించి 19,189.05 వద్ద నిలిచింది. ఇంట్రా-డేలోనూ 229.6 పాయింట్లు అందుకుని 19,201.7 వద్దకు వెళ్లింది.

లైఫ్‌టైమ్‌ హైకి మార్కెట్‌ క్యాప్‌

బాంబే స్టాక్‌ ఎక్సేంజ్‌ (బీఎస్‌ఈ)లో నమోదైన సంస్థల మార్కెట్‌ విలువ లైఫ్‌టైమ్‌ హైకి వెళ్లింది. వరుసగా మూడు రోజులు మార్కెట్లు లాభాల్లో కదలాడిన నేపథ్యంలో మదుపరుల సంపద ఏకంగా రూ.296.48 లక్షల కోట్లను తాకింది. ఈ మూడు రోజుల్లో రూ.5,80,740.05 కోట్లు ఎగిసి రూ.2,96,48,153.59 కోట్లకు చేరింది. దీంతో ఇంతకుముందున్న రూ.294.36 లక్షల కోట్ల రికార్డు కనుమరుగైపోయినైట్టెంది.

మార్కెట్‌ లాభాలకు కారణాలు

• విదేశీ మదుపరుల పెట్టుబడులు
• అంతర్జాతీయ స్టాక్‌ మార్కెట్లలో లాభాలు
• ఆకట్టుకున్న ఇన్ఫీ, ఆర్‌ఐఎల్‌, హెచ్‌డీఎఫ్‌సీల షేర్లు
• అమెరికాలో తొలగిపోతున్న మాంద్యం భయాలు
• ఈసారి వర్షాలు సమృద్ధిగా కురుస్తాయన్న అంచనాలు
• ఈ వారం 1,739.19 పాయింట్లు పెరిగిన సెన్సెక్స్‌. 523.55 పాయింట్లు వృద్ధి చెందిన నిఫ్టీ
• మెరిసిన ఐటీ, టెక్నాలజీ, ఆటో, క్యాపిటల్‌ గూడ్స్‌, ఇండస్ట్రియల్స్‌, ఆర్థిక సేవలు, ఎనర్జీ రంగాల షేర్లు
• అత్యధికంగా 4 శాతానికిపైగా పుంజుకున్న ఎం & ఎం షేర్‌ విలువ
• 0.67%, 0.51 % చొప్పున ఎగిసిన బీఎస్‌ఈ మిడ్‌క్యాప్‌, స్మాల్‌క్యాప్‌
• ఆసియా మార్కెట్లలో దక్షిణ కొరియా, చైనాతోపాటు అమెరికా, ఐరోపాలోని ప్రధాన మార్కెట్లన్నీ లాభాల్లోనే
• జూన్‌ 28, 2023, 64,000
• నవంబర్‌ 30, 2022, 63,000
• అక్టోబర్‌ 19, 2021, 62,000
• అక్టోబర్‌ 14, 2021, 61,000
• సెప్టెంబర్‌ 24, 2021, 60,000