55 వేల దిగువకు సెన్సెక్స్‌

• మార్కెట్లకు రుచించని ఆర్బీఐ వడ్డీరేట్ల పెంపు

ముంబై, జూన్‌ 8: రిజర్వు బ్యాంక్‌ వడ్డీరేట్లను పెంచుతూ తీసుకున్న నిర్ణయం స్టాక్‌ మార్కెట్లకు రుచించలేదు. వరుసగా నాలుగోరోజు బుధవారం సూచీలు తీవ్ర ఒడిదుడుకులకు లోనయ్యాయి. విదేశీ ఇన్వెస్టర్లు నిధుల ఉపసంహరణ కొనసాగుతుండటం, క్రూడాయిల్‌ మరింత పెరగడం మదుపరుల్లో సెంటిమెంట్‌ను నిరాశపరిచింది. ఆర్బీఐ సమీక్ష ప్రకటించగానే సూచీలు ఒక్కసారిగా కుదుపునకు గురయ్యాయి. ఒక దశలో 500 పాయింట్లకు పైగా పతనమైన 30 షేర్ల ఇండెక్స్‌ సూచీ సెన్సెక్స్‌ చివరకు 214.85 పాయింట్లు తగ్గి 54,892.49 వద్ద ముగిసింది. ఎన్‌ఎస్‌ఈ నిఫ్టీ 60.10 పాయింట్లు పతనం చెంది 16,356.25 వద్ద ముగిసింది.

ఒత్తిడిలో బ్యాంకింగ్‌ రంగ సూచీ

ఆర్బీఐ తీసుకున్న నిర్ణయంతో బ్యాంకింగ్‌ రంగానికి చెందిన షేర్లు ఒత్తిడికి గురయ్యాయి. ముఖ్యంగా వడ్డీరేట్లు మరింత పెరగనుండటంతో బ్యాంకింగ్‌ రంగ సూచీతోపాటు రియల్‌ ఎస్టేట్‌ రంగ షేర్లు కూడా కుదేలయ్యాయి. ద్రవ్యోల్బణం రికార్డు స్థాయిలో పెరుగుతుండటంతో ఈ సమీక్షలో వడ్డీరేట్లను పెంచుతుందన్న అంచనాలకు తగ్గట్టుగానే నిర్ణయం తీసుకున్నప్పటికీ మదుపరులకు ఈ నిర్ణయం రుచించలేదు.

• భారతీ ఎయిర్‌టెల్‌ 3.31 శాతం తగ్గి టాప్‌ లూజర్‌గా నిలిచింది.
• ఐటీసీ, రిలయన్స్‌, ఏషియన్‌ పెయింట్స్‌, యాక్సిస్‌ బ్యాంక్‌, ఇండస్‌ఇండ్‌ బ్యాంక్‌, ఐసీఐసీఐ బ్యాంక్‌, కొటక్‌ బ్యాంక్‌, టెక్‌ మహీంద్రా, ఇన్ఫోసిస్‌, అల్ట్రాటెక్‌ సిమెంట్‌, ఎల్‌అండ్‌టీ, సన్‌ఫార్మా, ఎన్‌టీపీసీలు తగ్గాయి.
• టాటా స్టీల్‌, ఎస్బీఐ, డాక్టర్‌ రెడ్డీస్‌, టైటాన్‌, బజాజ్‌ ఫైనాన్స్‌, టీసీఎస్‌, మారుతి, బజాజ్‌ ఫిన్‌, హెచ్‌సీఎల్‌ టెక్‌, విప్రో, మహీంద్రా అండ్‌ మహీంద్రా, హెచ్‌డీఎఫ్‌సీ బ్యాంక్‌, హెచ్‌డీఎఫ్‌సీల షేర్లు బలోపేతమయ్యాయి.
• బీఎస్‌ఈ స్మాల్‌క్యాప్‌, మిడ్‌క్యాప్‌ ఇండెక్స్‌లు కూడా పతనం చెందాయి.
• రంగాలవారీగా చూస్తే టెలికం 1.62 శాతం, ఎఫ్‌ఎంసీజీ, ఎనర్జీ, ఆయిల్‌ అండ్‌ గ్యాస్‌, పవర్‌ రంగ షేర్లు పతనమయ్యాయి.
• హెల్త్‌కేర్‌, ఐటీ, వాహన, మెటల్‌, రియల్టీ రంగ షేర్లు మాత్రం పెరిగాయి.
• అంతర్జాతీయ మార్కెట్లో బ్రెంట్‌ క్రూడాయిల్‌ స్వల్పంగా పెరిగి 121.69 డాలర్లు పలికింది.
• డాలర్‌తో పోలిస్తే రూపాయి మారకం విలువ 3 పైసలు పెరిగి 77.75 వద్ద ముగిసింది.