66 వేల పైకి సూచీ

దేశీయ స్టాక్‌ మార్కెట్లు తిరిగి కోలుకున్నాయి. ఆర్థిక, వాహన ,ఐటీ రంగ షేర్ల నుంచి లభించిన మద్దతుతో సూచీలు ఒక్క శాతం వరకు లాభపడ్డాయి. అంతర్జాతీయ మార్కెట్ల నుంచి వచ్చిన సానుకూల అంశాలు కూడా మార్కెట్లను మరింత ముందుకు తీసుకెళ్లాయి.

• సెన్సెక్స్‌ 567, నిఫ్టీ 177 పాయింట్ల పెరుగుదల

ముంబై, అక్టోబర్‌ 10: దేశీయ స్టాక్‌ మార్కెట్లు తిరిగి కోలుకున్నాయి. ఆర్థిక, వాహన ,ఐటీ రంగ షేర్ల నుంచి లభించిన మద్దతుతో సూచీలు ఒక్క శాతం వరకు లాభపడ్డాయి. అంతర్జాతీయ మార్కెట్ల నుంచి వచ్చిన సానుకూల అంశాలు కూడా మార్కెట్లను మరింత ముందుకు తీసుకెళ్లాయి. ప్రారంభం నుంచి లాభాలబాట పట్టిన సూచీలు చివరి వరకు ఇదే ట్రెండ్‌ను కొనసాగించాయి.

మార్కెట్‌ ముగిసే సమయానికి 566.97 పాయింట్లు పెరిగిన 30 షేర్ల ఇండెక్స్‌ సూచీ మళ్లీ 66 వేల మార్క్‌ను అధిగమించింది. చివరకు 66,079.36 పాయింట్ల వద్ద ముగిసింది. అటు నేషనల్‌ స్టాక్‌ ఎక్సేంజ్‌ నిఫ్టీ 177.50 పాయింట్లు అందుకొని 19,689.85 వద్ద ముగిసింది. అమెరికా బాండ్‌ ఈల్డ్‌ తగ్గినప్పటికీ వడ్డీరేట్లు మరికొంతకాలం యథాతథంగా ఉండే అవకాశం ఉండటంతో మదుపరులు భారీగా నిధులు కుమ్మరించారు.

• భారతీ ఎయిర్‌టెల్‌, కొటక్‌ బ్యాంక్‌, టాటా మోటర్స్‌ల షేర్లు రెండు శాతానికి పైగా పెరిగాయి.
• వీటితోపాటు జేఎస్‌డబ్ల్యూ స్టీల్‌, యాక్సిస్‌ బ్యాంక్‌, మహీంద్రా అండ్‌ మహీంద్రా, ఐసీఐసీఐ బ్యాంక్‌, టెక్‌ మహీంద్రా, మారుతి, టాటా స్టీల్‌, ఎస్బీఐ, హెచ్‌సీఎల్‌ టెక్నాలజీలు ఒక్కశాతంకు పైగా బలోపేతం అయ్యాయి.
• అలాగే పవర్‌గ్రిడ్‌, ఐటీసీ, బజాజ్‌ ఫిన్‌సర్వ్‌, బజాజ్‌ ఫైనాన్స్‌, ఎన్‌టీపీసీ, అల్ట్రాటెక్‌ సిమెంట్‌, విప్రో, హెచ్‌డీఎఫ్‌సీ బ్యాంక్‌, రిలయన్స్‌, నెస్లె, సన్‌ఫార్మా, హెచ్‌యూఎల్‌, ఎల్‌అండ్‌టీ, టైటాన్‌లు లాభపడ్డాయి.
• కానీ, ఇండస్‌ఇండ్‌ బ్యాంక్‌, టీసీఎస్‌, ఏషియన్‌ పెయింట్స్‌లు నష్టపోయాయి.
• బీఎస్‌ఈ మిడ్‌క్యాప్‌ 1.4 శాతం, బీఎస్‌ఈ స్మాల్‌క్యాప్‌ 1.14 శాతం చొప్పున లాభపడ్డాయి.
• రంగాలవారీగా చూస్తే రియల్టీ అత్యధికంగా 4 శాతం లాభపడగా, మెటల్‌ 2.59 శాతం, టెలికం 2.24 శాతం, సేవలు 1.96 శాతం, కమోడిటీస్‌ 1.52 శాతం, బ్యాంకింగ్‌, ఆర్థిక సేవలు 1.24 శాతం, ఎనర్జీ 1.29 శాతం చొప్పున పెరిగాయి.