అదనపు బాదుడు

జిల్లా కేంద్రంలోని వీటీ కాలనీలో శ్రీధర్‌ అనె వ్యక్తి ఈ నెల ఒకటిన హెచ్‌పీ గ్యాస్‌ బుక్‌ చేసుకుంటే రెండో రోజు సిలిండర్‌ తీసుకొచ్చిన డెలివరీ బాయ్‌ రూ.1060 ఇవ్వమన్నాడు.

• గ్యాస్‌ డెలివరీ సమయంలో అడ్డగోలుగా వసూళ్లు
• ఒక్కో బండపై రూ.50 నుంచి రూ.150 వసూలు చేస్తున్న డెలివరీ బాయ్స్‌
• అధికారులు, ఏజెన్సీలకు ఫిర్యాదు చేసినా.. పట్టించుకోని పరిస్థితి
• బ్లాక్‌లో వ్యాపారులకిచ్చి రూ.800లకు పైగా గుంజుతున్న కేటుగాళ్లు
• ఈకేవైసీ పేరుతోనూ నిలువు దోపిడీ
• ఏటా రూ.40కోట్లకుపైగా అదనంగా వసూలు చేస్తున్న వైనం

నల్లగొండ, ఆగస్టు 11: జిల్లా కేంద్రంలోని వీటీ కాలనీలో శ్రీధర్‌ అనె వ్యక్తి ఈ నెల ఒకటిన హెచ్‌పీ గ్యాస్‌ బుక్‌ చేసుకుంటే రెండో రోజు సిలిండర్‌ తీసుకొచ్చిన డెలివరీ బాయ్‌ రూ.1060 ఇవ్వమన్నాడు. అదేంటి బిల్లులో రూ.1013 మాత్రమే ఉంది కాదా అంటే.. మాకు ఆఫీసు నుంచి పెద్దగా ఇవ్వరు సార్‌.. బండి పెట్రోల్‌, ఖర్చులు ఎలా సార్‌ అనే తియ్యటి సమాధానం చెప్పటంతో.. సరేలే అని సర్ది పెట్టుకున్నాడు. దేవరకొండ రోడ్డులోని మునుగోడు రోడ్డులో రమేశ్‌ అనే వ్యక్తి గత నెల 24న భారత్‌ గ్యాస్‌ బుక్‌ చేసుకుంటే మూడు రోజుల తర్వాత సిలిండర్‌ తీసుకొచ్చిన బాయ్‌ బిల్లు కాయితం ఇచ్చి ఎంతో అంత ఇవ్వండి సార్‌.. అని అక్కడ నుంచి కదిలే పరిస్థ్దితి లేకపోవటంతో రూ.50 చేతిలో పెట్టి వెళ్లాడు. వారం కింది తిప్పర్తి మండల కేంద్రంలో నిరక్ష్యరాస్యులైన పద్మ ఎంత అని అడిగితే రూ.1100 అని చెప్పి వసూలు చేసుకొని వెళ్ల్లాడు.

ఇక దేవరకొండ, మిర్యాలగూడ, మునుగోడు ప్రాంతాల్లోని చివరి గ్రామాల్లో ఒక్కో సిలిండర్‌కు రూ.1150కి పైనే వసూలు చేయటం గమనార్హం. ఇలా ఒక్క ఏజెన్సీ అని కాదు.. ఇండేన్‌, హెచ్‌పీ, భారత్‌.. అన్ని ఏజెన్సీలకు సంబంధించిన గ్యాస్‌ డెలివరీ బాయ్స్‌ వినియోగదారుల పాలిట డెవిల్స్‌గా మారి బిల్లుకు మించి వసూలు చేస్తూ అడ్డగోలుగా దోపిడీ చేస్తున్నారు. ఈ విషయంపై కొందరు గ్యాస్‌ ఏజెన్సీలకు చె ప్తే పదో, ఇరవయ్యే తీసుకుంటే మనం ఏమంటాం.. అని దా ట వేస్తుండగా.. ని యంత్రించాల్సిన సివిల్‌ సైప్లె అధికారులు మాత్రం ఆ ఏజెన్సీలకు సంబంధించిన ఉద్యోగులే ఉంటారు.. వాళ్లే చూడాలి తప్ప.. మేము అన్ని చూడ లేం.. కదా అనే సమాధానాలు రావటంతో ఏం చేయలేని పరిస్థితి.

ఏటా రూ.40 కోట్లకుపైగా వసూలు
గ్యాస్‌ డెలివరీ పేరుతో ఆయా ఏజెన్సీలకు సంబంధించిన కేటుగాళ్లు ఏటా రూ.40 కోట్లకుపైగా వసూలు చేస్తున్నారని ఆయా సంస్థల్లో పని చేసే ఉద్యోగులే చెబుతున్నారు. జిల్లాలో హెచ్‌పీ, భారత్‌, ఇండేన్‌ గ్యాస్‌ ఏజెన్సీలకు సంబంధించి అన్ని రకాల కనెక్షన్స్‌ మొత్తం 6.08లక్షలు ఉన్నాయి. ప్రతినెలా సగటున నెలకు మూడు లక్షల సిలిండర్ల బుకింగ్‌ కావడంతో అదే నెలలో వాటి డెలివరీ అవుతుంది. అన్ని ఏజెన్సీలు వారి సిబ్బందితో వాహనాల్లో ఆయా గ్రామాలకు వెళ్లి సిలిండర్లు డెలివరీ చేయాలి. వాళ్ల జీతాలతో పాటు వాహనాల ఖర్చు బిల్లింగ్‌ అమౌంట్‌లోనే ఉంటుంది. ప్రస్తుతం డొమెస్టిక్‌ సిలిండర్‌ ధర రూ.1013 ఉండగా… కమర్షియల్‌ సిలిండర్‌ ధర రూ.3015 ఉన్నది. ఇది బిల్లింగ్‌ ఎమౌంట్‌ కాగా.. ఈ ఎమౌంట్‌కు మించి కనిష్టంగా రూ.50 నుంచి రూ.150 దాకా వసూలు చేస్తున్నారని వినియోగదారులు ఆవేదన వ్యక్తం చేస్తున్నారు. కాస్త మేరుమానం ఉన్న వాళ్లు, లేదంటే సమీప బంధువుల దగ్గర ఉన్న గ్యాస్‌ బుక్స్‌తో బుక్‌ చేయించుకొని డీఏసీ నెంబర్‌ తీసుకొని కనెక్షన్‌ లేని వాళ్లకు రూ.200 నుంచి రూ.300, వ్యాపారులకైతే రూ.600 నుంచి రూ.800లకు అమ్ముకుంటున్నారు. ఇక కమర్షియల్‌ సిలిండర్లకు సైతం రూ.50 నుంచి రూ.100 వసూలు చేస్తూ.. మొత్తం అన్ని కోణాల్లో డెలివరీ డెవిల్స్‌ నెలకు మూడు లక్షల సిలిండర్లు డెలివరీ చేసి సగటున రూ.40 కోట్లు వినియోగదారుల నుంచి ఏటా వసూలు చేస్తున్నారు.

సిలిండర్‌కు రూ.1100కు పైగా..
మాది హెచ్‌పీ గ్యాస్‌ కనెక్షన్‌.. దేవరకొండ తిరుమల ఏజెన్సీస్‌ వాళ్లు తీసుకొచ్చి ఇస్తారు. మేము ఈ మధ్యనే గ్యాస్‌ బుక్‌ చేసుకుంటే వచ్చి వేసి రూ.1100 తీసుకున్నారు. మాకు రేటు ఎంత అనేది చెప్పరు. బిల్లు కూడా ఇవ్వకపోవడంతో పాటు చూ పించరు కూడా. వాళ్లు ఎంత అంటే అంత ఇవ్వాల్సి వస్తుంది. కొంత మంది అడిగితే పదో ఇరవైనో తగ్గిస్తారంట.. మేము అడగం కాబట్టి మా దగ్గర రూ.1100 తీసుకుంటారు. కొంత మంది దగ్గర ఇంకా ఎక్కువ కూడా తీసుకుంటారు.
-అర్వపల్లి సరిత, గుడిపల్లి

ఆయిల్‌ కంపెనీలే చూసుకోవాలి
వినియోగదారులకు గ్యాస్‌ డెలివరీ చేసే సమయంలో బిల్లింగ్‌ అమౌంట్‌ మాత్రమే తీసుకోవాలి. వినియోగదారులు కూ డా అంతకు మించిన అమౌంట్‌ ఇవ్వకూడదు. ఒకవేళ ఎక్కువగా వసూలు చేస్తే ఆ విషయాన్ని ఆయిల్‌ మార్కెటింగ్‌ కంపెనీలు లేదంటే ఏజెన్సీ నిర్వాహకులు చూసుకోవాలే తప్ప మేము అన్ని చూసుకోలేం కదా. మాకు సీఎమ్మాఆర్‌ లాంటి సమస్యలతోనే చాలా ఇబ్బందిగా ఉంటుం ది. ఒకసారి ఆయా ఏజెన్సీల నిర్వాహకులకు చెప్తాం.
-వెంకటేశం, డీఎస్‌వో, నల్లగొండ 

ఈకేవైసీ పేరుతో మరో దందా

గ్యాస్‌ వినియోగదారులు ఈనెల 16తేదీలోగా ఈకేవైసీ చేయించుకోవాలని ఆయిల్‌ మార్కెటింగ్‌ కంపెనీలు పలు గడువుల తర్వాత తుడి గడువు ఇటీవల ఇచ్చింది. ఇవ్వటమే కాకుండా ఈ నెల ఒకటో తేదీ నుంచి ఈకేవైసీ చేయించుకోని వాళ్ల గ్యాస్‌ బుకింగ్స్‌ కూడా క్యాన్సిల్‌ చేయటంతో ఈకేవైసీ తప్పనిసరైంది. ఇది సైతం ఈ కేటుగాళ్లకు బాగానే కలిసి వచ్చింది. ఆయా ఆఫీసులకు వెళ్లిన వినియోగదారులకు ఈకేవైసీ ఉచితంగానే చేస్తున్నప్పటికీ.. ఈ కేటుగాళ్లు ఆయా గ్రామాల్లో లేదంటే పట్టణాల్లో చేస్తే మాత్రం ఒక్కో వినియోగదారుడి నుంచి రూ.250 దాకా వసూలు చేస్తున్నారు. ఈకేవైసీ ప్రక్రియ గతేడాది నుంచి జరుగుతున్నప్పటికీ.. ఈ కేటుగాళ్లు జిల్లా కేంద్రంలోని పలు కాలనీల్లో తిరుగుతూ ఒక్కో వినియోగదారుడి నుంచి రూ.250 చొప్పున చేసిన వసూల్లపై గతేడాది నమస్తే తెలంగాణలో గ్యాస్‌ రావాలంటే ఫీజు చెల్లించాల్సిందే అనే పేరుతో పబ్లిష్‌ చేసిన కథనంతో ఈకేవైసీనే బంద్‌ చేశారు. అయితే ప్రస్తుతం ఆయిల్‌ మార్కెటింగ్‌ కంపెనీలు ఈకేవైసీ తప్పనిసరి చేయటంతో మళ్లీ వసూళ్ల పర్వం షురూ చేశారు.