Visit:
White Tea | ఒకప్పుడు భారతీయ ఇళ్లలో టీ అంటే ఎక్కువగా మసాలా చాయ్ మాత్రమే గుర్తొచ్చేది. అయితే ఆరోగ్యంపై అవగాహన పెరగడంతోపాటు ఆరోగ్యకరమైన ఆహారం, పానీయాల వైపు ప్రజల ఆసక్తి పెరుగుతోంది. దీంతో గ్రీన్ టీ, హెర్బల్ టీ వంటి వివిధ రకాల టీలు క్రమంగా ఇళ్లలోకి చేరుతున్నాయి. వీటిలో ఇటీవల వైట్ టీ కూడా ప్రత్యేకంగా ఆకర్షిస్తోంది. అసలు వైట్ టీ అంటే ఏమిటి? ఇది నిజంగానే తెల్లగా ఉంటుందా? దీని ప్రత్యేకత ఏమిటో పోషకాహార నిపుణులు వివరిస్తున్నారు. వైట్ టీని టీ మొక్క జాతి కామెలియా సినెన్సిస్కు చెందిన కొత్త ఆకులు, మొగ్గలతో తయారు చేస్తారు. కొన్ని రకాల వైట్ టీలలో పూర్తిగా చిన్న వయసున్న మొగ్గలను మాత్రమే ఉపయోగిస్తారు. ఆకులను కోసిన తర్వాత వాటిని ఎండలో ఆరబెడతారు. ఈ ప్రక్రియలో క్యాటెచిన్స్ అనే యాంటీఆక్సిడెంట్లు ఎక్కువగా నిల్వ ఉంటాయి. తయారైన వైట్ టీ సాధారణంగా లేత పసుపు రంగులో ఉంటుంది. ఇందులో పండ్లలాంటి రుచి ఉండటంతో పాటు కొన్ని రకాలలో పూల సువాసన కూడా వస్తుంది.
ఇతర టీలతో పోలిస్తే వైట్ టీ తయారీ ప్రక్రియ చాలా సున్నితంగా ఉంటుంది. టీ మొక్కపై ఉండే చిన్న, లేత ఆకులు, మొగ్గలను చేతితో సేకరించి, కోసిన వెంటనే వాటిని వాడిపోయేలా చేసి గాలిలో ఆరబెడతారు. ఆక్సీకరణ ప్రక్రియను కూడా చాలా నియంత్రితంగా నిర్వహిస్తారు. అందుకే వైట్ టీ రుచి ఇతర టీలతో పోలిస్తే మరింత సున్నితంగా, మృదువుగా ఉంటుంది. వైట్ టీ చరిత్ర కూడా చాలా పురాతనమైనదే. చైనాలోని టాంగ్ రాజవంశ కాలం నుంచే వైట్ టీకి సంబంధించిన ప్రస్తావనలు కనిపిస్తాయి. అప్పట్లో దీనిని కేకుల రూపంలో తయారు చేసి మట్టి పాత్రల్లో మరిగించి తాగేవారు. ఆ తర్వాత సాంగ్ రాజవంశ కాలంలో వైట్ టీకి మరింత ప్రాచుర్యం లభించింది. అప్పట్లో దీనిని చక్రవర్తి, రాజకుటుంబానికి చెందిన ప్రముఖుల కోసం ప్రత్యేకంగా ఉంచేవారని చారిత్రక కథనాలు చెబుతున్నాయి. టీ మొక్కలోని అత్యంత చిన్న మొగ్గలతో తయారయ్యే టీ రుచి మృదువుగా ఉండటంతోపాటు పసుపు-ఆకుపచ్చ రంగులో కనిపించేది. నల్ల టీతో పోలిస్తే ఇది మరింత నాణ్యమైనదిగా భావించేవారు. పురాతన చైనాలో వైట్ టీని మొదట్లో పొడి రూపంలో ఉపయోగించి సిరామిక్ గిన్నెల్లో కలిపి తాగేవారు. కాలక్రమేణా ఈ పద్ధతి మారి, వదులుగా ఉండే ఆకుల రూపంలోని వైట్ టీ వినియోగంలోకి వచ్చింది.
క్రీ.శ. 1107 ప్రాంతానికి చెందిన ఒక పురాతన చైనా పత్రంలో అప్పటి చక్రవర్తి హుయిజాంగ్ టీ గురించి వివరించినట్లు తెలుస్తోంది. ప్రస్తుతం ట్రీటైజ్ ఆన్ టీగా పిలవబడే ఆ పత్రంలో ఆయన బై చా గురించి ప్రస్తావించారు. బై అంటే తెలుపు, చా అంటే టీ అని అర్థం. ఇది వైట్ టీని పోలిన ప్రాసెస్ చేయని టీకి సంబంధించిన తొలి చారిత్రక ప్రస్తావనల్లో ఒకటిగా భావిస్తారు. వైట్ టీ ధర ఇతర టీల కంటే ఎక్కువగా ఉండటానికి దాని తయారీ విధానమే ప్రధాన కారణం. వైట్ టీ ఆకులపై ఉండే సన్నని తెల్లని పెకో వెంట్రుకల కారణంగానే దీనికి వైట్ టీ అనే పేరు వచ్చిందని చెబుతారు. అలాగే టీ తయారైన తర్వాత కనిపించే లేత పసుపు-ఆకుపచ్చ రంగు కూడా దీనికి ప్రత్యేకతను ఇస్తుంది. వైట్ టీ తయారీలో కేవలం చిన్న వయసున్న మొగ్గలు, లేత ఆకులను మాత్రమే ఉపయోగిస్తారు. వీటిని సేకరించడానికి ఎక్కువ సమయం పడుతుంది. ఉత్పత్తి పరిమితంగా ఉండటంతో ధర కూడా ఎక్కువగా ఉంటుంది. కోత తర్వాత ఆకులపై ఉన్న సన్నని తెల్లని వెంట్రుకలు దెబ్బతినకుండా వాటిని చాలా జాగ్రత్తగా నిర్వహించాలి. అంతేకాకుండా ఏడాదిలో మొదటి కోతకు చెందిన ఆకులకు డిమాండ్ ఎక్కువగా ఉండటంతో వాటి ధర మరింత పెరుగుతుంది. వైట్ టీలో వైట్ పియోనీ, సిల్వర్ నీడిల్ అనే రెండు రకాలు ఎక్కువగా ప్రాచుర్యంలో ఉన్నాయి. వీటిలో సిల్వర్ నీడిల్ అత్యంత ఖరీదైన వైట్ టీలలో ఒకటిగా ఉంది. టీ మొక్క కాండంపై ఉండే ఒక్కో చిన్న మొగ్గను మాత్రమే ఉపయోగించి దీనిని తయారు చేస్తారు. ఎండబెట్టిన తర్వాత ఆ మొగ్గలు వెండి సూదుల్లా కనిపించడం వల్ల దీనికి సిల్వర్ నీడిల్ అనే పేరు వచ్చింది.
వైట్ పియోనీ, సిల్వర్ నీడిల్ మధ్య కూడా ప్రత్యేకమైన తేడా ఉంది. క్వింగ్ రాజవంశ కాలంలో ఫుజియాన్ ప్రాంతంలో పెరిగే టీ మొక్కల చిన్న మొగ్గలతో వైట్ పియోనీని తయారు చేసేవారని చెబుతారు. 18వ శతాబ్దం మధ్యకాలంలో అదే ప్రాంతంలో ఫుడింగ్ అనే కొత్త రకం టీ మొక్కను గుర్తించారు. దీనికి పెద్ద మొగ్గలు, బలమైన సువాసన ఉండటంతో వాటిని సిల్వర్ నీడిల్ వైట్ టీ తయారీలో ఉపయోగించడం ప్రారంభించారు. సిల్వర్ నీడిల్ టీ మొగ్గలను ప్రధానంగా ఎండలో ఆరబెట్టడం వల్ల వాటి సహజ రుచి ఎక్కువగా నిలిచి ఉంటుందని చెబుతారు. 18వ శతాబ్దం చివరి నాటికి సిల్వర్ నీడిల్ వైట్ టీకి మంచి ఆదరణ లభించింది. అనంతరం ఇది ఆసియాలోని పొరుగు దేశాలతోపాటు పాశ్చాత్య దేశాలకు కూడా ఎగుమతి కావడం ప్రారంభమైంది. సిల్వర్ నీడిల్ వైట్ టీలో యాంటీ ఆక్సిడెంట్లు అధికంగా ఉండటంతోపాటు కెఫీన్ పరిమాణం తక్కువగా ఉంటుంది. అయితే ఇది అరుదుగా లభించడం, పరిమితంగా ఉత్పత్తి కావడం, సేకరించడానికి ఎక్కువ సమయం పట్టడం, రుచి మరింత సున్నితంగా ఉండటం వంటి కారణాలతో ధర ఎక్కువగా ఉంటుంది. ముఖ్యంగా ఏడాదిలో మొదటి కోతకు చెందిన టీ ఆకులతో తయారు చేసే సిల్వర్ నీడిల్కు డిమాండ్ ఎక్కువగా ఉంటుంది.
