TCS | 19 ఏండ్లలో తొలిసారి.. టీసీఎస్‌లో తగ్గిన ఉద్యోగాలు

దేశీయ ఐటీ దిగ్గజం టీసీఎస్‌ అంచనాలకుమించి రాణించింది. గడిచిన ఆర్థిక సంవత్సరం చివరి త్రైమాసికానికిగాను సంస్థ రూ.12,434 కోట్ల నికర లాభాన్ని గడించింది.

• క్యూ4లో 12,434 కోట్ల లాభం

TCS | ముంబై, ఏప్రిల్‌ 12: దేశీయ ఐటీ దిగ్గజం టీసీఎస్‌ అంచనాలకుమించి రాణించింది. గడిచిన ఆర్థిక సంవత్సరం చివరి త్రైమాసికానికిగాను సంస్థ రూ.12,434 కోట్ల నికర లాభాన్ని గడించింది. క్రితం ఏడాది ఇదే త్రైమాసికంలో నమోదైన రూ.11,392 కోట్లతో పోలిస్తే ఇది 9.1 శాతం అధికం. మార్జిన్లు అధికమవడం, దేశీయ వ్యాపారం మరింత బలోపేతం కావడం వల్లనే లాభాల్లో వృద్ధి నమోదైందని కంపెనీ వర్గాలు వెల్లడించాయి. సమీక్షకాలంలో కంపెనీ ఆదాయం ఏడాది ప్రాతిపదికన 3.5 శాతం పెరిగి రూ.61,237 కోట్లకు చేరుకున్నట్లు బీఎస్‌ఈకి సమాచారం అందించింది.

• 2023-24 ఆర్థిక సంవత్సరం మొత్తానికి నికర లాభం 9 శాతం ఎగబాకి రూ.45,908 కోట్లకు చేరుకున్నది. అలాగే ఆదాయం రూ.2,25,458 కోట్ల నుంచి రూ.2,40,893 కోట్లకు ఎగబాకింది.
• సంస్థ ఆపరేటింగ్‌ మార్జిన్‌ 1.50 శాతం అధికమై 26 శాతానికి చేరుకున్నది.
• గతేడాది చివరి త్రైమాసికంలో సంస్థ 13.2 బిలియన్‌ డాలర్ల విలువైన ఒప్పందాలు కుదుర్చుకున్నది. ఒక త్రైమాసికంలో ఇంతటి స్థాయిలో ఆర్డర్లు రావడం ఇదే తొలిసారి.
• 2023-24 ఆర్థిక సంవత్సరానికిగాను ప్రతిషేరుకు రూ.28 డివిడెండ్‌ను ప్రకటించింది.
• గతేడాది మెరుగైన పనితీరు కనబరిచిన ఉద్యోగుల వేతనాలు రెండంకెలు పెంచనున్నట్లు తెలిపింది.
• మూడో త్రైమాసికంలో 13.3 శాతంగా ఉన్న వలసల రేటు 12.5 శాతంగా నమోదైంది.
• ఉత్తర అమెరికా నుంచి వచ్చిన ఆదాయంలో 2.3 శాతం తరుగుదల నమోదైంది.
• గత త్రైమాసికంలో కంపెనీ ఉద్యోగుల సంఖ్య 2 వేలు తగ్గారు. దీంతో మొత్తం సంఖ్య 6,01,546కి తగ్గినట్లు అయింది. గత 19 ఏండ్లలో ఇలా తగ్గడం ఇదే తొలిసారి.

మార్జిన్లు అధికమవడం, భారీ స్థాయిలో ఆర్డర్లు రావడం వల్లనే లాభాల్లో భారీ వృద్ధి నమోదైంది. అంతర్జాతీయంగా అనిశ్చిత పరిస్థితులు నెలకొన్నప్పటికీ కస్టమర్లతో అనుసంధానం కలిగివుండటం వల్ల ఇది సాధ్యమైంది. బీఎస్‌ఎన్‌ఎల్‌ నుంచి రూ.15 వేల కోట్ల విలువైన ఆర్డర్‌ రావడంతో దేశీయ వ్యాపారంలో 38 శాతం వృద్ధి నమోదైంది. ఇది మొత్తం వృద్ధిలో 5 శాతం నుంచి 6.7 శాతానికి చేరుకున్నది.

– కే కృతివాసన్‌, టీసీఎస్‌ చీఫ్‌ ఎగ్జిక్యూటివ్‌, ఎండీ