Gold | తగ్గేదేలే.. అక్షయ తృతీయ అమ్మకాలపై ప్రభావం చూపని అధిక ధరలు

అక్షయ తృతీయ కొనుగోళ్లు అంచనాలను మించి జరిగాయి. అధిక ధరలున్నా బంగారం అమ్మకాలు బాగానే జరిగాయని జ్యుయెల్లర్స్‌ వెల్లడించారు. ఈ క్రమంలోనే గత ఏడాదితో పోల్చితే ఈ ఏడాది విక్రయాల విలువ 35 శాతం పెరుగుతుందన్న అంచనాను అఖిల భారత రత్నాలు, ఆభరణాల మండలి (జీజేసీ) వ్యక్తం చేస్తున్నది.

• జోరుగా సాగిన కొనుగోళ్లు
• అక్షయ తృతీయ అమ్మకాలు అదుర్స్‌
• అమ్మకాల వృద్ధిపై జ్యుయెల్లర్స్‌ ఆనందం
• సేల్స్‌ వాల్యూ 35% పెరగవచ్చంటున్న జీజేసీ

Gold | న్యూఢిల్లీ, ఏప్రిల్‌ 30: అక్షయ తృతీయ కొనుగోళ్లు అంచనాలను మించి జరిగాయి. అధిక ధరలున్నా బంగారం అమ్మకాలు బాగానే జరిగాయని జ్యుయెల్లర్స్‌ వెల్లడించారు. ఈ క్రమంలోనే గత ఏడాదితో పోల్చితే ఈ ఏడాది విక్రయాల విలువ 35 శాతం పెరుగుతుందన్న అంచనాను అఖిల భారత రత్నాలు, ఆభరణాల మండలి (జీజేసీ) వ్యక్తం చేస్తున్నది. నిరుడు 20 టన్నుల మేర సేల్స్‌ జరిగాయి. నిజానికి గతకొద్ది రోజులుగా ధరలు పెరుగుతూపోవడంతో కొనేందుకు అంతా సందేహించారని, అయితే ఇప్పుడు రేట్లలో స్థిరీకరణ రావడంతో కస్టమర్లు దుకాణాలకు పెద్ద ఎత్తున వచ్చారని జీజేసీ చైర్మన్‌ రాజేశ్‌ రోకెడె పీటీఐకి తెలిపారు. కాగా, గత ఏడాది అక్షయ తృతీయ రోజు (మే 10, 2024)న తులం బంగారం రూ.72,300గా ఉన్నది. అయితే ఇప్పుడిది రూ.98,550 పలికింది. అయినప్పటికీ కస్టమర్లు కొనేందుకే ముందుకురావడంపట్ల జ్యుయెల్లర్స్‌ ఆనందం వెలిబుచ్చుతున్నారు.

12 టన్నుల మేర..

దాదాపు 12 టన్నుల బంగారం అమ్మకాలు జరుగవచ్చని అఖిల భారత వర్తకుల సమాఖ్య అంచనా వేస్తున్నది. దీని విలువ రూ.12,000 కోట్లుగా ఉండొచ్చని చెప్తున్నది. అలాగే రూ.4,000 కోట్ల విలువైన 400 టన్నుల వెండి విక్రయాలు జరిగాయని భావిస్తున్నది. మొత్తంగా ఈ ఒక్కరోజే రూ.16,000 కోట్ల విలువైన వ్యాపారం జరిగిందన్న సమాచారం తమకు అందుతున్నట్టు ట్రేడర్స్‌ పేర్కొంటున్నారు. ఇక ఉదయం సమయంలో దుకాణాల్లో కాస్త కస్టమర్ల సందడి తక్కువగానే ఉన్నా.. మధ్యాహ్నం నుంచి పుంజుకుందని, సాయంత్రం ఇంకా పెరిగిందని జ్యుయెల్లర్స్‌ తెలిపారు. చాలా నగరాల్లో అర్ధరాత్రిదాకా విక్రయాలు జరుగడం గమనార్హం.

కడ్డీలు, నాణేలకు డిమాండ్‌

వినియోగదారుల్లో 25-40 ఏండ్ల వయస్సువారు గోల్డ్‌, సిల్వర్‌ కడ్డీలు, నాణేలను కొనేందుకే ఎక్కువగా ఆసక్తి చూపినట్టు నగల వ్యాపారులు వెల్లడించారు. అయితే బడ్జెట్‌, అవసరాన్నిబట్టి ఆభరణాలు, నాణేలు, కడ్డీలకు డిమాండ్‌ కనిపించినట్టు తెలియజేశారు. ఇక పాత బంగారు నగలు ఇచ్చి కొత్త బంగారం నగలను కొనుక్కునేవారు కూడా ఈసారి పెరిగారని, తమకు సుమారు 50 శాతం సేల్స్‌ అలాగే జరిగాయని పీఎన్‌జీ జ్యుయెల్లర్స్‌ చైర్మన్‌ సౌరభ్‌ గాడ్గిల్‌ తెలిపారు.

మార్కెట్‌లో తగ్గిన ధరలు

దేశీయ మార్కెట్‌లో బుధవారం బంగారం ధరలు క్షీణించాయి. ఢిల్లీలో 24 క్యారెట్‌ (99.9 స్వచ్ఛత) 10 గ్రాముల విలువ రూ.98,550గా ఉన్నది. మంగళవారంతో పోల్చితే రూ.900 పడిపోయింది. అంతర్జాతీయ మార్కెట్లలో బలహీన ట్రెండ్‌ ఇందుకు కారణంగా అఖిల భారత సరఫా అసోసియేషన్‌ పేర్కొంటున్నది. కాగా, కిలో వెండి ధర ఏకంగా ఈ ఒక్కరోజే రూ.4,000 దిగింది. రూ.98,000కు పరిమితమైంది. అంతర్జాతీయంగా చూస్తే.. స్పాట్‌ మార్కెట్‌లో ఔన్స్‌ 3,273.90 డాలర్లు పలికింది. 43.35 డాలర్లు తగ్గుముఖం పట్టింది. వెండి కూడా 32.33 డాలర్లుగానే ఉన్నది. ఇదిలావుంటే హైదరాబాద్‌లో 24 క్యారెట్‌ తులం రూ.97,910గా ఉన్నది. రూ.60 తగ్గింది. 22 క్యారెట్‌ (99.5 స్వచ్ఛత) పుత్తడి రేటు రూ.50 దిగి రూ.89,750గా ఉన్నది.

పడిపోయిన డిమాండ్‌

ఈ ఏడాది జనవరి-మార్చి త్రైమాసికంలో దేశీయంగా బంగారానికి డిమాండ్‌ పడిపోయినట్టు ప్రపంచ స్వర్ణ మండలి (డబ్ల్యూజీసీ) బుధవారం తెలిపింది. నిరుడుతో పోల్చితే పసిడికి 15 శాతం ఆదరణ క్షీణించినట్టు తమ తాజా నివేదికలో వెల్లడించింది. ఈ 3 నెలల్లో గరిష్ఠంగా 24 క్యారెట్‌ 10 గ్రాముల ధర రూ.94,030 పలికింది. ఈ క్రమంలోనే 118.1 టన్నులకే గోల్డ్‌ డిమాండ్‌ పరిమితమైంది. కాగా, ఈ ఏడాది మొదలు ఇప్పటిదాకా పుత్తడి రేట్లు భారతీయ మార్కెట్‌లో 25 శాతం పుంజుకున్నాయి. తులం లక్ష రూపాయల మార్కునూ దాటేసింది. ఈ నేపథ్యంలో ఈ సంవత్సరం దేశీయంగా గోల్డ్‌ డిమాండ్‌ 700-800 టన్నుల మధ్య ఉండొచ్చని డబ్ల్యూజీసీ అంచనా వేస్తున్నది. రాబోయే పెండ్లిళ్ల సీజన్‌ కలిసిరావచ్చన్న అభిప్రాయాన్ని ఈ సందర్భంగా డబ్ల్యూజీసీ ఇండియా సీఈవో సచిన్‌ జైన్‌ వ్యక్తం చేశారు. అయితే అధిక ధరల వల్ల కొనుగోలుదారులు వేచిచూసే ధోరణిని అవలంబిస్తున్నారని, తేలికపాటి నగల కొనుగోళ్లకు ఆసక్తి చూపుతున్నారని వ్యాపారులు చెప్తున్నారు.

వరల్డ్‌ గోల్డ్‌ కౌన్సిల్‌ నివేదికలో..

• బంగారంపై పెట్టుబడులు 7 శాతం పెరిగి 46.7 టన్నులకు చేరాయి. గత ఏడాది ఇదే వ్యవధిలో 43.6 టన్నులుగా ఉన్నాయి.
• స్టాక్‌ మార్కెట్లు తీవ్ర ఒడిదొడుకులకు గురవడంతో మదుపరులు పుత్తడి వైపునకు తమ పెట్టుబడులను మళ్లించారు. బంగారం కడ్డీలు, నాణేలకు డిమాండ్‌ పెరిగింది.
• నగలకు 25 శాతం ఆదరణ పడిపోయింది. ఈసారి 71.4 టన్నులకే సేల్స్‌ పరిమితమయ్యాయి. నిరుడు 95.5 టన్నులు.
• పసిడి దిగుమతులు 8 శాతం పుంజుకొని 167.4 టన్నులుగా నమోదయ్యాయి. రీసైక్లింగ్‌ 32 శాతం పతనమై 26 టన్నులు.
• ఈ త్రైమాసికంలో సగటున బంగారం ధర తులం రూ.79,633.40 పలికింది. నిరుడు జనవరి-మార్చిలో ఇది రూ.55, 247.20 గా ఉన్నది.
• ప్రపంచవ్యాప్తంగా గోల్డ్‌ డిమాండ్‌ ఈ జనవరి-మార్చిలో 1 శాతం పెరిగి 1,206 టన్నులకు చేరింది. 2019 తర్వాత తొలి త్రైమాసికంలో ఈ స్థాయి డిమాండ్‌ కనిపించడం ఇదే మొదటిసారి.