మార్కెట్లను ముంచిన వైరస్‌

దేశీయ స్టాక్‌ మార్కెట్లు కుప్పకూలాయి. దేశంలో హెచ్‌ఎంపీవీ కేసులు నమోదుకావడంతో సూచీలు అమ్మకాలు ఒత్తిడికి గురయ్యాయి. ప్రస్తుత ఆర్థిక సంవత్సరం మూడో త్రైమాసికంలో కార్పొరేట్లు నిరుత్సాహక ఆర్థిక ఫలితాలు ప్రకటించే అవకాశాలుండటంతోపాటు ఆసియా మార్కెట్ల నుంచి వచ్చిన బలహీన సంకేతాలకు తోడు, విదేశీ మదుపరులు అమ్మకాలకు మొగ్గుచూపడం సూచీల పతనానికి ఆజ్యంపోశాయి.

• భారీగా నష్టపోయిన స్టాక్‌ మార్కెట్లు
• సెన్సెక్స్‌ 1,258, నిఫ్టీ 388 పాయింట్ల పతనం

ముంబై, జనవరి 6: దేశీయ స్టాక్‌ మార్కెట్లు కుప్పకూలాయి. దేశంలో హెచ్‌ఎంపీవీ కేసులు నమోదుకావడంతో సూచీలు అమ్మకాలు ఒత్తిడికి గురయ్యాయి. ప్రస్తుత ఆర్థిక సంవత్సరం మూడో త్రైమాసికంలో కార్పొరేట్లు నిరుత్సాహక ఆర్థిక ఫలితాలు ప్రకటించే అవకాశాలుండటంతోపాటు ఆసియా మార్కెట్ల నుంచి వచ్చిన బలహీన సంకేతాలకు తోడు, విదేశీ మదుపరులు అమ్మకాలకు మొగ్గుచూపడం సూచీల పతనానికి ఆజ్యంపోశాయి. వరుసగా రెండోరోజు 30 షేర్ల ఇండెక్స్‌ సూచీ సెన్సెక్స్‌ 78 వేల పాయింట్ల దిగువకు పడిపోయింది. ఇంట్రాడేలో 1,441 పాయింట్లు నష్టపోయి 77,781 పాయింట్ల వద్దకు చేరుకున్న సూచీ చివరకు ఇదే ట్రెండ్‌ను కొనసాగించింది. మార్కెట్‌ ముగిసే సమయానికి 1,258.12 పాయింట్లు లేదా 1.59 శాతం నష్టపోయి 77,964.99 వద్ద ముగిసింది. మరోసూచీ నిఫ్టీ కూడా 24 వేల కీలక మైలురాయిని కోల్పోయింది. చివరకు 388.70 పాయింట్లు లేదా 1.62 శాతం నష్టపోయి 23,616.05 వద్ద స్థిరపడింది.

తొలిరోజే స్టాండర్డ్‌ గ్లాస్‌ జోరు

• స్టాండర్డ్‌ గ్లాస్‌ లైనింగ్‌ టెక్నాలజీ ఐపీవో తొలిరోజే మదుపరుల నుంచి విశేష స్పందన లభించింది. ప్రారంభించిన నిమిషాల్లోనే కంపెనీ షేర్లు అమ్ముడైపోగా, తొలిరోజు 13.32 రెట్లు అధికంగా బిడ్డింగ్‌ దాఖలయ్యాయి. ఆఫర్‌ ఫర్‌ సేల్‌ రూట్‌లో 2,08,29,567 షేర్లను అమ్మకానికి పెట్టగా, వీటికి 27,75,00,862 షేర్ల బిడ్డింగ్‌ దాఖల్యయాయి.
• టాటా స్టీల్‌, ఎన్‌టీపీసీ, కొటక్‌ బ్యాంక్‌, పవర్‌గ్రిడ్‌, అదానీపోర్ట్స్‌లు మూడు శాతానికి పైగా నష్టపోయాయి.
• వీటితోపాటు జొమాటో, ఇండస్‌ఇండ్‌ బ్యాంక్‌, ఐటీసీ, రిలయన్స్‌, మహీంద్రా, అల్ట్రాటెక్‌ సిమెంట్‌, హెచ్‌డీఎఫ్‌సీ బ్యాంక్‌, నెస్లె, ఎస్బీఐ, యాక్సిస్‌ బ్యాంక్‌, టాటామోటర్స్‌, మారుతి, ఎల్‌అండ్‌టీ, హెచ్‌యూఎల్‌, బజాజ్‌ ఫైనాన్స్‌, ఎయిర్‌టెల్‌, టెక్‌ మహీంద్రా, సన్‌ఫార్మా, టీసీఎస్‌, ఐసీఐసీఐ, ఇన్ఫోసిస్‌లు నష్టపోయాయి.
• కేవలం టైటాన్‌, హెచ్‌సీఎల్‌టెక్నాలజీ షేర్లు మాత్రమే లాభాల్లో ముగిశాయి.
• 3,474 సూచీలు నష్టపోగా, 656 సూచీలు లాభాల్లో ముగిశాయి. కేవలం 114 షేర్లు యథాతథంగా ట్రేడయ్యాయి.
• బీఎస్‌ఈ స్మాల్‌క్యాప్‌ 3.17 శాతం, మిడ్‌క్యాప్‌ 2.44 శాతం నష్టపోయాయి.
• రంగాలవారీగా చూస్తే యుటిలిటీ అత్యధికంగా 4.16 శాతం నష్టపోగా, పవర్‌ 3.73 శాతం, సర్వీసెస్‌ 3.45 శాతం, మెటల్‌ 3.15 శాతం, ఆయిల్‌అండ్‌గ్యాస్‌ 3.15 శాతం, ఎనర్జీ 3.03 శాతం, ఇండస్ట్రీయల్స్‌ 2.97 శాతం, కమోడిటీస్‌ 2.74 శాతం చొప్పున పతనం చెందాయి.
• ఎఫ్‌ఐఐలు రూ.2,575 కోట్ల విలువైన షేర్లను విక్రయించారు.

పతనానికి కారణాలు ఇవే..

• హ్యుమన్‌ మెటానియా వైరస్‌ కేసులు భారత్‌లోనూ నమోదు కావడం
• దేశీయ ఈక్విటీ మార్కెట్లలో ఎఫ్‌ఐఐల అమ్మకాల కొనసాగుతుండటం.
• ఆసియా మార్కెట్ల నుంచి వచ్చిన బలహీన సంకేతాలు
• మూడో త్రైమాసికంలో కార్పొరేట్ల నిరుత్సాహక ఫలితాలు

11 లక్షల కోట్ల సంపద ఆవిరి

స్టాక్‌ మార్కెట్ల భారీ నష్టాలతో మదుపరులు ఉక్కిరిబిక్కిరి అయ్యారు. గత కొన్ని రోజులుగా లాభాలతో కళకళలాడిన మదుపరుల్లో ఉత్సాహం వైరస్‌ దెబ్బకు ఆవిరైపోయింది. దీంతో అమ్మకాల బటన్‌ నొక్కడంతో సోమవారం ఒకేరోజు 10 లక్షల కోట్లకు పైగా సంపదను కోల్పోయారు. సూచీల భారీనష్టంతో బీఎస్‌ఈలో లిైస్టెన సంస్థల మార్కెట్‌ క్యాపిటలైజేషన్‌ విలువ రూ.10,98,723.54 కోట్లు కరిగిపోయి రూ.4,38,79,406.58 కోట్లు(5.11 ట్రిలియన్‌ డాలర్లు) పడిపోయింది.