ఎస్బీఐ లాభం 16,694 కోట్లు

దేశంలో అతిపెద్ద ప్రభుత్వరంగ సంస్థ స్టేట్‌ బ్యాంక్‌ ఆఫ్‌ ఇండియా(ఎస్బీఐ) రికార్డు స్థాయి లాభాలను ఆర్జించింది. మార్చితో ముగిసిన మూడు నెలల కాలానికిగాను బ్యాంక్‌ రూ.16,694.51 కోట్ల నికర లాభాన్ని గడించింది.

• క్యూ4లో 83 శాతం పెరిగిన ప్రాఫిట్‌

న్యూఢిల్లీ, మే 18: దేశంలో అతిపెద్ద ప్రభుత్వరంగ సంస్థ స్టేట్‌ బ్యాంక్‌ ఆఫ్‌ ఇండియా(ఎస్బీఐ) రికార్డు స్థాయి లాభాలను ఆర్జించింది. మార్చితో ముగిసిన మూడు నెలల కాలానికిగాను బ్యాంక్‌ రూ.16,694.51 కోట్ల నికర లాభాన్ని గడించింది. అంతక్రితం ఏడాది ఇదే త్రైమాసికంలో నమోదైన రూ.9,113.53 కోట్ల లాభంతో పోలిస్తే 83 శాతం వృద్ధి నమోదైంది. వడ్డీల మీద వచ్చే ఆదాయం పెరగడం, మొండి బకాయిలను పూడ్చుకోవడానికి నిధుల కేటాయింపులు తగ్గుముఖం పట్టడం వల్లనే లాభాల్లో భారీ వృద్ధి నమోదైందని బ్యాంక్‌ వర్గాలు వెల్లడించాయి.

• బ్యాంక్‌కు వడ్డీల మీద వచ్చే ఆదాయం ఏడాది ప్రాతిపదికన 31 శాతం పెరిగి రూ.92,951 కోట్లకు చేరుకున్నది.
• మొండి బకాయిలను పూడ్చుకోవడానికి బ్యాంక్‌ రూ.3,315.71 కోట్ల నిధులను వెచ్చించింది. క్రితం ఏడాది ఇది రూ.7,237.45 కోట్లుగా ఉన్నది.
• 2022-23 ఆర్థిక సంవత్సరానికిగాను బ్యాంక్‌ లాభం 59 శాతం పెరిగి రూ.50,232.45 కోట్లకు చేరుకున్నది.
• గడిచిన ఆర్థిక సంవత్సరానికిగాను రూపాయి ముఖ విలువ కలిగిన ప్రతిషేరుకు రూ.11.30 లేదా 1130 శాతం డివిడెండ్‌ను బ్యాంక్‌ బోర్డు ప్రకటించింది.
• నికర వడ్డీ మార్జిన్‌ 44 బేసిస్‌ పాయింట్లు పెరిగి 3.84 శాతానికి చేరుకున్నది.
• బ్యాంక్‌ స్థూల నిరర్థక ఆస్తుల విలువ 2.78 శాతానికి దిగిరాగా, నికర ఎన్‌పీఏ 0.67 శాతానికి దిగొచ్చింది.
• బ్యాంక్‌ షేరు ధర 2.11 శాతం తగ్గి రూ.574.15 వద్ద స్థిరపడింది.