సూచీలకు టారిఫ్‌ సెగ.. ఫార్మా, ఐటీ షేర్లలో భారీగా అమ్మకాలు

దేశీయ స్టాక్‌ మార్కెట్ల నష్టాల పరంపర కొనసాగుతున్నది. అమెరికా అధ్యక్షుడు డొనాల్డ్‌ ట్రంప్‌ మరోసారి బాంబు పేల్చడంతో సూచీలు కుదేలయ్యాయి. బ్రాండెడ్‌ ఔషధ ఎగుమతులపై 100 శాతం సుంకం విధిస్తున్నట్టు ప్రకటించడంతో దేశీయ మదుపరుల్లో ఆందోళన తీవ్రస్థాయికి చేరుకున్నది.

•  ఒక్క శాతం వరకు నష్టపోయిన సూచీలు

ముంబై, సెప్టెంబర్‌ 26 : దేశీయ స్టాక్‌ మార్కెట్ల నష్టాల పరంపర కొనసాగుతున్నది. అమెరికా అధ్యక్షుడు డొనాల్డ్‌ ట్రంప్‌ మరోసారి బాంబు పేల్చడంతో సూచీలు కుదేలయ్యాయి. బ్రాండెడ్‌ ఔషధ ఎగుమతులపై 100 శాతం సుంకం విధిస్తున్నట్టు ప్రకటించడంతో దేశీయ మదుపరుల్లో ఆందోళన తీవ్రస్థాయికి చేరుకున్నది. దీంతో అమ్మకాలకు మొగ్గుచూపడంతో ఒక దశలో 800 పాయింట్లకు పైగా నష్టపోయిన 30 షేర్ల ఇండెక్స్‌ సూచీ సెన్సెక్స్‌ చివరి వరకు అదే ట్రెండ్‌ను కొనసాగిస్తూ 733.22 పాయింట్ల నష్టంతో మూడు వారాల కనిష్ఠ స్థాయి 80,426.46 వద్ద నిలిచింది. మరో సూచీ నిఫ్టీ సైతం 236.15 పాయింట్లు కోల్పోయి 24,654.70 వద్ద నిలిచింది. ట్రంప్‌ దెబ్బకు ఫార్మా, ఐటీ రంగ షేర్లలో అమ్మకాలు పోటెత్తాయి. హెల్త్‌కేర్‌ ఇండెక్స్‌ ఏకంగా 2.14 శాతం నష్టపోవడం సూచీల పతనానికి ఆజ్యంపోసింది.

• మహీంద్రా అండ్‌ మహీంద్రా షేరు 3.70 శాతం నష్టపోయి లూజర్‌గా నిలిచింది.
• దీంతోపాటు ఎటర్నల్‌, టాటా స్టీల్‌, బజా జ్‌ ఫైనాన్స్‌, సన్‌ఫార్మా, ఏషియన్‌ పెయిం ట్స్‌, టెక్‌ మహీంద్రా, ఇన్ఫోసిస్‌, టీసీఎస్‌ షేర్లు 2 శాతానికి పైగా నష్టపోయాయి.
• హెచ్‌సీఎల్‌ టెక్నాలజీ, భెల్‌, అదానీ పోర్ట్స్‌, హెచ్‌యూఎల్‌, ఐసీఐసీఐ బ్యాంక్‌, యాక్సిస్‌ బ్యాంక్‌, భారతీ ఎయిర్‌టెల్‌, కొటక్‌ బ్యాంక్‌, ఎన్‌టీపీసీ, హెచ్‌డీఎఫ్‌సీ బ్యాంక్‌, ఎస్బీఐ, మారుతి షేర్లు కూడా పడిపోయాయి.
• ఎల్‌అండ్‌టీ, టాటా మోటర్స్‌, ఐటీసీ, రిలయన్స్‌ షేర్లు లాభాల్లో ముగిశాయి.
• బీఎస్‌ఈ స్మాల్‌క్యాప్‌ 2 శాతం, మిడ్‌క్యాప్‌ ఇండెక్స్‌లు 1.96 శాతం నష్టపోయాయి.
• రంగాలవారీగా టెలికాం 2.69 శాతం నష్టపోగా..ఐటీ 2.43 శాతం, కన్జ్యూమర్‌ డ్యూరబుల్‌ 2.34 శాతం, టెక్నాలజీ 2.03 శాతం, కమోడిటీస్‌ 1.91 శాతం, మెటల్‌ 1.90 శాతం, సర్వీసెస్‌ 1.73 శాతం వరకు పతనం చెందాయి.
• గత ఆరు సెషన్లలో సెన్సెక్స్‌ 2,587.50 పాయింట్లు లేదా 3.11 శాతం నష్టపోగా, నిఫ్టీ 768.9 పాయింట్లు లేదా 3 శాతం పడిపోయింది.

రూ.16 లక్షల కోట్ల సంపద ఆవిరి దేశీయ స్టాక్‌ మార్కెట్లు వరుస నష్టాలతో కొనసాగుతుండటంతో మదుపరులు ఉక్కిరిబిక్కిరి అవుతున్నారు. గడిచిన ఆరు సెషన్లలో మదుపరులు రూ.16 లక్షల కోట్లకు పైగా సంపదను కోల్పోయారు. దీంతో బీఎస్‌ఈలో లిస్టైన కంపెనీల మార్కెట్‌ విలువ రూ.450.85 లక్షల కోట్లకు దిగొచ్చింది. అంతకుముందు వారంలో రూ.466.89 లక్షల కోట్లుగా ఉన్నది.