మార్కెట్లకు క్రూడ్‌ సెగ

దేశీయ స్టాక్‌ మార్కెట్లపై ఇంధన సెగ గట్టిగానే తాకింది. అంతర్జాతీయ మార్కెట్లో క్రూడాయిల్‌ బుసలుకొడుతుండటంతోపాట గ్లోబల్‌ మార్కెట్లో నెలకొన్న నిస్తేజం కారణంగా సూచీలు భారీగా పతనం చెందాయి. ప్రధానంగా ఆసియా మార్కెట్లు కుప్పకూలడంతో దలాల్‌స్ట్రీట్‌లో అమ్మకాలు పోటెత్తాయి.

• ఒక దశలో 2,400.. చివర్లో 1,353 పాయింట్లు నష్టపోయిన సెన్సెక్స్‌
• 422 పాయింట్లు కోల్పోయిన ఎన్‌ఎస్‌ఈ నిఫ్టీ

ముంబై, మార్చి 9: దేశీయ స్టాక్‌ మార్కెట్లపై ఇంధన సెగ గట్టిగానే తాకింది. అంతర్జాతీయ మార్కెట్లో క్రూడాయిల్‌ బుసలుకొడుతుండటంతోపాట గ్లోబల్‌ మార్కెట్లో నెలకొన్న నిస్తేజం కారణంగా సూచీలు భారీగా పతనం చెందాయి. ప్రధానంగా ఆసియా మార్కెట్లు కుప్పకూలడంతో దలాల్‌స్ట్రీట్‌లో అమ్మకాలు పోటెత్తాయి. గత వారం రోజులుగా నష్టాలే పరమావదిగా సాగుతున్న సూచీలపై ఆసియా మార్కెట్లు, క్రూడాయిల్‌ బాంబు పడింది. దీంతో ఇంట్రాడేలో మూడు శాతానికి పైగా నష్టపోయిన సూచీలు చివర్లో ఈ భారీ నష్టాలను తగ్గించుకోగలిగాయి.

ఒక దశలో 2,400 పాయింట్ల వరకు నష్టపోయినా 30 షేర్ల ఇండెక్స్‌ సూచీ సెన్సెక్స్‌ 1,352.74 పాయింట్లు లేదా 1.71 శాతం నష్టపోయి 77,566.16 వద్ద స్థిరపడింది. నేటి మార్కెట్లో 3,379 షేర్లు నష్టపోగా, 972 షేర్లు లాభాల్లో ముగిశాయి. మరో సూచీ ఎన్‌ఎస్‌ఈ నిఫ్టీ కూడా 422.40 పాయింట్లు లేదా 1.73 శాతం నష్టపోయి 24,028.05 వద్ద ముగిసింది. ఇంట్రాడేలో 752 పాయింట్లు కోల్పోయి తన కీలక మైలురాయి 24 వేల స్థాయిని కోల్పోయింది. పశ్చిమాసియాలో నెలకొన్న ఉద్రిక్త పరిస్థితులు రోజురోజుకు మరింత ముదురుతుండటంతో మదుపరుల నష్టాలకు ఆజ్యంపోశాయని దలాల్‌స్ట్రీట్‌ వర్గాలు వెల్లడించాయి.

చమురు, పెయింట్స్‌ షేర్లు కుదేలు

• చమురు కంపెనీలు, పెయింట్స్‌ తయారీ సంస్థల షేర్లు కుదేలయ్యాయి. క్రూడాయిల్‌ భగ్గుమనడంతో ఆయిల్‌ మార్కెటింగ్‌ కంపెనీల షేర్లు తీవ్ర ఒత్తిడికి గురయ్యాయి. బీపీసీఎల్‌ షేరు అత్యధికంగా 6.12 శాతం నష్టపోగా, హెచ్‌పీసీఎల్‌ షేరు 5.05 శాతం, ఐవోసీ షేరు 4.30 శాతం పతనం చెందాయి. అలాగే పెయింట్స్‌కు చెందిన షాలిమార్‌ షేరు 4.18 శాతం కోల్పోగా..ఇండిగో 3.83 శాతం, ఏషియన్‌ పెయింట్స్‌ 2.75శాతం, నెరోలాక్‌ 2.09 శాతం, బర్గర్‌ పెయింట్స్‌ 1.88 శాతం పతనం చెందాయి.
• అల్ట్రాటెక్‌ సిమెంట్‌ షేరు 5.09 శాతం నష్టపోయి టాప్‌ లూజర్‌గా నిలిచింది. దీంతోపాటు మారుతి 4.56 శాతం, మహీంద్రా అండ్‌ మహీంద్రా 4.39 శాతం, ఎస్బీఐ 3.92 శాతం, అదానీ పోర్ట్స్‌ 3.75 శాతం షేర్లు నష్టపోయాయి.
• వీటితోపాటు టాటా స్టీల్‌, కొటక్‌ బ్యాంక్‌, ఎల్‌అండ్‌టీ, ఐసీఐసీఐ బ్యాంక్‌, ఏషియన్‌ పెయింట్స్‌, బీఈఎల్‌, యాక్సిస్‌ బ్యాంక్‌, హెచ్‌డీఎఫ్‌సీ బ్యాంక్‌, టైటాన్‌, బజాజ్‌ ఫిన్‌సర్వ్‌, హెచ్‌యూఎల్‌, పవర్‌గ్రిడ్‌, బజాజ్‌ ఫైనాన్స్‌, ఐటీసీ, టీసీఎస్‌, ఎటర్నల్‌, ఎన్‌టీపీసీ, ట్రెంట్‌, భారతీ ఎయిర్‌టెల్‌ షేర్లు పతనం చెందాయి.
• కానీ, రిలయన్స్‌ 1.37 శాతం, సన్‌ఫార్మా, ఇన్ఫోసిస్‌, టెక్‌ మహీంద్రా, హెచ్‌సీఎల్‌ టెక్నాలజీ షేర్లు లాభాల్లో ముగిశాయి.
• అన్ని రంగాల సూచీలు పతనం చెందాయి. వీటిలో ప్రైవేట్‌ రంగ బ్యాంకిం గ్‌ సూచీ అత్యధికంగా 4.50 శాతం నష్టపోగా, పీఎస్‌యూ బ్యాంకింగ్‌ 3.92 శాతం, ఆటో 3.89 శాతం, సర్వీసెస్‌ 3.37 శాతం, ఆయిల్‌ అండ్‌ గ్యాస్‌ 3.11 శాతం కిందికి పడిపోయాయి.

పతనానికి కారణాలు

• పశ్చిమాసియాలో సంక్షోభం
• క్రూడాయిల్‌ ధరలు భగ్గుమనడం
• రూపాయి విలువ కనిష్ఠ స్థాయికి పడిపోవడం
• విదేశీ మదుపరుల అమ్మకాలు
• అంతర్జాతీయ మార్కెట్ల నష్టాలు