పీవీలకు పెరుగుతున్న డిమాండ్‌

వచ్చే ఆర్థిక సంవత్సరం (2024-25)లో ప్యాసింజర్‌ వాహన విక్రయాలు 5-7 శాతం వరకు పెరిగే అవకాశం ఉన్నదని క్రెడిట్‌ రేటింగ్‌ ఏజెన్సీ క్రిసిల్‌ తెలిపింది. ఎస్‌యూవీలకు డిమాండ్‌ అధికంగా ఉండటం ఇందుకు కారణమని సోమవారం విడుదల చేసిన నివేదికలో వెల్లడించింది.

• రేటింగ్‌ ఏజెన్సీ క్రిసిల్‌

ముంబై, ఫిబ్రవరి 26: వచ్చే ఆర్థిక సంవత్సరం (2024-25)లో ప్యాసింజర్‌ వాహన విక్రయాలు 5-7 శాతం వరకు పెరిగే అవకాశం ఉన్నదని క్రెడిట్‌ రేటింగ్‌ ఏజెన్సీ క్రిసిల్‌ తెలిపింది. ఎస్‌యూవీలకు డిమాండ్‌ అధికంగా ఉండటం ఇందుకు కారణమని సోమవారం విడుదల చేసిన నివేదికలో వెల్లడించింది. కొనుగోలుదారుల అభిరుచులు ఏడాదిగా మారుతూ వస్తున్నాయని, ముఖ్యంగా విలాసవంతమైన కార్లకు మొగ్గుచూపుతున్నారని, భద్రత కూడా అధిక ప్రాధాన్యత ఇస్తున్నారని తెలిపింది.

దేశవ్యాప్తంగా అమ్ముడవుతున్న కార్ల విక్రయాల్లో 2018-19లో 28 శాతంగా ఉన్న ఎస్‌యూవీల వాటా రెండింతలు పెరిగి 60 శాతానికి పెరిగిందని వెల్లడించింది. మార్కెట్లోకి నూతన మాడళ్లు అందుబాటులోకి రావడం, ధరలు ఆశించిన స్థాయిలో ఉండటం, ఎలక్ట్రిక్‌ వాహనాలు కూడా మార్కెట్లోకి విడుదలకావడం కూడా ఇందుకు కారణమని తెలిపింది.

నివేదిక ముఖ్యాంశాలు

• ప్రస్తుత ఆర్థిక సంవత్సరంలో గ్రామీణ ప్రాంతాల్లో కార్లకు డిమాండ్‌ పడిపోవడం, ఎంట్రీలెవల్‌ కార్లు లేకపోవడంతో వృద్ధి తగ్గుతుందని అంచనావేస్తున్నది.
• కమోడిటీ ధరలు భగ్గుమనడంతో వాహనాల ధరలు గత నాలుగేండ్లుగా పెరుగుతూ వచ్చాయి. భద్రత, కాలుష్య ఉద్గార నియమ నిబంధనలు కఠిన తరంతోనూ రేట్లు పెరిగాయి.
• 2018-19లో 17 శాతంగా ఉన్న ప్యా సింజర్‌ వాహనాల ఎగుమతి ఈ ఏడాది 14 శాతానికి పరిమితం కానున్నది.
• 2024-25లో రూ.44 వేల కోట్ల పెట్టుబడులు పెట్టనున్న సంస్థలు.