ఆఫీసు నుంచే పని.. 70 శాతం చిన్న కంపెనీలు మొగ్గు

కొవిడ్‌ నేపథ్యంలో అమలవుతున్న వర్క్‌ ఫ్రం హోం పద్ధతిని పలు కంపెనీలు ఇప్పటికీ అమలు చేస్తుండగా, వివిధ రంగాల్లోని 70 శాతంపైగా చిన్న సంస్థలు మొగ్గుచూపుతున్నాయి.

• పెద్ద కార్పొరేట్లలో 15 శాతమే అనుకూలం

న్యూఢిల్లీ, నవంబర్‌ 26: కొవిడ్‌ నేపథ్యంలో అమలవుతున్న వర్క్‌ ఫ్రం హోం పద్ధతిని పలు కంపెనీలు ఇప్పటికీ అమలు చేస్తుండగా, వివిధ రంగాల్లోని 70 శాతంపైగా చిన్న సంస్థలు మొగ్గుచూపుతున్నాయి. పెద్ద కార్పొరేట్లలో 15 శాతం ప్రస్తుతానికి ఆఫీసు నుంచే పని ప్రక్రియను అమలు చేయాలని, 70 శాతం హైబ్రీడ్‌ విధానాన్ని (వారంలో కొద్ది రోజులు ఇంటి నుంచి మరికొద్ది రోజులు ఆఫీసు నుంచి పనిచేయడం) పాటించాలని భావిస్తున్నాయి. ఫ్లెక్సిబుల్‌ స్పేస్‌ ప్రొవైడింగ్‌ సంస్థలు ఆఫీస్‌, క్యూడెస్క్‌లు సంయుక్తంగా నిర్వహించిన సర్వేలో ఆయా కంపెనీలు వాటి అభిప్రాయాల్ని పంచుకున్నాయి. వివరాలు..

• 90 శాతం ఫార్మా కంపెనీలు ఆఫీసు నుంచే పని జరగాలని భావిస్తున్నాయి.
•  టెక్నాలజీ, రిటైల్‌ రంగంలోని 50 శాతం సంస్థలు హైబ్రీడ్‌ వర్కింగ్‌ విధానానికి ఓటు చేశాయి.
• మెజారిటీ కార్పొరేట్లు వచ్చే 12 నెలల్లో ఆఫీసుకు అధికశాతం మందిని రప్పించాలని భావిస్తుండగా, 40 శాతం కంపెనీలు హైబ్రీడ్‌ విధానాన్ని కొనసాగించనున్నట్లు పేర్కొన్నాయి.
• చిన్న, మధ్యతరహా, భారీ సంస్థలన్నింటిలో 35-40 శాతం కంపెనీలు హైబ్రీడ్‌ వర్కింగ్‌కి ఓటు చేస్తున్నాయి.
• 45 శాతం సంస్థలు కొత్త ఆఫీస్‌ స్పేస్‌ల కోసం చూస్తున్నాయి. వీటిలో 35 శాతం కంపెనీలు కో-వర్కింగ్‌ స్పేస్‌లకు మొగ్గుచూపుతున్నాయి.
•  పలు సంస్థలు అద్దె భవనాలకు చౌక ప్రత్యామ్నాయాల్ని అన్వేషిస్తున్నాయి. ఇందుకోసం కోవర్కింగ్‌ కంపెనీలతో జతకట్టాలని భావిస్తున్నాయి.