చివరి గంటలో జోష్‌

తీవ్ర ఊగిసలాటల మధ్య కొనసాగిన సూచీలు చివరి గంటలో మదుపరులు ఎగబడి కొనుగోళ్లు జరపడంతో భారీగా లాభపడ్డాయి. దేశ ఆర్థిక పరిస్థితులు కుదుటపడే అవకాశం ఉన్నట్లు వచ్చిన సంకేతాలు, అంతర్జాతీయ మార్కెట్ల నుంచి సానుకూల అంశాలు పెట్టుబడిదారుల్లో జోష్‌ పెంచింది.

• రికార్డు స్థాయికి చేరుకున్న నిఫ్టీ
• 500 పాయింట్లు పెరిగిన సెన్సెక్స్‌

ముంబై, ఫిబ్రవరి 22: తీవ్ర ఊగిసలాటల మధ్య కొనసాగిన సూచీలు చివరి గంటలో మదుపరులు ఎగబడి కొనుగోళ్లు జరపడంతో భారీగా లాభపడ్డాయి. దేశ ఆర్థిక పరిస్థితులు కుదుటపడే అవకాశం ఉన్నట్లు వచ్చిన సంకేతాలు, అంతర్జాతీయ మార్కెట్ల నుంచి సానుకూల అంశాలు పెట్టుబడిదారుల్లో జోష్‌ పెంచింది. కనిష్ఠ స్థాయి నుంచి 1,200 పాయింట్ల శ్రేణిలో కదలాడిన 30 షేర్ల ఇండెక్స్‌ సెన్సెక్స్‌ లాభాల్లోకి వచ్చింది. ఐటీ, టెక్నాలజీ, ఆటోమొబైల్‌ రంగ షేర్లకు పెట్టుబడిదారుల నుంచి లభించిన మద్దతుతో సెన్సెక్స్‌ 535.15 పాయింట్లు అందుకొని 73,158.24 వద్ద ముగిశాయి. 72,677 వద్ద ప్రారంభమైన సెన్సెక్స్‌ ఇంట్రాడేలో 73,256 పాయింట్ల గరిష్ఠ స్థాయిని తాకింది. మరో సూచీ నిఫ్టీ ఆల్‌టైం హైకీ చేరుకున్నది. ఇంట్రాడేలో 22,252 పాయింట్లను తాకిన నిఫ్టీ చివర్లో 162.40 పాయింట్లు అందుకొని 22,217.45 వద్ద ముగిసింది. ఇది కూడా సూచీలకు రికార్డు స్థాయి ముగింపు. ఈ నెల 20న సూచీ 22,196 పాయింట్ల గరిష్ఠ స్థాయికి చేరుకున్న విషయం తెలిసిందే. గురువారం కనిష్ఠ స్థాయికి పడిపోయిన సూచీలు చివర్లో భారీగా కోలుకున్నాయని, యూరోజోన్‌ దేశాల పీఎంఐ డాటా ఆశాజనకంగా ఉండటం, అమెరికాకు చెందిన టెక్నాలజీ సంస్థల షేర్లు భారీగా లాభపడటం సూచీలు కోలుకోవడానికి ప్రధాన కారణమని దలాల్‌ స్ట్రీట్‌ వర్గాలు వెల్లడించాయి.

• హెచ్‌సీఎల్‌ టెక్‌ 3 శాతానికి పైగా పెరిగి టాప్‌ గెయినర్‌గా నిలిచింది.
• దీంతోపాటు ఐటీసీ, మహీంద్రా, టీసీఎస్‌, టెక్‌ మహీంద్రా, ఎల్‌అండ్‌టీ, విప్రో, మారుతి, యాక్సిస్‌ బ్యాంక్‌, ఇన్ఫోసిస్‌, టాటా స్టీల్‌, ఐసీఐసీఐ బ్యాంక్‌, టాటా మోటర్స్‌, ఎన్‌టీపీసీలు ఒక్క శాతానికి పైగా పెరిగాయి.
• సన్‌ఫార్మా, రిలయన్స్‌, పవర్‌గ్రిడ్‌, ఏషియన్‌ పెయింట్స్‌, నెస్లె, బజాజ్‌ ఫిన్‌సర్వ్‌, జేఎస్‌డబ్ల్యూ స్టీల్‌ షేర్లు లాభాల్లో ముగిశాయి.
• ఇండస్‌ఇండ్‌ బ్యాంక్‌ 1.87 శాతం పతనం చెంది టాప్‌ లూజర్‌గా నిలిచింది.
• దీంతోపాటు హెచ్‌డీఎఫ్‌సీ బ్యాంక్‌, కొటక్‌ బ్యాంక్‌, హెచ్‌యూఎల్‌, ఎస్బీఐ, ఎయిర్‌టెల్‌, బజాజ్‌ ఫైనాన్స్‌, అల్ట్రాటెక్‌ సిమెంట్‌, టైటాన్‌లు నష్టపోయాయి.
• బీఎస్‌ఈ మిడ్‌క్యాప్‌, లార్జ్‌క్యాప్‌, స్మాల్‌క్యాప్‌ ఇండెక్స్‌లు లాభాల్లో ముగిశాయి.
• రంగాలవారీగా చూస్తే ఆటో 1.85 శాతం అధికమవగా, ఐటీ 1.83 శాతం, క్యాపిటల్‌ గూడ్స్‌ 1.80 శాతం చొప్పున పెరిగాయి. అలాగే టెక్‌ 1.59 శాతం, ఇండస్ట్రీయల్స్‌ 1.50 శాతం, పవర్‌ 1.38 శాతం అధికమయ్యాయి.